 |
Sučasny Internet pabudavany na pratakołach, mnohija ź jakich stvoranyja jašče ŭ 60‑70‑ch hadach XX stahodździa. Tady nichto nia moh sabie ŭjavić, što buduć zapatrabavanyja takija chutkaści i abjomy infarmacyi, ź jakimi siońnia pracuje, naprykład tolki adzin Youtube. Struktura pabudovy suśvietnaha Sieciva ŭ peŭny momant moža sutyknucca z techničnymi prablemami. I tamu ŭsio čaściej źjaŭlajucca prajekty i robiacca sproby pabudavać Internet novaha pakaleńnia.
Dniami niekalki vialikich japonskich kampanijaŭ abviaścili, što majuć namier dałučycca da hrupy raspracoŭnikaŭ novaha pratakołu pieradačy dadzienych, jaki, pa mierkavańni ekspertaŭ, moža z časam skłaści kankurencyju pratakołu TCP/IP, na jakim budujecca sučasny internet.
U asnovu novaha Sieciva, jaki prajektujecca Nacyjanalnym instytutam infarmacyjnych technalohij Japonii, pavinnyja lehčy optavałakonnyja kanały z chutkaściu pieradačy dadzienych da 10 hihabit u sekundu. Udzieł u pracy nad prajektam, košt jakoha składaje kala 260 miljonaŭ dalaraŭ, prymuć Fujitsu, Hitachi, Toshiba, NEC i inšyja viadomyja kampanii.
Novaje Sieciva planujecca stvaryć da 2015 hodu, a chutkim časam u Japonii źjavicca jaho pratatyp — kanał z prapusknoj zdolnaściu da 1 hihabita ŭ sekundu.
Dla paraŭnańnia, uvieś źniešni kanał na Internet ź Biełarusi dasiahnuŭ 1 hihabita ŭ sekundu tolki ŭ lutym 2006‑ha.
