Kamunist Valer Uchnaloŭ kaža, što ŭ pastarunku jamu zakinuli razdaču minakam drukavanaha orhanu partyi "z asablivym cynizmam". Uvohule ž vyhladaje na toje, što apazycyja siońnia trochi sapsavała vychodny milicyjantam i "ludziam u cyvilnym".
Siłaviki musili palavać pa ŭsioj krainie na aktyvistaŭ, što razdavali drukavanuju pradukcyju, pryśviečanuju "Sacyjalnamu maršu". A vuličnaj impravizacyi dać rady ciažej, čym šablonnamu šeściu, kali specnazu možna zahadzia stavić dakładnyja zadačy na mapie: blakujcie tut, vyciskajcie adsiul, raśsiakajcie vuń tam! Siońnia ž atrymaŭsia hetaki atamizavany, asymetryčny adkaz na amal što tatalnuju admovu ŭ praviadzieńni zajaŭlenych pa krainie niekalkich socień sacyjalnych pikietaŭ.
Niestandartnyja, decentralizavanyja akcyi asabliva napružvajuć nierazvarotlivuju mašynu siłavych strukturaŭ. Na abvinavačvańni, jak bačym, fantazii zusim užo nie staje:)
Zrešty, što da "asablivaha cynizmu", dyk tut jość racyja. Apazycyja zamachnułasia na śviatoje dla kiroŭnych viarchoŭ — sacyjalnuju rytoryku. I heta sparadžaje naviersie paniku, što vyvieduć sa stojła i ćviordy elektarat!
Analityki spračajucca, ci na tyja lozunhi pastaviła apazycyja. Jość i taki punkt pohladu, što, maŭlaŭ, strata ad skasavańnia lhotaŭ u siarednim čatyroch dalaraŭ na čałavieka našym prykmietna pasyciełym za apošnija hady hramadztvam navat i nia budzie zaŭvažana.
Ale ž, pa-pieršaje, elektarat nadta pryzvyčaiŭsia da paternalizmu (hrubiej kažučy — da durnicy) i chvaravita ŭsprymaje sam precedent zamachu na lhoty, chaj sabie heta j kapiejki. A pa-druhoje, hulnia na sacyjalnym poli apryjory torhaje ŭładu, zvykłuju manapolna zajmać nišu abarony prostaha ludu. Tak što z hledzišča mienavita palityčnaj baraćby ("sacyjałka" tut tolki instrument) namacana bolevaja kropka režymu. Halijaf nervujecca:)
