 |
 |
 Zdymki BBC |
 Zdymki «Imedi» |
8:05 Nadzvyčajnaje stanovišča pašyrana na ŭsiu terytoryju Hruzii terminam na 15 dzion, usim elektronnym i drukavanym ŚMI zabaroniena źbirać i raspaŭsiudžvać infarmacyju. Vyklučeńnie zroblena tolki dla Hramadzkaj televizii. Meryja Tbilisi ŭvodzić ad siońniašniaha dnia abmiežavańni na pracu hramadzkaha transpartu. Pa zdakładnienych źviestkach Minzdravu na kaniec sierady, u bolnicy byli dastaŭlenyja 508 paciarpiełych, siarod ich — 24 palicyjanty. U 3 vypadkach spatrebiłasia surjoznaje chirurhičnaje ŭmiašalnictva. 414 paciarpiełych paśla akazańnia dapamohi byli adpuščanyja dachaty, — paviedamlaje IA «Novosti-Hruzija».
Z błagasfery:
Aparatura ŭ budynkach [niezaležnych telekamanij] była całkam razhromlenaja, žurnalistaŭ pakłali na padłohu j adabrali mabilnyja telefony pad pahrozaj zbroi, a atrady palicyi raspravilisia ź ludźmi, jakija sabralisia ŭ padtrymku TV-Imedzi. A apazycyjnych lideraŭ — Źvijada Dzydzyhury i Kanstancina Hamsachurdyja — aryštavali. Niajasny los Šałvy Natełašvili.
Napiataść u horadzie paŭsiul. U kramach nasuprać domu, naprykład, pradavački pili valarjanku j hałasili, što za žach dziejecca naŭkoła… Chodziać čutki pra toje, što budzie ŭzbrojeny supraciŭ uradu i navat nia vyklučanaja hramadzianskaja vajna…
Na hety momant u Tbilisi pierakrytyja ŭsie centralnyja mahistrali, abjaŭlenaje nadzvyčajnaje stanovišča j paŭsiul stajać atrady palicyi… Pa TV kruciacca repartažy, jakija kamprametujuć apazycyju, ci ŭvohule neŭtralnyja rečy. Moj siabra, jaki pracuje ŭ Sałałaki (centralny rajon), nia moh pryjechać u Saburtała (inšy centralny rajon), na vulicy patrulnyja atrady nie prapuskali nikoha j pahražali raspravaj. …
U horadzie ruchu niama, metro nie pracuje, śviatła niama praktyčna nidzie, internet pracuje z surjoznymi pierabojami. 
athanatoi
22:05 Michaił Saakašvili ŭvioŭ u Tbilisi nadzvyčajnaje stanovišča. Režym nadzvyčajnaha stanovišča budzie dziejničać 48 hadzin, u hety peryjad ŚMI zabaroniena pieradavać zakliki da vychadu hramadzian na vulicu.
19.35 U pamiaškańnie hruzinskaj apazycyjnaj tele- i radyjokarparacyi "Imedzi" ŭvarvaŭsia specnaz. Dyktary paśpieli pra heta paviedamić u žyvym etery i vykazali nadzieju, što zdolejuć pierajści na nadzvyčajny režym pracy. Ale śledam za hetym viaščańnie pierarvałasia.
Tym časam pačaŭsia mitynh pierad budynkam universytetu ŭ Batumi. Jaho ŭdzielniki patrabujuć pierastać prymianiać siłu suprać demanstrantaŭ u Tbilisi.
18:36 U Tbilisi praciahvajucca sutyknieńni specnazu z prychilnikami apazycyi. Palicyja znoŭ užyła kuli, vadamioty, ślozaciečny haz. Specnazaŭcaŭ zakidali kamianiami.
Akcyja hruzinskaj apazycyi praciahvajecca na novym miescy. Demanstranty źbirajucca ŭ Mietechi, histaryčnym miescy stalicy pablizu staražytnaha chramu Ŭźniasieńnia Baharodzicy, paviedamlaje ŭkrainskaja słužba Radyjo Svaboda.
Ułada i nadalej maje namier zmahacca ź mitynhoŭščykami specyjalnymi zachadami – ślezaciečnym hazam i vadamiotami.
Pavodle roznych krynic, pa dapamohu da lekaraŭ źviarnulisia kala 300 čałaviek, pieravažna tyja, chto dychnuŭ hazu. Lidery apazycyi i na novym miescy zaklikajuć ludziej "nie rabić nivodnaha kroku nazad".
Ułada kvalifikuje svaje kroki suprać apazycyi jak vymušanyja i nastojvaje na tym, što dyjaloh mahčymy tolki tady, kali ŭdzielniki akcyj pratestu razyjducca. Aficyjny Tbilisi zaznačaje, što za akcyjami apazycyi staić Maskva, ułada razhladaje palicejskuju akcyju jak abaronu suverenitetu Hruzii i pravaparadku.
Patryjarch usioj Hruzii Illa Druhi zaklikaŭ uładu i apazycyju sieści za stoł pieramovaŭ. Na dumku kiraŭnika Hruzinskaj pravasłaŭnaj carkvy, unutrany kanflikt vyhadny niadobrazyčliŭcam Hruzii.
