Historyja moładzievaha aktyvista z Homielu Siarhieja Siamionava pačałasia 20 žniŭnia sioleta, kali chłopiec pierasiakaŭ biełaruska‑ŭkrainskuju miažu. Chłopiec kaža, što prablemy na miažy ŭ jaho ŭźnikajuć zaŭsiody, nia staŭ vyklučeńniem i toj vypadak.
«Mnie prapanavali zapoŭnić mytnuju deklaracyju. Ja paprasiŭ, kab mnie dali deklaracyju na biełaruskaj movie, ale takoj u mytnikaŭ nie akazałasia. Ja zastaŭsia pry svajoj pazycyi, abhruntavaŭšy heta tym, što praz kiepskaje viedańnie rasiejskaj movy mahu dapuścić niejkija pamyłki. Nie hramatyčnyja, a pa źmieście. Paśla admovy prapanavaŭ, kab mnie pradstavili prafesijnaha pierakładčyka, ale i ŭ hetym było admoŭlena. Deklaracyju ja tak i nie zapoŭniŭ. Za heta na mianie i byŭ składzieny pratakoł pa artykule 23.4 Kodeksu ab administratyŭnych pravaparušeńniach (niepadparadkavańnie zakonnym patrabavańniam)», — kaža Siarhiej Siamionaŭ.
30 žniŭnia nad Siamionavym pa hetaj spravie adbyŭsia sud. Sudździa Damnienka vyniesła prysud adrazu ž paśla śviedčańniaŭ Siamionava, chłopiec atrymaŭ 30 bazavych vieličyń štrafu (930 tysiač rubloŭ). Nie byli navat apytany supracoŭniki mytni, jakija składali pratakoł.
Akurat praź dziesiać Siarhiej Siamionaŭ jašče raz vyjaždžaŭ va Ŭkrainu. Na kantrolna‑prapusknym punkcie «Novaja Huta» jaho paprasili znoŭ zapoŭnić mytnuju deklaracyju. Niahledziačy na sumny minuły dośvied, chłopiec usio adno paprasiŭ pradstavić jamu deklaracyju pa‑biełarusku. Na što atrymaŭ rašučuju admovu. Dalej historyja raźvivałasia prykładna pa tym samym scenary, što i ŭ pieršy raz. Siamionava pryviali da načalnika źmieny.
«Ja vyrašyŭ usio adno ćviorda trymacca svajho», — zaznačaje chłopiec.
Na jaho byŭ składzieny administracyjny pratakoł pa tym samym pravaparušeńni, što i 20 žniŭnia. Pamiežniki adpuścili chłopca ŭžo tady, kali ničym dabracca da Čarnihava było niemahčyma.
«Adnak u mianie ŭ 9 ranicy była važnaja sustreča, tamu vyrašyŭ usio ž dabiracca da pryznačanaha miesca. Raźličvać na toje, što mianie padbiare niejkaja mašyna z majoj źniešnaściu i rostam nie vypadała, tamu ŭsie 65 kilametraŭ da Čarnihava prajšoŭ pieššu», — kaža Siamionaŭ.
Mienavita hetyja historyi pasłužyli povadam dla zajavaŭ staršyni Kanstytucyjnaha sudu Ryhora Vasileviča. 18 vieraśnia na seminary, pryśviečanym pytańniam mižnarodnych standartaŭ u halinie pravoŭ čałavieka i pravasudździa, jon adznačyŭ, što ŭ krainie parušajucca pravy biełaruskamoŭnych, pryvioŭšy prykład Siamionava.
Praz paru dzion na incydent zreahavaŭ i staršynia mytnaha kamitetu Alaksandar Špileŭski, jaki paabiacaŭ, što bližejšym časam na mytniach źjaviacca deklaracyi na biełaruskaj movie.
Siamionaŭ na heta reahuje prosta:
«Zdaryłasia toje, što musiła zdarycca ŭ luboj krainie. Ničoha zvyšnaturalnaha nie adbyłosia. My prosta adstajali svajo prava razmaŭlać i pisać pa‑biełarusku. Prava być biełarusam. Pryjemna, što i ja krychu spryčyniŭsia da hetaha».
Adnak sudovyja raźbiralnictvy pa spravie Siamionava nia skončylisia. Sud pa druhim pratakole musiŭ adbycca ŭ paniadziełak paśla abiedu, ale ź niezrazumiełych dla chłopca pryčyn razhlad spravy pieranieśli na 4 kastryčnika. Bližejšymi dniami ŭ Homielskim abłasnym sudzie pavinna być razhledžanaja skarha Siamionava pa pieršym prysudzie.
