"Kreml sprabuje pašyryć upłyŭ u kiberprastory", — piša "Vašynhtan post". (Chto nie curajecca pierakładu na imperskuju movu :) — moža zirnuć voś tut.)
Kali koratka, to ŭ artykule abmalavany zachop Sieciva cichaj sapaj. U rasiejskich kiroŭnych viarchoŭ dastatkova rozumu (ci chitraści), kab nia truščyć internet-volnicu abuchom. I da chalery hrošaj. Pry takim, jak u ich, symbijozie palityki ź biznesam možna prosta kuplać raskručanyja resursy i papularnych błohieraŭ. Što j robiać. A potym idzie nibyta stychijnaja chvala spryjalnaha dla Kramla pijaru.
Padčas znakamitaha žnivieńskaha vizytu u "SB" biełaruski aficyjny lider taksama pastaviŭ zadaču idealahičnaj ekspansii ŭ Sieciva. Praŭda, pakul što zruchaŭ nia bačna. Kali nie ličyć frahmentarnych sprobaŭ asobnych metraŭ dziaržaŭnaj žurnalistyki akunucca ŭ virtualny interaktyŭ. Uvohule ž sajty dziaržaŭnych medyjaŭ pa-raniejšamu ŭjaŭlajuć saboj pieravažna ŭbohi pejzaž. Nie čuvać i pra niejkija novyja prajekty. Narešcie, nie zaŭvažna, kab jakiści resurs byŭ zachopleny cichaj sapaj.
Darečy, niejkaja zahadkavaja cišynia supravadžaje pracu admysłovaj hrupy ŭ spravie "ŭparadkavańnia" ajčynnaha ŭeb-sehmentu. Chacia było abvieščana, što vyniki akumulavańnia suśvietnaha dośviedu ŭ hetaj sfery buduć prezentavanyja ŭ siaredzinie kastryčnika.
Zrešty, heta, moža, tolki my z vami nia viedajem? A kamu treba dyk užo ŭsio i prezentavali…
Uvohule ž čuje serca, što mudrahielić u spravie kantralavańnia Sieciva ajčynnaje idealahičnaje načalstva nia stanie. Našto sušyć mazhi nad niejkim chitrym i kreatyŭnym adłupam virtualnym "apam"? Jość zvykłaja technalohija, adpracavanaja na drukavanych ŚMI: zacisnuć tak, kab chiba trochi dychali (na pakaz Zachadu). Tych, chto pad rukoju, u damenie BY, zmusiać rehistravacca (užo filtar!), a zatym stanuć metadyčna brać na cuhundar. Nabor vychavaŭčych srodkaŭ znajomy: papiaredžańni, štrafy, a dla samych niepapraŭnych — "vyšejšaja miera sacyjalnaj abarony", to bok zakryćcio. Tych ža, chto budzie partyzanić z-za miažy, prosta adsiakuć.
Kaniešnie, usio nie zahłušać, ale kryvi stvaralnikam niezaležnych prajektaŭ papsujuć i častkova ajčynnuju internet-žurnalistyku marhinalizujuć.
Pamiatajecie, jak u staroj kamedyi: "Lolik, ale ž heta nieestetyčna!" — "Zatoje tanna, nadziejna i praktyčna!".
