 |
Kiraŭnictva žyllova‑kamunalnaj haspadarki skardzicca, što ciažka było pierałamić psichałohiju ludziej. Bolš čym łozunhami i zaklikami, žycharoŭ udałosia pierakanać skidkami: na praciahu troch hadoŭ ŭładalniki ličylnikaŭ płaciać za vadu na 20 adsotkaŭ mieniej. Akramia hetaha, vopytnym šlacham vyjaŭlena: realnaje spažyvańnie vady značna nižejšaje za ŭstanoŭlenyja normy, jakija treba apłačvać bieź ličylnikaŭ.
— Kaniečnie, ja pastaŭlu prybor, — nie sumniavajecca znajomaja mahilaŭčanka. — U bolšaści maich susiedziaŭ užo jość svaje ličylniki. I kali ŭ jakoj babłui paciače ŭnitaz, to ja razam ź joj padzialu hety finansavy ciažar. A tak budu płacić skolki spažyvu, i nie bolej. Tym bolš, uvieś dzień ja na pracy, a na vychadnyja źjazdžaju na lecišča.
— A mnie ličylnik nie patrebien, — maje inšy pohlad haspadar kvatery ŭ Babrujsku. — Tolki što zrabiŭ ramont, i ničoha razburać nie budu. Dy i vada tannaja — ja zdolny zapłacić.
Vada sapraŭdy atrymlivajecca pakul niedarahaja — 256 rubloŭ za tysiaču litraŭ. Adnak u jaje canie pałovu skaładajuć vydatki za enierhiju, tamu rost taryfaŭ na vadu niepaźbiežny. A śpiecyjalisty padličyli, što ŭstanoŭka ličylnika (ciapier heta kaštuje kala 160 tysiač rubloŭ, možna s rasterminoŭkaj da šaści miesiacaŭ) akupicca ŭ siarednim za try hady.
Akramia hetaha, čałaviek, jaki maje svoj prybor uliku, aŭtamatyčna ekanomić vadu. Tamu što razumieje: heta vylivajucca jaho hrošy. U Mahiloŭskaj vobłaści raniej za ŭsich surjozna zanialisia ŭstanoŭkaj ličylnikaŭ vady ŭ Babrujsku. Napiaredadni kampanii tam užo vyrašyli budavać novuju śvidravinu, bo horadu nie chapała vady. A ciapier pajšła takaja ekanomija, što nie tolki adpała nieabchodnaść budavać — a možna stavić u rezierv niekatoryja z tych, jakija pracujuć. Pra heta paviedamiła abłasnoje ŭpraŭleńnie ŽKH.
Najbolš blizkija da poŭnaha ŭstalavańnia ličylnikaŭ vady ŭ šmatkvaternych damach sielskija rajony: bolšuju čaść pracy vykanali ŭ Čerykavie, Słaŭharadzie, Mścisłavie, Białyničach i Kličavie. Ale tam i abjomy nieparaŭnalnyja z abłasnym centram i Babrujskam. Zatoje novaja kampanija pa ŭstanoŭcy ličylnikaŭ budzie datyčycca pryvatnaha siektara — tam, dzie vodapravod praviedzieny ŭ damy.
Pavodle apošnich apytańniaŭ, 40 adsotkaŭ nasielnictva — za ŭstanoŭku indyvidualnych praboraŭ uliku vady, prykładna 20 — kateharyčna suprać, a 35% jašče nie vyznačylisia kančatkova. Mienavita apošniuju častku ciapier aktyŭna pierakonvajuć: ustanavicie ličylniki i vučyciesia ekanomić hrošy.
