Siońniašniaja presavaja kanferencyja dla rasiejskich žurnalistaŭ pakinuła ŭražańnie kryzy žanru. Sucelnaje deža-viu: ad abiacańnia nie prapuścić na Maskvu tanki da abvinavačańnia Kramla ŭ niehatovaści da sajuźnictva.
Razam z tym, u zakidach na adras Kramla nie było raniejšaj ekspresii, drajvu, bo, jak afarystyčna zaznačyŭ chtości z rasiejskich palitolahaŭ, čym bolej takich zakidaŭ — tym daražejšy haz.
Naŭrad ci abiacańnie zasłanić Maskvu ad tankaŭ moža kranuć Pucina, Milera ci Vajnštoka. Jak i krytyka "biazhłuzdych" prajektaŭ kštałtu prakładki hazavaj truby cieraz Bałtyku ci naftavaj ad Uniečy da Prymorsku. Kali ŭžo vyrašyli ahinać nienadziejnaha chaŭruśnika, to buduć ahinać usio adno.
Raspovied pra toje, jak aliharchi pryciskajuć bratkoŭ-biełarusaŭ, moža abudzić emocyi chiba što ŭ častki šarahovaha rasiejskaha elektaratu. Ale spačuvalnyja ci kamplimentarnyja publikacyi ŭ marhinalnych abo małatyražnych pravincyjnych vydańniach nia zrobiać revalucyi na infarmacyjnym absiahu vialikaj susiedki. Dyj nia nadta zaraz daduć tamtejšyja hubernatary ŭschvalać u padnačalenaj im presie Łukašenku. Tak što efekt ad zmarnavanych na presavy tur srodkaŭ vielmi prablematyčny.
Sumnieŭna taksama, što impreza zrobić vialikaje prapahandysckaje ŭździejańnie na ŭłasny elektarat. Nu ŭjaviecie sami, jakuju reakcyju vykliča ŭ balšyni viaskovaj aŭdytoryi raspovied pra dajarak z zarobkam 700-900 dalaraŭ. Naŭrad ci buduć z zachapleńniem uspryniatyja i razvahi pra skasavańnie lhotaŭ. "Sacyjałka" sapraŭdy stanovicca kańkom apazycyi (jakoj, darečy, haspadar sustrečy zrabiŭ dobruju reklamu, zaznačyŭšy, što jahonyja palityčnyja apanenty znachodziać padtrymku ŭ samych vysokich kołach rasiejskaha kiraŭnictva).
Nu i, narešcie, asobny mesydž atrymała śviadomaja intelihiencyja. Jana čarhovy raz pačuła, što z rasiejcami my adzin narod, što nacyjanalisty ŭžo byli pry ŭładzie i narabili aby čaho, što my nie adstupimsia ad "vielikoho i mohučieho" chacia b tamu, što biełaruskaj movie brakuje navukovaj terminalohii… I narešcie, stała viadoma, chto zahadaŭ vykinuć sa školnych prahramaŭ "tak zvanych" piśmieńnikaŭ-nacyjanalistaŭ. Kab nia dumali, što heta svavolstva drobnych sošak.
Zrazumieła, što pijar byŭ raźličany najpierš na haściej. Chaj napišuć, jak tutejšaja ŭłada stavić zasłon antyrasiejskim siłam. Ale faktyčna prahučaŭ adkaz tym ajčynnym ramantykam, što čakajuć chutkaj chvali biełarusizacyi źvierchu.
Uvohule ž vysnova nieviasiołaja. Praź 15 hadoŭ niezaležnaści ŭ krainy niama kancepcyi zamiežnaj palityki, stratehii raźvićcia, kaštoŭnasnych aryjentyraŭ. Kali Rasieja prapłocić braterstva — budziem u jaje arbicie. Kali nie — tady lepšym siabram stanie Uha Čaves. U Eŭropu b i radyja, dy hrachi nie puskajuć. Vyhladaje na toje, što aficyjny Miensk budzie i nadalej maneŭravać va ŭsio bolej vuzkim kalidory mahčymaściaŭ.
