Nu i jak vam zajavačka Pucina? Ja maju na ŭvazie zhodu ŭznačalić śpis "Adzinaj Rasiei" dy, imavierna, stać premjeram u sakaviku 2008 hodu.
Maskoŭskija analityki budujuć versyi. Abo, maŭlaŭ, pabyŭšy premjeram, vierniecca u prezydenckaje kresła. Abo prosta pierarobiać kanstytucyju tak, što haspadarom u krainie stanie kiraŭnik uradu. A mo' i ŭvohule pabudujuć systemu a-la SSSR z hiensiekam "Adzinaj Rasiei" na viaršyni piramidy.
Fakt toje, što rasiejskaja demakratyja kančatkova pieratvarajecca ŭ butaforyju. Ale hetym razam biełaruskaja prapahanda naŭrad ci budzie tak užo radavacca, što voś, aha, pierajmajuć naš dośvied stabilnaści! Naadvarot, aficyjnyja medyi apryjory dajuć źjedlivyja kamentary, što "pucinskaja Rasieja maje namier zastavacca pucinskaj". Vyhladaje na toje, što ŭ ajčynnych viarchoch ad perspektyvy dalejšaha kiravańnia Ŭładzimiera Ŭładzimieraviča zusim nie ŭ zachapleńni. "Ciepłynia" asabistych stasunkaŭ miž im dy biełaruskim aficyjnym lideram daŭno jość sakretam Pališynela.
Darečy, chto-kolviek z našych palitolahaŭ praročyŭ, što siońnia my pabačym adzin z etapaŭ aperacyi "Pierajemnik" u Biełarusi. Maŭlaŭ, dziela raskrutki mohuć dać kresła śpikiera Viktaru Łukašenku. Jak vy ŭžo viedajecie, prahnoz pravaliŭsia, vybrana čysta techničnaja fihura.
Biełaruskamu kiraŭniku technalohija pierajemnictva, musić, u pryncypie padajecca niebiaśpiečnaj. Heta Pucin vyhladaje kamandnym hulcom, hatovym da šmatchadovych kambinacyj ź pierapasoŭkaj uładnych paŭnamoctvaŭ. A tut, u nas, davać palityčnyja pasy, badaj što, zanadta ryzykoŭna...
Karaciej, paśla sakavika 2008 hodu źviazka zaklatych siabroŭ Łukašenka — Pucin moža zachavacca, i davoli nadoŭha.
