Demakratyčnyja siły praviali 14 kastryčnika masavuju manifestacyju za dałučeńnie Biełarusi da Eŭrasajuzu. Manifestanty na čale ź Milinkievičam svabodna prajšli praspektam ad Kastryčnickaj płoščy da Akademii navuk, dzie adbyŭsia karotki mitynh. Dalej hrupa moładzi parušyła scenary ŭłady i apazycyi. Junaki sprabavali prarvacca da Nacyjanalnaj biblijateki i zavajavali prajeznuju častku. Milicyja mieła strohi nakaz abyścisia biez zatrymańniaŭ. Častka manifestantaŭ dajšła da płoščy Banhałor, adnak častka palitykaŭ (Milinkievič, Statkievič) da ich nie dałučylisia. Ahulnuju kolkaść demanstrantaŭ milicyja acaniła na 3500 čałaviek, našy karespandenty — na 7—8 tysiač čałaviek. NN.BY vioŭ žyvy repartaž z manifestacyi. Prapanujem jaho Vašaj uvazie.
Fotarepartaž Julii Daraškievič možna pabačyć tutaka.
Fotarepartaž Andreja Lankieviča možna pabačyć tutaka.
Fotarepartaž Jarasłava Ściešyka i Siamiona Piečanka možna pabačyć tutaka.
Chronika Maršu.
17.15 Arhanizatary Sacyjalnaha Maršu, pryznačanaha na 4 listapada, nie pavinny iści na kampramis z uładami nakont maršrutu akcyi. Heta zajaviŭ namieśnik staršyni Hramady Ihar Rynkievič pa vynikach Eŭrapiejskaha maršu. Sacyjalny Marš zajaŭleny pa maršrucie Kastryčnickaja płošča — Nacyjanalnaja biblijateka. U jahonaj padrychtoŭcy rej viaduć levyja partyi Abjadnanych demakratyčnych siłaŭ. Cikava, ci ŭdasca jahonym arhanizataram sabrać bolej manifestantaŭ, čym na Eŭrapiejski Marš.
17.09 Arhanizavać kalonu ŭ centar z udzielnikaŭ mitynhu na płoščy Banhałor nie ŭdałosia. Navat samaja aktyŭnaja častka moładzi ŭžo zrakłasia hetaj idei. Mitynh patrochu zatuchaje, ludzi razychodziacca, la sceny ich užo zusim niamnoha.
17.02 Žychary stalicy staviacca da manifestacyi ź vialikaj cikavaściu. Typovaja reakcyja: ludzi vychodziać z damoŭ i nazirajuć za demanstracyjaj.
17.00 Udakładnieńnie u raniejšuju infarmacyju. Aŭtamabili pasłoŭ krainaŭ EZ nie supravadžali kalonu na Banhałor. Jany pajechali praspektam da moładzi, jakaja rušyła ŭ bok biblijateki. I paśpieli jakraz u momant, kali kalonu pačali zhaniać z prajeznaj častki da aŭtazakaŭ. Aryštoŭvać manifestantaŭ na vačach u dyplamataŭ nichto nie advažyŭsia.
16.55 Na płoščy Banhałor adbyvajecca impravizavany mitynh — padklučanaja narešcie hukaŭzmacnialnaja aparatura. Da mitynhoŭcaŭ dałučyłasia apošniaja kalona – z hrupy moładzi, što była sprabavała prajści da Biblijateki, a paśla abyšła Park Družby Narodaŭ manifestacyjaj pa prajeznaj častcy. Ich zastałosia kala sotni čałaviek, ale ź vieličeznym – na niekalki dziasiatkaŭ kvadratnych metraŭ – ściaham ES. Jany skandujuć «Na Praspekt» i «Hańba hrantasosam». Vystupaje Nina Jermalinskaja, Salihorsk: “Davajcie nia budziem razychodzicca”. Vital Rymašeŭski zaklikaŭ ustupać u Biełaruskuju Chryścijanskuju Demakratyju. Ihar Rynkievič, namieśnik staršyni BSDP: “Dosyć chadzić na Banhałor, hety sabačnik. Apošni raz siudy pryjšli. Milinkievič pravilna zrabiŭ, što nie pajšoŭ na Banhałor”.
