Składajučy śpis pretendentaŭ na zvańnie čałavieka kastryčnika, my sutyknulisia ź vidavočnym niedachopam jarkich asobaŭ, učynki jakich niejak paŭpłyvali na inšych ludziej. Ci heta nie źviazana z sucelnaj dehumanizacyjaj suśvietnych i biełaruskich ŚMI? Štodnia, uklučajučy televizar, my bačym kadry dziasiatkaŭ teraktaŭ, pieražyvajem za razvod u siamji francuskaha prezydenta Sarkazi, čytajem pra Bin Ładena i bitcaŭskaha mańjaka. Razam z tym, my amal ničoha nia čujem pra ludziej, jakija achviarujuć saboj, ratujuć inšych, addajuć kroŭ i ździajśniajuć podźvihi. Heta ŚMI niecikava, i my mała viedajem takich ludziej.
Žanočaja zbornaja Biełarusi pa baskietbole. Našy dziaŭčaty zrabili sapraŭdny furor u Eŭropie, zaniaŭšy na pieršynstvie kantynentu pryzavoje treciaje miesca . Biełaruski jechali ŭ Italiju absalutnymi debiutantkami takich spabornictvaŭ. Tym nia mienš, pieramohšy pa čarzie charvatak, serbak, italjanak, češak i łatyšak, stali bronzavymi pryziorkami. Heta pieršy medal biełarusaŭ u hulniavych vidach sportu za ŭsie hady niezaležnaści. U mienskim aeraporcie dziaŭčat sustrakali jak sapraŭdnych hieraiń. Nacyja choča adčuć siabie kamandaj.
Aleh Łabovič. 31-hadovy inžyner ź Biarozy dabiŭsia, kab jahony syn vučyŭsia ŭ biełaruskamoŭnaj klasie . Aleh Łabovič zaŭsiody hetaha chacieŭ, ale sa ździŭleńniem daviedaŭsia, što ŭ Biarozie niama takich klasaŭ. Sp. Aleh skiravaŭ zvaroty ŭ Kanstytucyjny sud i Hieneralnuju prakuratura, adkul jany byli pieraadrasavanyja ŭ Ministerstva adukacyi, a ŭžo paśla ŭ biarozaŭski adździeł adukacyi. 15 baćkoŭ pieršaklaśnikaŭ siaredniaj škoły №2 h.Biarozy taksama zachacieli, kab ich dzieci vučylisia na rodnaj movie. Prykład Aleha Łaboviča moža natchnić inšych baćkoŭ pa ŭsioj krainie, jakija b taksama chacieli, kab ich dzicia pajšło ŭ biełaruskamoŭnuju klasu.
Źmicier Žaleźničenka. Student-vydatnik Homielskaha dziaržaŭnaha ŭniversytetu imia Skaryny Źmicier Žaliźniečenka praciahvaje zmahacca ź niezakonnym, jak dumaje jon i nia tolki jon, rašeńniem ab adličeńni z VNU. Štohod ź biełaruskich universytetaŭ vyhaniajuć dziasiatki junakoŭ, ale redka chto ź ich navažvajecca baranić svaje pravy. Sioleta heta ŭžo nia pieršy vypadak, spačatku byŭ Juraś Alejnik, ciapier — Źmicier. Ale hierojem miesiacu Źmitra zrabiła inšaja historyja. Žaleźničenka patrabavaŭ u vajenkamacie — zakonnaje prava, tolki mała chto navažvajecca nastojvać, — kab usie pozvy jamu pisali pa-biełarusku. Mienavita za heta ŭ psychijatryčnaj paliklinicy chłopcu pastavili dyjahnaz “reakcyja apazycyi”. Žaleźničenka pierakanany, što ŭ lubym vypadku dabjecca praŭdy.
Artur Fińkievič i Źmicier Daškievič. Historyi abodvuch chłopcaŭ vielmi padobnyja. I adzin, i druhi zaraz znachodziacca ŭ źniavoleńni pa palityčnych artykułach. I na adnaho, i na druhoha synchronna zaviali novyja kryminalnyja spravy. Źmicier Daškievič admoviŭsia davać pakazańni suprać svaich siabroŭ z “Maładoha frontu”. Za heta jamu pahražaje jašče paŭhodu turmy. Śledztva ŭ spravie ŭžo skončyłasia i jaje pieradali ŭ sud. Artura Fińkieviča pry kancy miesiaca źmiaścili ŭ mahiloŭski śledčy izalatar nibyta za parušeńni režymu. Za heta Arturu pahražaje da troch hadoŭ turmy. Daškievič i Fińkievič stali znakami našaha času i biełaruskaj palityčnaj tradycyi.
Zachar Šybieka. Historyk prezentavaŭ svajo novaje vydańnie «Minsk' sto hadoŭ tamu». Sam aŭtar pra knihu vykazaŭsia nastupnym čynam: “Heta kniha pra staronki historyi našaha horadu, jaki prajšoŭ šlach ad šarahovaha hubernskaha horadu Rasiejskaj imperyi da stalicy niezaležnaj dziaržavy. Kniha łučyć usich mienčukoŭ. Jana pra ščaście i hora, pra žyćcio, jakoje viravała tut sto hadoŭ tamu. Asabista ŭ mianie čytańnie hetaj knihi vyklikaje radasnyja i śvietłyja pačućci. Spadziajusia, što takija samyja pačućci jana vykliča i ŭ maich čytačoŭ».
Žyvoje abmierkavańnie vynikła ŭ Redakcyi, ci ŭklučać u śpis pretendentaŭ na tytuł Čałavieka kastryčnika Viktara Ivaškieviča, Alaksandra Łukašenku ci Dzianisa Dzianisava, jakija byli najbolš aktyŭnymi ńjusmejkierami miesiaca. Niekatoryja siabry Redakcyi byli za heta, ale ŭrešcie było vyrašana, što nie.
Hałasujcie, kali łaska, u formie dla apytańniaŭ, źleva na hetaj staroncy.
