Razam na Dziady + fotarepartaž Andreja Lankieviča31
Šeście ŭ Kurapaty było masavym i pradstaŭničym. I — zhurtavanym.
Šeście ŭ Kurapaty było masavym i pradstaŭničym. I — zhurtavanym.
A pałovie na adzinaccatuju pobač z hadzińnikavym zavodam sabrałasia kala sotni čałaviek. Ludzi razhortvali znajomyja pa minułych Dziadach transparanty i raściažki, ściahi. Za imi pilna sačyli supracoŭniki milicyi. U zavułku Tałbuchina dziažuryła spectechnika. Padjechała zdymačnaja hrupa BT.
Natoŭp uvieś čas napaŭniaŭsia novymi ludźmi. Šmat chto zaŭvažaŭ, što letaś ludziej było značna mienš. Źjavilisia staršynia Partyi BNF Vincuk Viačorka i jahony namieśnik Viktar Ivaškievič. Apošni paźniej raspavioŭ, što naviedvaje Kurapaty štohod dy adznačyŭ, što ludzi pastupova pazbaŭlajucca strachu, vychodziačy na vulicy stalicy pad svaimi ściahami. Dačka Alaksandra Kazulina Volha z małym synam demanstravała aŭto, što ruchalisia pa praspekcie, partret baćki. Siarhiej Skrabiec trymaŭ raściažku «Svabodu Kazulinu». Pobač byli pradprymalniki, siarod jakich — Alaksandar Makajeŭ.
Na momant, kali šeście rušyła ŭ kirunku Kurapataŭ, kalona naličvała kala tysiačy čałaviek (milicyja acaniła jaho kolkaść udzielnikaŭ na 500 čałaviek; pavodle acenak radyjo «Svaboda» i charter97.org, u šeści ŭdzielničała da dvuch tysiač manifestantaŭ). U hałavie jaje išła Maja Klaštornaja — dačka rasstralanaha paeta Todara Klaštornaha, što lažyć u syroj ziamli niedzie tam, u lesie, razam ź dziasiatkami tysiačaŭ suajčyńnikaŭ. Stalinisty, jak i nacysty, imknulisia vyniščyć elity paniavolenych nacyjaŭ, kab navieki pazbavić ich lideraŭ.
Razam ź usimi ŭ Kurapaty išli palityki Viačasłaŭ Siŭčyk, Ihar Rynkievič, lider moładzi Pavał Sieviaryniec, mastaki Aleś Maračkin dy Mikoła Kupava. Jak i hod tamu, było šmat moładzi. Ušanavać pamiać represavanych ziemlakoŭ pryjšli maładyja palityki i aktyvisty, što prajšli praz turmy za Łukašenkam.
Nad kalonaj łunali nacyjanalnyja ściahi, a taksama partyjnaja symbolika — ściahi abodvuch Frantoŭ, AHP, sacyjał-demakrataŭ, maładafrontaŭcaŭ. Nieśli ludzi i novyja kryžy, vyrablenyja žodzinskim cieślarom sp. Rybkaŭcom. Transparanty i raściažki ŭ rukach demanstrantaŭ papiaredžvali pra niebiaśpieku rasiejskaha imperyjalizmu, patrabavali trybunału nad kamunizmam, nahadvali pra 70-ci hodździe adnaho z samych zmročnych peryjadaŭ u biełaruskaj historyi — stalinskich represijaŭ 30-ch hadoŭ XX st., a taksama pra toje, što nasupierak usiamu — Biełaruś žyvie.
Nie abyšłosia bieź cierciaŭ. Na pierasiačeńni z vulicaj Vałhahradzkaj supracoŭniki DAI nastojliva zahadali pierachodzić vulicu praz padziamielny pierachod. Adzin z arhanizataraŭ šeścia namieśnik staršyni KCHP-BNF Juraś Bieleńki pavioŭ taki ludziej viercham, zapatrabavaŭšy ad DAIšnikaŭ naležnaj arhanizacyi ruchu demanstracyi.
Drobnyja kanflikty na pierachodach vulicaŭ usčynalisia amal da ŭskrainy horadu: demanstrantaŭ uparta spyniali na čyrvonaje śviatło. Supracoŭniki DAI vidavočna padzialili presu na «prykormlenuju» i «čužuju». Tak, staršy lejtenant DAI, jaki nazvaŭsia Dźmitryjem Łajkievičam, zabaraniŭ pryparkavacca fotakarespandentu «NN» pobač z uročyščam, choć pablizu stajała aŭto «Pieršaha nacyjanalnaha telekanału».
Bližej da Zialonaha łuhu pobač z kalonaj źjaŭlacca kupki niećviarozych maładzionaŭ, jakija maciukalisia ŭ bok udzielnikaŭ šeścia. Supracoŭniki ŭ cyvilnym ich «nie zaŭvažali». Prostyja minaki reahavali na šeście spakojna. Maleńki chłopčyk nahadaŭ baćku: «A my bačyli z taboj takija ściahi niadaŭna kala cyrku!». «Nu kolki ŭžo možna tryvać heta!» — hatovaja była pajści za kalonaj pradavačka sadaviny.
Tym časam šeście praciahvała ruch pad śpievy «Pahoni», «U huščarach», «Mahutny Boža» dy inšych patryjatyčnych piesień.
U Kurapatach hramada najpierš zatrymałasia pobač z adnoŭlenym Kryžom Pakuty. Juraś Bieleńki nahadaŭ pra niaspynnyja sproby nieviadomych vandałaŭ źniščyć śviatyniu. U časie mitynhu byŭ začytany zvarot lidera Kanservatyŭna-Chryścijanskaj Partyi BNF Zianona Paźniaka, u jakim toj nahadaŭ: «Mienavita z adkryćcia praŭdy pra Kurapaty pačałosia novaje biełaruskaje Adradžeńnie, jakraz adsiul i z hetaha času pačaŭsia Biełaruski Narodny Front». Adkazny sakratar KCHP-BNF Aleś Čacholski padziakavaŭ usim, chto dapamoh adnaŭlać Kryž dy zaklikaŭ achviaravać srodki na novyja kryžy ŭ Kurapatach.
Pierad adychodam byli ŭstalavanyja pryniesienyja z saboju novyja kryžy. Prysutnych zaprasili pryjści ŭ niadzielu 4 listapada ŭ niadzielu ŭ Łošycki Jar, kab a 12-j hadzinie ŭšanavać pamiać achviaraŭ palityčnych represijaŭ.
Treba adznačyć, što sioletniaje šeście było masavym i pradstaŭničym. I — zhurtavanym. Jak zaŭvažyŭ adzin z udzielnikaŭ šeścia — tolki supolnaje adznačeńnie dataŭ kštałtu Dnia Voli i Dziadoŭ zdolnaje nas abjadnać.