16.47 Natoŭp moładzi, jaki rušyŭ byŭ pa vuł. Bahdanoviča, źviarnuŭ naprava, na vuł. Kulman. «Chadzić pa perymetry Banhałoru, nie zachodziačy na jaho», «pakazać, što my nie baimsia chadzić pa svaim horadzie», — tak maładziony patłumačyli karespandentu svaju novuju ideju.
Z Kulman moładź paviarnuła na Krapotkina. Moładź pa-raniejšamu zajmaje ŭsiu prajeznuju častku vulicy.
16.45 Namieśnik načalnika RUUS – načalnik milicyi hramadzkaj biaśpieki i specyjalnaj milicyi Alaksandar Najdzienka: “Milinkievič moža być pryciahnuty da adkaznaści za zbor udzielnikaŭ EŠ na Kastryničnickaj płoščy. Ale milicyja budzie dziejničać pa abstavinach".
16.42 La Banhałoru praciahvajuć znachodzicca 1 200 — 1 500 čałaviek. Ivaškievič: Akcyja faktyčna skončana, prapanuju razychodzicca. Praz adsutnaść naležnaha abstalavańnia arhanizavać mitynh ci kancert niemahčyma. Sens maršu byŭ u tym, kab prademanstravać inšym ludziam, što ŭ Biełarusi jość tyja, chto chočuć svabody ŭ Biełarusi i niezaležnaści krainy, — paviedamiŭ Ivaškievič.
16.40 Siarhiej Kalakin, lider prypynienaj uładami PKB: “Narmalna siaredniaja akcyja, ničym nie vyłučałasia, ale ni čym nia horšaja. Ździviła i paradavała reakcyja ŭładaŭ, što nikoha nie zatrymlivała i nie źbivała. Heta vidavočna, dadaść bałaŭ biełaruskim uładam u dyjalohu z Eŭropaj”.
16.32 Na padychodzie da płoščy Banhałor aktyŭnaja častka moładzi źviarnuła na vuł.Bahdanoviča i, skandujučy «Ni kroku na bałota!» rušyła da centru.
16.25 Manifestanty dajšli da płoščy Banhałor. Stajać la sceny. Ale, pavodle čutak, adklučana elektryčnaść. Kaža Viktar Ivaškievič: “My zadavoleny, što ludzi pryjšli nie dziela kancertu, a mienavita pryjšli na akcyju. Taksama dobra, što milicyja nie ŭmiešvałasia ŭ akcyju. Nia viedaju dakładna z čym heta źviazana. Mahčyma, sapraŭdy, z uvahaj da ES”.
16.20 Milicyja aceńvaje kolkaść udzielnikaŭ mitynhu la Akademii navuk na 3500 čałaviek. Radyjo «Svaboda» acaniła kolkaść udzielnikaŭ manifestacyi na 10 tysiač čałaviek.
16.17 Na Kastryčnickuju ŭrešcie nichto nie pajšoŭ. Taja častka moładzi, jakaja admoviłasia iści na Banhałor, paprostu zharnuła ściahi i lozunhi dy razyšłasia.
16.09 Hałava kalony dajšła pa Surhanava da vulicy Kujbyšava. Tam ruchajecca niekalki tysiačaŭ čałaviek. Siarod demanstrantaŭ — Vincuk Viačorka.
16.04 Zamykaje kalonu, jakaja źviarnuła na Surhanava, hihancki ściah Eŭrasajuzu. Supracoŭniki DAI znoŭ sprabavali pieraharadzić darohu moładzi – ale kali niekalki čałaviek prosta lehli na asfalt pierad kołami aŭtamabilaŭ DAI, sproby pieraškodzić šeściu spynilisia.
16.03 Bolšaść kalony, jakaja była išła z boku Biblijateki, taksama paviarnuła na Surhanava da Banhałor. Nievialikaja častka jaje spyniłasia i zaklikaje iści na Kastryčnickuju.
16.02 Kalona, što kirujecca ŭ bok Banhałoru, dajšła da Jakuba Kołasa. Iduć amal moŭčki. Z palitykaŭ na čale kalony idzie prafsajuzny lider, były kiraŭnik Partyi pracy Buchvostaŭ.
16.00 Kalona ad Biblijateki padyšła da Surhanava. Ludzi siam-tam vyviešvajuć z balkonaŭ bieł-čyrvona-biełyja ściahi. Jość navat ściah EZ. Adzin maładzion sarvaŭ apladysmenty, uźlezšy ź ściaham EZ na traktar-evakuatar.
