 Alaksandar Špileŭski |
U chutkim časie buduć nadrukavanyja blanki deklaracyjaŭ pa‑biełarusku, paabiacaŭ na pres‑kanferencyi staršynia Dziaržaŭnaha mytnaha kamitetu.
Adkazvajučy na pytańnie, jak adreahuje Kamitet na zajavu staršyni Kanstytucyjnaha sudu nakont niepavahi biełaruskich mytnikaŭ da hramadzianaŭ, što patrabujuć biełaruskamoŭnych deklaracyjaŭ, Alaksandar Špileŭski zaznačyŭ:
«Heta niedahlad, navat bolš — heta maja asabistaja pamyłka, jakuju vielmi chutka vypravim».
Pavodle staršyni mytnaha kamitetu, u minuły paniadziełak jon rasparadziŭsia, kab u elektronnuju bazu mytnych dakumentaŭ byli ŭklučanyja ich biełaruskamoŭnyja versii.
«Ciapier pry pieršym ža patrabavańni blanku na biełaruskaj movie supracoŭnik mytni zmoža razdrukavać dakument» — zapeŭniŭ A. Špileŭski.
U chutkim časie na zamovu mytni budzie nadrukavanaja partyja blankaŭ deklaracyjaŭ pa‑biełarusku.
Pa stanie na 7 vieraśnia biełaruskaja mytnia dała ŭ biudžet 6 trłn. 250 młrd. rubloŭ, što ŭdvaja pieravyšaje pakazčyk za analahičny peryjad minułaha hodu.
Hetyja pastupleńni całkam zadavolać patreby takich raździełaŭ biudžetu jak adukacyja, achova zdaroŭja, abarona dy pravaachoŭnaja dziejnaść, paviedamiŭ žurnalistam staršynia mytnaha kamitetu Alaksandar Špileŭski.
Sp. Špileŭski raspavioŭ pra raźvićcio prahramy elektronnaha deklaravańnia tavaraŭ. Novaja infarmacyjnaja systema ŭliku i kantrolu mytnych płaciažoŭ užo dziejničaje na Mienskaj rehijanalnaj, «Miensk‑2» i Viciebskaj mytniach. U vyniku dziejnaści novaj systemy adznačajecca istotnaje skaračeńnie kolkaści parušeńniaŭ mytnaha zakanadaŭstva.
Ciapier na pieršaje miesca vychodzić pytańnie baraćby z pastupleńniem na terytoryju Biełarusi darahich narkatyčnych srodkaŭ z krainaŭ Zachodniaj Eŭropy.
Za hramadzianami Biełarusi pakidajecca prava vybaru miesca mytnaha afarmleńnia nabytaha za miažoj aŭto. Zrabić ciapier heta možna jak na miažy, tak i pa miescy žycharstva. Vyklučeńniem pa‑raniejšamu źjaŭlajecca pamiežny pierachod «Varšaŭski most» — praź vialiki patok transpartu mytnaje afarmleńnie aŭto tut nia ładzicca.
Ciapier rychtujecca prajekt ukazu, zaklikanaha likvidavać niezakonnuju pradprymalnickuju dziejnaść, źviazanuju ź pierahonam aŭto praź miažu. Novy narmatyŭ zrobić niepatrebnaj abaviazkovaje afarmleńnie aŭto na ŭnutranych mytniach.
20 vieraśnia biełaruskija mytniki adznačać 16‑ci hodździe ŭtvareńnia mytnaj słužby Respubliki Biełaruś.
