Narešcie vydałasia časina bolej detalova aznajomicca z apošnim nacyjanalnym apytańniem pad ehidaj NISEPD. Jak, u pryvatnaści, aceńvaje naša hramada "hazavyja vojny"?
Dyk voś, pry ŭsim ščyravańni prapahandy, tolki 25,7% — čverć — miarkujuć, što ŭ enerhietyčnych kanfliktach vinavataja Maskva. 18,4% biełarusaŭ hrašać na svajo kiraŭnictva, a pałova ličać, što i tam, i tam — dobryja cacy.
Jašče adzin cikavy momant: kali padčas zimovaj hazavaj vajny absalutnaja balšynia zrabiła vysnovu, što Łukašenka pakazaŭ siabie mocnym palitykam, dyk paśla žnivieńskaj kryzy (pamiatajecie, kali ciahnuli ryzinu z vypłataj zapazyki?) masa ŭžo nie hatovaja plaskać u ładki. U vyniku tolki 14,7% ličać, što kanflikty z Maskvoj padvysili narodny davier da prezydenta, a voś u 37,8% dumka advarotnaja. (Pryčym hetaje subjektyŭnaje adčuvańnie nie padmanvaje respandentaŭ: rejtynh kiraŭnika dziaržavy sapraŭdy prykmietna spoŭz.)
I, narešcie, apošniaja žmienia ličbaŭ, kab nadta nie hruzić šanoŭnych čytačoŭ:) Siońnia na hipatetyčnym referendumie ŭ pytańni abjadnańnia z Rasiejaj "za" prahałasavali b 33,8%, suprać — 47,4%.
Ja razumieju, što nieciarplivym niezaležnikam chočacca bolej, ale i tak dobra. Jašče nikoli nie było takoj roźnicy na karyść praciŭnikaŭ "bratniaha jadnańnia"!
Pryčym treba ŭličyć, što ŭ hałovach prychilnikaŭ intehracyi — kaša. Šmat kamu z hetaj publiki, musić, zdajecca, što možna być adnoj nahoj u imperyi, a druhoj — u niezaležnaści. Bo pry adkazie na inačaj sfarmulavanaje pytańnie vyśviatlajecca: za poŭnaje źlićcio z Rasiejaj (kali adzin prezydent, adzin ściah, adna valuta, adno vojska i h.d.) — tolki 10%.
Reziume naprošvajecca takoje. Ačmureńnie "bratniaj intehracyi", dziakuj bohu, vyvietryvajecca. Rasieja ŭžo tak nia vabić navat tradycyjna zaryjentavanuju na ŭschod publiku. Pryčym da stvareńnia niepryvabnaha imidžu ŭschodniaj susiedki (razvał, hnijeńnie, nienažernyja aliharchi i navat — vo žach! — kult asoby Pucina:) apošnim časam dobra prykłała ruku aficyjnaja prapahanda. Zrazumieła, najpierš staviłasia meta palepšyć na hetym tle vobraz ajčynnych viarchoŭ jak vysakarodnych zmaharoŭ suprać vierałomnaha Kramla dy tłustych katoŭ z "Hazpromu". Ale elektarat pakrysie staŭ schilacca da vysnovy, što aboje raboje. Zvyčajna heta vielmi ŭstojlivaja vysnova:)
ZY. Dziakuj nieviadomamu čytaču za spasyłku na mocnuju ilustracyju (z adhaźnikami)!