15.52 Kalona moładzi, što była išła da Biblijateki, ciapier viartajecca, minaje pomnik Kalininu, ruchajecca da Akademii. Častka manifestantaŭ ad Akademii vyjšła im nasustrač.
15.49 Kalonu, jakaja idzie na Banhałor, supravadžaje kalona mašynaŭ ambasadaraŭ krain EZ.
15.48 Da Milinkieviča padychodziŭ Najdzienka z UUS i prapanoŭvaŭ, jak arhanizataru, uznačalić kalonu, jakaja ruchajecca na Banhałor. Milinkievič admoviŭsia.
15.46 Kolkaść manifestantaŭ, jakija kirujucca ad Akademii navuk pa Surhanava, skaraciłasia da troch tysiač čałaviek.
15.42 Maładziony, jakija rušyli da biblijateki, naležać da Ruchu za Svabodu, Moładzi BNF, Maładoha frontu. Zaraz jany ŭžo ruchajucca praspektam u advarotny bok — da Akademii navuk.
15.37 Bolšaść demanstrantaŭ pačała ruch ad Akademii navuk da vulicy Surhanava. Adnak mnohija skiroŭvajucca ŭ metro, kab raźjaždžacca. Moładź, što vypraviłasia da Biblijateki, tłumačyć svaje dziejańni niežadańniem chadzić na Banhałor.
15.30 Niekalki socień maładzionaŭ skiravalisia praspektam ad Akademii navuk da Nacyjanalnaj biblijateki. Jany zaniali ŭsiu prajeznuju častku. Kala płoščy Kalinina moładź razharnuła vialiki ściah Eŭraźviazu ŭ niekalki metraŭ daŭžynioj. Daišniki, jakija sprabavali źviarnuć ich z prajeznaj častki, byli zakidanyja jajkami. U rajonie parku Čaluskincaŭ jany pierakryli praspekt, ale mašyny prapuskajuć. Za kalonaj ruchajecca niekalki aŭtazakaŭ i mašynaŭ z specnazam.
15.25 Labiedźka ŭ svaim vystupie padziakavaŭ ministru adukacyi Radźkovu za toje, što kožny školnik viedaje pra Eŭrapiejski marš.
15.23Nastupnymi vystupili Milinkievič, Labiedźka, Skrabiec, Statkievič, Viačorka.
15.20 La Akademii navuk pačalisia vystupy. Pieršym vystupiŭ Ivaškievič. Jon zaklikaŭ dalej prajści demanstracyjaj pa vulicy Surhanava, kab jak maha bolej ludziej pabačyli manifestacyju. Adnak na Banhałory mitynhu nia budzie, paviedamiŭ jon, bo ŭ im niama sensu, dyj ułady nie dazvolili zmantavać hukaŭzmacnialnaje abstalavańnie.
15.16 «Za nami Boh, jon daŭ nam dobraje nadvorje», — skazaŭ Milinkievič karespandentu nn.by. Ciarpimaść milicyi jon patłumačyŭ tym, što ŭłady nia chočuć psavać adnosiny z Eŭropaj u taki niapeŭny dla siabie momant, kali nia vyrašanaje pytańnie z cenami na enerhanośbity. «Pa-druhoje, u milicyi taksama šmat zdarovych ludziej, pa-treciaje, nielha niedaaceńvać i nas. My — siła».
15.15 RIA «Novosti» padaje papiarednija źviestki milicyi pra kolkaść uzielnikaŭ Eŭrapiejskaha maršu. Milicyja havoryć pra try tysiačy čałaviek.
15.10Siarod demanstrantaŭ zaŭvažany lider pradprymalnickaha ruchu Makajeŭ z raściažkaj "Svabodu Kazulinu!"
15.08 Rašučyja złučajucca z pamiarkoŭnymi: hałava manifestacyi dajšła da Akademii navuk. Demanstranty dajšli da AkademiiTam hraje muzyka, pieśni z Narodnaha albomu. Šmat kazulincaŭ.
15.07 La chvasta kalony prajechała mašyna ź bieł-čyrvona-biełym ściaham.
15.02 Viktar Ivaškievič vystupiŭ pierad ludźmi, što sabralisia la Akademii Navuk i zaklikaŭ pačakać manifestacyju, jakaja ruchajecca praspektam. Ludzi stajać i słuchajuć biełaruskuju muzyku, jakaja ihraje z kalonak.
