"Sytuacyja stała horšaja, tendencyja — lepšaja". Hety žartoŭny afaryzm Jurja Drakachrusta pretenduje na epihraf kanferencyi "Da novaha bačańnia Biełarusi". Hetu spravu arhanizavaŭ u Kijevie (zdahadajciesia z troch razoŭ, čamu nia ŭ Miensku) Biełaruski instytut stratehičnych daśledavańniaŭ.
Badaj, dla ŭsich ekspertaŭ (i nieekspertaŭ taksama:) jość vidavočnym, što sytuacyja ŭ nas, i najpierš u źviazku z enerhietyčnym kanfliktam, zrušyłasia. Pytańnie u tym, jaki kirunak pracesaŭ. Palitolah Valer Karbalevič nie vyklučaje aŭtarytarnaj madernizacyi pavodle kitajskaj schiemy. Ekanamist Pavał Danejka ličyć: patrabavańni investaraŭ transfarmavać ekanamičnuju systemu ŭ rešcie reštaŭ padšturchnuć i palityčnyja źmieny. Sacyjolahi — dyk tyja i ŭvohule zahnali prezydenta ŭ "rejtynhavuju pastku":) Maŭlaŭ, kab nia stracić papularnaść, treba niaspynna padvyšać dabrabyt. A jon, u svaju čarhu, farmuje inšuju kaštoŭnasnuju hijerarchiju: patreby ŭ paŭnacennaj infarmacyi, samarealizacyi i h.d.
Zrešty, stavała na kanferencyi i pesymistyčnych notak: maŭlaŭ, režym zdolny tolki zakručvać šruby, i henaje ščaście nam — nadoŭha. Chtości zaklikaŭ kaleh-myślaroŭ pakinuć barykady dy hieneravać kancepcyi ŭ viežy sa słanovaj kostki. Chtości tradycyjna chvastaŭ palityčnuju apazycyju: nia łović myšej, starym lideram čas na zvałku i ŭsio takoje.
U svaju čarhu, Jury Drakachrust (viadomy mnohim jak aŭtar "Praskaha akcentu" na "Svabodzie") sfarmulavaŭ tezu nie zusim palitalahična, ale vyrazna: "Razvahi biełaruskich intelektuałaŭ pra šmatlikija pamyłki apazycyi źjaŭlajucca pieravažna nia čym inšym, jak kidańniem pantoŭ". Ź jahonych słoŭ, u Biełarusi za apošnija hady pierabrali praktyčna ŭsie mahčymyja kancepty baraćby za pieramieny — ničoha nie pracuje!
"Ad jakaści apazycyi, — robić vysnovu analityk, — nie zaležyć, kali adbudziecca źmiena režymu. Ad hetaj jakaści zaležać formy, u jakich adbudziecca źmiena: čym nižejšaja jakaść — tym bolšaja imaviernaść kryvavaha pierachodu. A samaje hałoŭnaje — ad jakaści apazycyi zaležyć toje, što budzie paśla źmieny. Navat kali jana, siońniašniaja apazycyja, i nia budzie adyhryvać tady hałoŭnaje roli".
A ŭ tym, što nivodnaja revalucyja, navat aranžavaja:), nia robić usich zadavolenymi, možna było lohka pierakanacca, vyjšaŭšy na Chraščacik. Nasuprać meryi — namioty pikietoŭnikaŭ. Čałaviek z mehafonam klajmuje ŭłady za toje, što začyščajuć pierachody metro ad drobnych pradprymalnikaŭ. Pobač zmahajucca za svaje pravy niejkija sabakavody razam z sabakami:) Biassprečny prahres u tym, što nichto nie dastaje dručkom pa śpinie: pikiety pad voknami baćkoŭ horadu — dazvolenyja.
Uvohule ž pa mnohich parametrach — nam by ichnija prablemy!
NA ZDYMKACH:
sacyjolah Andrej Vardamacki davodzić, što biełaruski prezydent apynuŭsia ŭ "rejtynhavaj pastcy";
pieradvybarčaj ahitacyjnaj pradukcyi kijeŭcy najelisia;
"aranžavaja revalucyja" nia vyrašyła ŭsich prablemaŭ;
zatoje ichni MZS užo adnoj nahoj ŭ Eŭraźviazie:)
