Maskva praciahvaje hulać z Zachadam u vajskovyja strašyłki. Duma adnahałosna ŭchvaliła prypynieńnie ŭdziełu Rasiei ŭ damovie ab zvyčajnych uzbrajeńniach u Eŭropie. Maratoryj na abaviazki Maskvy ŭ hetaj damovie pačnie dziejničać z 12 śniežnia. Ci ŭciahnuć u hetyja huli Biełaruś?
Siońniašnija "Iźviestija" pišuć, što "nijakich rezkich ruchaŭ z boku Maskvy čakać nie vypadaje. My tolki raźviazali sabie ruki. Zaraz Rasieja moža volna pierahrupoŭvać svaje Ŭzbrojenyja siły ŭ kantekście pahrozaŭ biaśpiecy. Najpierš heta stvareńnie elementaŭ Nacyjanalnaj systemy supraćrakietnaj abarony ZŠA ŭ Polščy i Čechii. Najchutčej, kab ich paryravać, Maskva razhornie aperatyŭna-taktyčnyja kompleksy "Iskander-M" u Kalininhradzskaj vobłaści i Biełarusi".
Zaŭvažcie: pra Biełaruś kažuć tak, nibyta heta ichni rehijon.
Miž tym Miensk užo daŭ zrazumieć, što, nasupierak zvykłamu patasu, pad tanki (vobraz umoŭny) "za tak" kłaścisia nie źbirajecca. Alaksandar Łukašenka na presavaj kanferencyi dla rasiejskich žurnalistaŭ, u pryvatnaści, raskryŭ tajamnicu, čamu dasiul nie padpisanaja damova pra abjadnanuju systemu supraćpavietranaj abarony. Maŭlaŭ, my dali rasiejcam zrazumieć, što heta hrošaj kaštuje. Tak što chaŭruśnictva całkam mierkantylnaje.
Mała chto zaŭvažyŭ, što rasiejski ambasadar Surykaŭ na niadaŭniaj presavaj kanferencyi z hetaje nahody vykazaŭ kiepska prychavanuju kryŭdu. Pačytajcie voś tut.
I jašče: u cieni zastałasia fraza taho ž Surykava pra imaviernuju sustreču Pucina z Łukašenkam u śniežni. Zdavałasia b, našto haspadaru Kramla ŭ fazie "kulhavaj kački" pryznačać randevu z kaleham, da jakoha, miarkujučy pa mnohich symptomach, stavicca, skažam tak, nia nadta ciopła?
Hetaje pytańnie ja zadaŭ našamu palitolahu Andreju Fiodaravu. Na jahonuju dumku, Maskva nie pachavała planaŭ inkarparacyi. Nie vypadkova, padkreślivaje Fiodaraŭ, Pucin padčas naŭprostavaj linii zhadaŭ Biełaruś u tym kantekście, što, maŭlaŭ, intehracyja zaležyć ad pytańnia pra adzinuju valutu.
Na dumku Fiodarava, rasiejski prezydent, rasčyščajučy pad zasłonu aŭhijevy stajni, moža pasprabavać jašče raz vyrašyć "biełaruskaje pytańnie" ŭ pažadanaj dla Maskvy płaščyni. U śniežni akurat naviśnie pytańnie pra košt hazu. Plus kredyt, plus prablemy dvuchbakovaha handlu… Voś i skažuć: abo zdavajsia, abo atrymlivaj usie asałody prahmatyčnych rynkavych dačynieńniaŭ.
Zastajecca trochi pačakać, kab upeŭnicca, nakolki słušnaja hetaja versyja. Asabista ja liču, što anšlus užo nierealny. I navat pad pahrozaj vialikich ekanamičnych prablemaŭ biełaruski kiraŭnik nie ryzyknie dać zialonaje śviatło inkarparacyi. Ci ja zanadta vialiki aptymist?