15.00 Radyjo "Svaboda": Hałoŭny redaktar hazety “Narodnaja Vola” Iosif Siaredzič paviedamiŭ, što dziela ŭdziełu ŭ “Eŭrapiejskim maršy” admoviŭsia ad prysutnaści na viasielli blizkaj svajački. A adzin spadar uciok sa špitalu z ankalahičnaha adździaleńnia, kab uziać udzieł u akcyi.
14.57 Demanstranty kala płoščy Jakuba Kołasa vyjšli na prajeznuju častku, zajmajuć tratuar i dźvie pałasy ruchu. Kolkaść manifestantaŭ uvieś čas raście. Na traturach stała zusim ciesna. Cichary nia ŭmiešvajucca, tolki filmujuć. Ludzi siadajuć na mašyny DAI i fatahrafujucca.
14.48 Čytačoŭ sajtu nn.by vitaje bard Źmicier Bartosik i jahonaja 4-hadovaja dačka Janina. Jany iduć u manifestacyi pa praspekcie.
14.48 Hałava manifestacyi pierajšła vulicu Kazłova. Niejkija maładyja ludzi, abviešanyja z noh da hałavy symbolikaj, skandujuć: "Vychodzim na praspekt". Ale hetyja namiery marnyja. DAIšniik vyciaśniajuć ludziej nazad. Źjavilisia i pravakatary — babulki, dziadki, rabaciahi, jakija "nie panimajut, što praischodit".
14.45 Demanstranty minuli pomnik Pieramohi. Ad kramy Biarozka demanstranty pasprabavali vyjści na prajezžuju častku. DAI ich viarnuła nazad. Znoŭ sprabujuć viarnucca na praspekt. Znoŭ viartajuć nazad. DAIšnik ad kryku sarvaŭ hołas. U kalonie iduć Milinkievič, Kalakin, Labiedźka, Viačorka. Akramia biełaruskich i eŭrapiejskich, jość taksama ŭkrainskija, anarchisckija ściahi, ściahi z partretam Daškieviča. Kolkaść manifestantaŭ na praspekcie vyrasła da 4—5 tysiač čałaviek. Na traturach stała zusim ciesna. Nad kalonaj taksama raściažki "Biełaruś u Eŭropu!", "Nie - miežam!", "Nie - jadziernaj zbroi", "12 prapanovaŭ ES - u žyćcio!". Natoŭp skanduje "Žyvie Biełaruś!" i "Biełaruś u Eŭropu" — bieź viadomaha praciahu. U hramadzie zaŭvažanyja litaratar Adam Hlobus, skulptar Aleś Šaternik, režyser Valer Mazynski, dyplamat Piotra Sadoŭski, žurnalistka Iryna Chalip, pravaabronca Ina Kulej — žonka A. Milinkieviča, sacyjolah Andrej Vardamacki, paet Siarhiej Zakońnikaŭ.
14.40 Usia placoŭka la Akademii Navuk zapoŭnienaja ludźmi. Kolkaść mitynhoŭcaŭ tut (udakładnienaja infarmacyja) da tysiačy čałaviek.
14.36 Viatryska. Jon vyryvaje ściahi i kidaje na mašyny, što prajaždžajuć pa praspekcie. Kiroŭcy spyniajucca i viartajuć ściahi ludziam. Mnohija kiroŭcy vitajuć syhnałami demanstrantaŭ. Nasuprać uvachodu ŭ Park Horkaha ludzi pierachodziać praspekt, kab pravym bokam iści da Akademii. Na hety momant kalona raściahnułasia ad płoščy Pieramohi da cyrku. Ličbu manifestantaŭ u joj možna acanić na 3000 čałaviek.
14.29 La Akademii Navuk źjaviłasia hrupa ludziej z raściažkaj «Nie dali vizu — kakaja nizosť!». Jany kažuć, što pratestujuć suprać vizavaj palityki režymu Eŭraźviazu ŭ adnosinach da Biełarusi. Pavodle słovaŭ adnaho ź ich, Uładzimiera Ciuchaja, jany «hrupa pa intaresach ź Niaśvižu» i ź nijakaj palityčnaj siłaj nie źviazanyja. U ich aperatyŭna ŭziało interviju BT i jany zharnulisia. Tymčasam mitynhoŭcy ŭklučyli hukaŭzmacnialnuju aparaturu. Usia placoŭka pierad Akademijaj Navuk zapoŭnienaja ludźmi.
