Praces pa likvidacyi partyi «Nadziei» pačaŭsia 9 kastryčnika. Amal adrazu staršynia partyi Alena Jaśkova vystupiła z sustrečnym pazovam da Minjustu — ab zabieśpiačeńni dziaržaŭnych harantyjaŭ u dziejnaści partyjaŭ. Pazoŭ byŭ padtrymany navat prakuroram Davydoŭskim, ale sudździa vyrašyŭ jaho adchilić.
Ministerstva justycyi na sudzie pradstaŭlaŭ Alaksandar Charyton. Jon spryčyniŭsia da prypynieńnia dziejnaści PKB. Sp. Charyton adrazu vykłaŭ pazycyju ministerstva: «u suviazi sa šmatlikimi parušeńniami zakonu ab partyjach, i niežadańniem ich vypraŭlać «Nadzieja» musić być likvidavanaja».
U pretenzii da «Nadziei» staviłasia toje, što na praciahu doŭhaha terminu partyja dziejničała faktyčna bieź jurydyčnaha adrasu. Pavodle pravierki, jakuju Minjust pravioŭ sioleta ŭ žniŭni, było vyśvietlena, što pa aficyjnym adrasie partyi na vulicy Kazinca,21, korpus 3 znachodzicca nia ofis palityčnaj struktury, a Mižnarodny instytut pracy i sacyjalnych adnosin. Vyklikali pretenzii i rehijanalnyja struktury «žančyn». Na dadzieny momant na ŭliku ŭ Ministerstvie justycyi staić zarehistravanymi tolki 14 z 72 rehijanalnych supołak.
Sp.Charyton paviedamiŭ, što partyja nierehularna padaje ŭ Ministerstva justycyi dadzienyja ab kolkasnym składzie, nia ŭ čas adbyvajucca źjezdy, nie vydajucca členskija bilety, a taksama toje, što «Nadzieja» pravodziła svaju dziejnaść za miežami Biełarusi. Mieŭsia na ŭvazie źjezd «Sajuzu levych partyj», jaki prajšoŭ letaś u śniežni ŭ Čarnihavie (Ukraina). Za toj źjezd «Nadzieja» atrymała papiaredžańnie ad 1 lutaha 2007h.
U materyjałach spravy taksama fihuravała papiaredžańnie 11 lutaha 2005h., za toje, što ŭ partyi niedastatkovaja kolkaść rehijanalnych struktur. Na dumku sp.Charytona, usiaho hetaha było dastatkova, kab likvidavać «Nadzieju». Razam z tym, apošniuju pierarehistracyju partyja «Nadzieja» prajšła zusim niadaŭna — letam 2007 h.
Sudździa Ihar Milto ŭ prysudzie całkam zadavoliŭ pazoŭ Minjusta. Takim čynam, dziejnaść partyi žančyn «Nadzieja» likvidavanaja adrazu paśla ahałošvańnia prysudu. Rašeńnie kančatkovaje i abskardžańniu nie padlahaje.
Staršynia «Nadziei» Alena Jaśkova nazvała prysud niespraviadlivym:
«Sprava mieła vidavočnuju palityčnuju afarboŭku. Dziaržava jak zaŭsiody pastupiła ŭ zvykłaj dla siabie roli. Ja liču, što likvidacyja partyi całkam nie abhruntavanaja. Nam prosta nie davali mahčymaść zakonna dziejničać. Navat za apošni hod my nieadnarazova sutykalisia z admovami ŭ pradstaŭleńni pamiaškańniaŭ dla jurydyčnych adrasoŭ. Zrešty, čakać inšaha vyraku paprostu nie vypadała», — ličyć A.Jaśkova.
Na abviaščeńnie prysudu nie pryjšło nivodnaha palityka ci hramadzkaha dziejača. Tolki žurnalisty.
Nahadajem, što 2 žniŭnia Viarchoŭny sud na šeść miesiacaŭ prypyniŭ dziejnaść PKB, a 29 žniŭnia była likvidavanaja ekalahičnaja partyja zialonych «BEZ».
Čyja čarha nastupnaja?
 Na piarednim planie - staršynia partyi Alena Jaśkova. Za joj byłaja staršynia partyi Valancina Matusievič |
 |
