Arhanizatary «Eŭrapiejskaha maršu» i «Sacyjalnaha maršu» zatrymanyja i dastaŭlenyja... u vyćviareźnik. Uchnalova adpuścili, Ivaškieviča adpravili ŭ sud. Adnak sudździa «adpraviła pratakoł Viktara Ivaškieviča na dapracoŭku». Palityk byŭ vyzvaleny. Kamentar Redakcyi: Vuličnyja manifestacyi zastajucca najbolšym razdražnialnikam dla ŭładaŭ, i tyja nie škadujuć srodkaŭ, kab asłabić ich.
Namieśniki staršyniaŭ Partyi BNF i PKB Viktar Ivaškievič i Valer Uchnaloŭ byli zatrymanyja 25 vieraśnia a pałovie na vośmuju viečara na vulicy Čyrvonaja.
"My ź Viktaram tolki paśpieli vyjści z restaranu "El-Pamidora", što na vulicy Čyrvonaja, jak da nas padjechaŭ aŭtobus z AMAPam. Nam skazali, što my parušajem hramadzki paradak, znachodziačysia niećviarozymi ŭ hramadzkim miescy. Paśla nas zapichali ŭ aŭtobus i advieźli ŭ vyćviareźnik, što na zavułku Instrumentalnym. Na dadzieny momant na nas składajuć pratakoły. Što budzie dalej - niezrazumieła", — paviedamiŭ "NN" Valer Uchnaloŭ.
U kaviarni palityki, siarod jakich byli taksama siabra Partyi BNF Valancina Śviackaja i Vacłaŭ Areška, adznačali dzień naradžeńnia Viktara Ivaškieviča.
* * *
Dziažurny vyćviareźniku a 21:00 paviedamiŭ, što palityki praciahvajuć znachodzicca tam ža. Daktary sprabujuć vyśvietlić, nakolki mocnaja stupień apjanieńnia Ivaškieviča i Ŭchnalova. "Kali jany zmohuć sami iści dadomu, to nichto ich tut trymać nia budzie", - paviedamiŭ dziažurny.
Telefony Viktara Ivaškieviča i Valera Ŭchnalova adklučanyja.
* * *
Pozna ŭviečary stała viadoma, što Valer Uchnaloŭ adpuščany, a Viktar Ivaškievič budzie dastaŭleny ŭ sud, bo ŭ jaho znajšli niekalki ŭlotak da “Eŭrapiejskaha maršu”. Heta stała padstavaj dla składańnia pratakołu za raspaŭsiud ulotak z zaklikam udzielničać u niesankcyjanavanaj akcyi. Hety pratakoł buduć razhladać siońnia ŭ sudzie Pieršamajskaha rajonu.
Valer Uchnaloŭ raskazvaje, što ŭ miedvyćviareźniku palitykaŭ zdymali na videa.
«Kazali, davajcie praviadziem vaš medahlad, raspranajciesia. My admovilisia, bo pakazali b pa telebačańniu i h.d. Pakažuć maje dalary pa adnym, jakija jany raskłali na stale: try dalary pa adnym i piać dalaraŭ. Dumaju, heta było hałoŭnaje».
***
Viktara Ivaškieviča pryvieźli da sudu niedzie paśla dvanaccataj hadziny. Tam jaho ŭžo čakali paplečniki pa partyi Aleksiej Janukievič i Uładzimier Łabkovič, Valery Ŭchnaloŭ, jaki byŭ zajaŭleny ŭ jakaści śviedki, švedzki dyplamat Stefan Eryksan, žurnalisty, pravaabaroncy.
Ivaškievič paviedamiŭ, što noč pravioŭ u pastarunku Pieršamajskaha rajonu, u kamery jon byŭ adzin. Na jaho skłali pratakoł za parušeńnie artykułu 23.34 Administracyjnaha kodeksu "Parušeńnie paradku arhanizacyi i praviadzieńnia masavych mierapryjemstvaŭ".
Pastajaŭšy z hadzinu pad dźviaryma sudu, milicyjant paviedamiŭ, što materyjały spravy pieradadzienyja na dapracoŭku i Viktar Ivaškievič moža być volnym.
ZP
Kamentar Redakcyi.
Ułady vyrašyli jašče raz pakazać dziejačam apazycyi, što sočać za imi. Niama sumnievu, što BT skarystajecca vypadkam, kab pakazać, jak lidery Narodnaha Frontu vypivajuć razam z kamunistami. Takaja voś padrychtoŭka da «Eŭrapiejskaha maršu».
Vuličnyja manifestacyi zastajucca najbolšym razdražnialnikam dla ŭładaŭ, i tyja nie škadujuć srodkaŭ, kab sarvać abo prynamsi asłabić ich.