Prezydent Hruzii Michaił Saakašvili vystupiŭ z telezvarotam da nacyi. Było, u pryvatnaści, zajaŭlena, što Hruzija adklikaje pasła z Maskvy, a taksama vysyłaje rasiejskich diaplamataŭ z krainy. Prezydent zajaviŭ, što Maskva staić za padziejami ŭ Tbilisi i moža vykarystać c svaich metach palityčnuju napružanaść u Hruzii.
* * *
13.30 Pavodle papiaredniaj infarmacyi, paśla razhonu akcyi pratestu na praspekcie Rustaveli ŭ bolnicy Tbilisi dastaŭlenyja da 200 hramadzian.
U asnoŭnym dyjahnaz — atručańnie. Paciarpiełyja skardziacca na toje, što im piače tvar i ich vanituje, — paviedamlaje Hruzija Online z spasyłkaj na «IntierPriessŃjus».
Tym časam MUS Hruzii śćviardžaje, što haz, užyty dla razhonu apazycyi, nie ŭjaŭlaje niebiaśpieki dla zdaroŭja, — paviedamlaje RIA Novosti
Padraździaleńni specnazu, apranutyja ŭ broniekamizelki j adhaźniki, praciahvajuć vyzvalać praspekt Rustavieli ad mitynhoŭcaŭ i ich prychilnikaŭ. Tym časam u centar Tbilisi praciahvajuć ściakacca natoŭpy ludziej, jakija vyražajuć pratest siłavym dziejańniam uładaŭ. Jak paviedamlaje kanał «Imedzi», hranaty ź ślezaciečnym hazam byli zakinutyja ŭ carkvu Kašveci i ŭ budynak 1-j škoły, raźmieščany pobač z parlamentam, dzie sprabavali schavacca mitynhoŭcy, — pieradaje IA «Novosti-Hruzija»
Siońnia z ranicy prychilniki apazycyi stali znoŭ źbiracca na praspekcie Rustavieli. Kolkaść pratestoŭcaŭ dasiahnuła dźviuch tysiač čałaviek. Pradstaŭniki siłavych struktur zaklikali natoŭp razyścisia. Miž mitynhoŭcami i pravaachoŭnikami ŭsčałasia bojka. Adnačasova ŭ centar Tbilisi pačali ściahvać specnaz i vadamioty. Mitynhoŭcy padniali ruki ŭhoru na znak taho, što ichniaja akcyja mirnaja. Ale paśla pa ludziach stali bić vadoj z vadamiotaŭ. Dadatkova specnaz prymianiŭ ślezaciečny haz. Paśla hetkaj ataki płošča apuścieła.
Z błagasfery:
Aproč hazu nieviadomaha pachodžańnia j dručkoŭ, suprać mitynhoŭcaŭ prymianialisia humovyja kuli.
Niahledziačy na vialikuju kolkaść paciarpiełych. ludzi znoŭ sprabujuć prarvacca na praspekt Rustavieli. Palicyja ich źbivaje.
Na praspekcie Rustavieli ŭ Tbilisi raźmieščanaja aparatura, jakaja hasić syhnały hruzinskich telekampanij. Pra heta paviedamiła telekampanija “Imedzi”, jakaja ŭžo nia moža pieradavać ź miesca padziej. Častkova jana karystajecca žyvymi ŭklučeńniami kampanii SNN. Žyvuju tranślacyju ź mitynhu viaduć taksama VVS j inšyja bujnyja suśvietnyja ŚMI, — paviedamlaje z praspektu Rustaveli błogier Kornelij Glas
Dośvitkam sierady hruzinskaja palicyja vycieśniła ŭdzielnikaŭ akcyi pratestu apazycyi z płoščy pierad parlamentam krainy ŭ Tbilisi.
Pavodle papiarednich źviestak, u časie palicejskaj akcyi byli zatrymanyja niekalki čałaviek, u tym liku adzin z arhanizataraŭ mitynhu i były dziaržministar Hruzii Hieorhij Chaindrava.
Ciapier terytoryju pierad parlamentam kantraluje palicyja.
Apazycyjanery planavali čarhovy masavy mitynh na 12 hadzinaŭ dnia.
Aproč taho, paviedamlajecca, što ŭ sieradu apazycyja planavała pastavić pierad parlamentam Hruzii namiotavaje miastečka.
Mer Tbilisi Hihi Uhułava zajaviŭ, što staličnaja administracyja zabaraniła stavić namioty ŭ centry horadu. Jon udakładniŭ, što ciapier ruch pa centralnaj vulicy Tbilisi — praspekcie Rustavieli — uznoŭleny.
«My pryniali rašeńnie, jakoje ŭhruntavanaje na zdarovym sensie, — pieradaje słovy mera ahienctva Interfaks. — Ciapier specyjalnyja sanitarnyja słužby pravodziać dezynfekcyju terytoryi».
Razam z tym, Uhułava adznačyŭ, što žychary Hruzii majuć prava vyražać pratest «u mirnych formach».
