U subotu ŭ Miensku prajšoŭ antykamunistyčny forum "U budučyniu biez kamunizmu". Uprava Partyi BNF, kaniečnie, nie pałac kultury MAZ, dzie arhanizataram było admoŭlena ŭ pamiaškańni, ale i tut ź lohkaściu źmiaściłasia kala sotni ŭdzielnikaŭ forumu.
Pierad pačatkam hrała muzyka z “Narodnaha albomu” i pieśni Sieržuka Sokałava-Vojuša. Nad scenaj visieła emblema forumu, na jakoj čałaviečak vykidvaŭ u śmietnicu hierb ź sierpam i mołatam. Delehatam razdavali ŭlotki z paraŭnalnym analizam nacyzmu i stalinizmu. Niechta z najbolš antykamunistyčna nastrojenych udzielnikaŭ mierapryjemstva vysłaŭ darohu ŭ hałoŭnuju zalu śviežym numaram hazety "Tovariŝ".
Praca forumu pačałasia z ahulnaha vykańnia himnu "Mahutny Boža", a taksama aŭdyzapisam kolišniaha vystupu Vasila Bykava pra achviaraŭ kamunistyčnaha režymu.
Pieršym pramaŭlać na forumie pačaŭ namieśnik staršyni Partyi BNF Aleś Michalevič. “U hety samy momant u hateli Biełaruś pačynajecca kamunistyčny źjezd, jaki ładzić biełaruskaja ŭłada. Tamu symbalična, što svoj źjezd my taksama ładzim u hety dzień. Kala 1,5 miljonaŭ biełarusaŭ stali achviarami kamunistyčnych złačynstvaŭ – stalinskija represii, vialikaja ajčynnaja vajna, Čarnobyl, Aŭhanistan. Siońnia kamunistyčnaja idealohija panuje ŭ samych adstałych krainach śvietu, my nia chočam dałučycca da ichniaha śpisu. Kamunizm maje kryvavaje minułaje, šeraje sučasnaje i nia maje budučyni”, – skazaŭ A.Michalevič.
Jašče adzin arhanizatar forumu Pavał Sieviaryniec zaznačyŭ:
“Siońnia kamunisty mohuć źbiracca razam u Miensku tolki z toj metaj, kab pakajacca, ale pakajańnia my ad ich dakładna nie dačakajemsia. My viedajem, što ichny źjezd prachodzić pry začynienych dla niezaležnaj presy dźviarach. Jany sabralisia ŭ Miensku, jak amal sto hadoŭ tamu ŭ domiku la Śvisłačy, kab znoŭ viarnucca siudy. Mnie zhadvajecca historyja z Evanhiella ad Maćvieja, kali zły duch vyjšaŭ z čałavieka. Trochu pabłukaŭšy pa śviecie, jon vyrašyŭ viarnucca ŭ cieła, uziaŭšy z saboj jašče siemiarych duchaŭ navat bolš strašnych za jaho. My nia možam siońnia hetaha dapuścić”.
Ale najbolš prysutnych kranuła historyja pastara Ernesta Sabiły, jaki niekali prajšoŭ praz stalinskija lahiery.
“Paśla vyzvaleńnia ja pracavaŭ budaŭnikom u Miensku. Adzin buldozeryst raskazaŭ mnie historyju, što jon achoŭvaŭ žanočuju zonu. Jakija ździeki pieražyli hetyja žančyny! Ich hvałcili i zabivali prosta za toje, što jany byli zečkami. Adzin z achoŭnikaŭ Chasan zhvałtavaŭ žančynu da śmierci. Paśla jon streliŭ joj u patylicu, kab pakazać, što jana była dyversantkaj. Žančynu tuju pachavali, a Chasanu dali adpačynak. Kali ja čuŭ hetuju historyju, to ruka sama paciahnułasia da łomu. Dziakuj, što Boh nie dazvoliŭ zrabić mnie hety ŭčynak i ja zaraz z vami. U lahiery ja valiŭ drevy, heta była praca dla samych maładych i vynoślivych. Ale navat ź ich nia ŭsie vytrymlivali hetyja ździeki. Šmat chto kłaŭ na pień ruku i adsiakaŭ jaje, kab nie pracavać. Nam patrebna bolš lubić usio našaje, krychu samaarhanizacyi i samadyscypliny, tolki tady my nia budziem bolš apazycyjaj”, – skazaŭ Ernest Sabiła.
Historyk Ihar Kuźniacoŭ prapanavaŭ pakinuć dzień 7 listapada čyrvonym dniom u kalendary. “Čyrvonym, bo pality kryvioj socień ni ŭ čym nie pavinnych achviaraŭ. Navat siońnia 2/3 apazycyjnych palitykaŭ – heta byłyja kamunisty. U nas dźvie kamunistyčnyja partyi KPB i PKB. Adna kaža, što paśla 1917 hodu ŭ nas było ŭsio dobra, druhija – dobra, ale ź niekatorymi pamyłkami. Nivodzin ź siońniašnich kamunistaŭ nie paprasiŭ prabačeńni za tyja złačynstvy”.
Na forumie prysutničali hości z Ukrainy, Rasiei, taksama pryjšoŭ časovy pavierany Českaj Respubliki Ŭładzimier Rumł.
Byŭ siarod haściej forumu i lider AHP Anatol Labiedźka, jaki skazaŭ, što jahonaja pieršaja pieradvybarčaja prahrama na deputactva ŭ Viarchoŭny saviet była całkam napisanaja na antykamunistyčnych pryncypach. Jašče Labiedźka zaklikaŭ pravieści mižnarodny trybunał nad łukašyzmam.
Naprykancy forumu jaho ŭdzielniki była pryniataja rezalucyja "U budučyniu biez kamunizmu".