14.26Manifestanty skandujuć: “Niezaležnaść!”, “Uładu – narodu!”, “Moładź i svaboda!” i “Žyvie Biełaruś!”
14.22 Kalona spakojna idzie pa chodnikach da Akademii. Zaraz kalona nasuprać cyrku. Milicyi niama. DAI papiaredžvaje, kab nie vychodzili na darohu. Zaraz kalona (2 500 čałaviek) nasuprać cyrku. Milicyi niama. DAI papiaredžvaje, kab nie vychodzili na darohu. Da manifestacyi ŭvieś čas dałučajucca novyja ludzi. Napieradzie kalony z mehafonam idzie Alaksandar Milinkievič. Jon biez halštuka, u švedry.
14.20 Kalona demanstrantaŭ raściahnułasia ad Kastryčnickaj da cyrku. Ludzi iduć pa chodnikach, pa levym baku praspektu.
14.12 Milinkievič zaklikaŭ prajści da Akademii. Kalona z 2 000 čałaviek rušyła ŭ bok Akademii navuk.
14.10 La Akademii hukajuć «Svabodu Kazulinu!». Źjaviłasia i vialikaja raściažka z hetym tekstam. Jaje trymaje Siarhiej Skrabiec. Nacyjanalnych ściahoŭ nad demanstracyjaj bolš, čym ściahoŭ Eŭraźviazu. Manifestanty hukajuć «Žyvie Biełaruś!», «Svabodu Kazulinu!» i prosta «Svabodu!». Źjaviłasia i zdymačnaja hrupa BT.
14.05 Tolki što da hramady na Kastryčnickaj płoščy dałučyłasia hrupa moładzi, kala 50 čałaviek, ź sinimi stužkami i značkami z symbolikaj Eŭraźviazu i lozunham "Naš čas pryjšoŭ", ściahami Eŭraźviazu z słovam "Biełaruś" u kole zorak EZ.
14.00 Na Kastryčnickaj źjaviŭsia Milinkievič i inšy zajaŭnik šeścia — Źmicier Chviedaruk, adzin ź lideraŭ «Maładoha Frontu», vakoł ich sabrałasia pieršaja tysiača manifestantaŭ. Mnoha, vielmi mnoha ściahoŭ — bieł-čyrvona-biełych i eŭrapiejskich.
13.45 La Akademii Navuk źjaviŭsia Viktar Ivaškievič. Jon razharnuŭ ściah Eŭraźviazu. Akcyju filmuje zdymačnaja hrupa, jakaja pradstaviłasia supracoŭnikami kanału RTVI.
13.40 Milicyi pryncypova niama. Stancyi metro «Kastryčnickaja» i «Akademija navuk» pracujuć u zvykłym režymie. Kala metro «Kastryčnickaja» sabrałasia ŭžo kala 200 čałaviek. Źjavilisia zamiežnyja dyplamaty. Prysutničajuć taksama biełaruskija i zamiežnyja žurnalisty. Aŭtobusy № 100 iduć u centar pierapoŭnienyja ludźmi. Jany taksama spyniajucca na Kastryčnickaj.
Siamion Piečanko pieradaje z Kastryčnickaj: Na Kastryčnickuju płošču dostup svabodny, spectechniki pa dvaroch niamnoha, milicyi nie vidać. Choć, naprykład, na vulicy Marksa stajać try pustyja aŭtobusy MAZ ("zakaznoj"), la jakich dziažuryć milicyjant.
Supracoŭnikaŭ milicyi ŭ cyvilnym adroźnić ad manifestantaŭ možna pa admysłovych drocikach racyjaŭ.
Na Kastryčnickuju padjechała mašyna z hukaŭzmacnialnaj aparaturaj. Ludziej vietliva pa-rasiejsku papiaredžvajuć, što mitynh tut nie dazvoleny, a dazvolena na Akademii navuk. La cyrku taksama sabrałasia narodu.
13.00 Demanstracyja abiacaje stać adnoj z najbolšych palityčnych padziejaŭ vosieni. Našy karespandenty znachodziacca na Kastryčnickaj płoščy i la Akademii navuk.
Nahadajem, što arhanizatary manifestacyi majuć namier sabrać ludziej z Kastryčnickaj płoščy z boku pomnika Janku Kupały i cyrku i pravieści ich praspektam da Akademii navuk..
