Šeść čałaviek byli zatrymany milicyjaj u čas masavaj bojki ŭ homielskim kafe "Krynica", jakoje raźmieščana na praśpiekcie Kasmanaŭtaŭ.
Jak užo paviedamlaŭ BiełaPAN, bojka pačałasia 10 listapada prykładna a pałovie pieršaj nočy. Na toj momant u kafe znachodziłasia 50 čałaviek. Pavodle słoŭ administratara ŭstanovy Natalli Chadanovič, bojka pamiž naviedvalnikami pačałasia z-za taho, što chłopiec udaryŭ dziaŭčynu pa tvary, a jaje siabry zastupilisia za paciarpiełuju.
Adnak adzin ź vidavočcaŭ raskazaŭ BiełaPAN inšuju viersiju: "Za stolikam siadzieła kampanija — vypivali i zakusvali. Paśla chłopcy pajšli pakuryć na vulicu, a za čas adsutnaści za ich stolik sieli inšyja maładyja ludzi, jakija nachabna źjeli i vypili toje, za što nie płacili. Z vulicy viarnulisia haspadary stolika, i pačałasia razborka".
Pavodle słoŭ vidavočcaŭ bojki, spačatku na vulicy vyśviatlali adnosiny kala dziesiaci čałaviek, paśla ŭdzielniki bojki stali zvanić pa mabilnych telefonach svaim siabram i klikać ich na dapamohu. Takim čynam, da pryjezdu na miesca zdareńnia supracoŭnikaŭ departamienta achovy ŭ bojcy ŭdzielničali ŭžo 60 čałaviek.
"Kali chulihany ŭbačyli dvuch supracoŭnikaŭ departamienta achovy, jany pierastali bicca pamiž saboj i nakinulisia na ich, sprabujučy zabrać aŭtamaty. Rabotniki departamienta adkryli ahoń u pavietra, kab choć niejak spynić chulihanaŭ, ale darma — nichto nie adreahavaŭ. Bolš za toje — jany nakinulisia na pravaachoŭnikaŭ i pačali ich źbivać. Supracoŭniki departamienta vyklikali milicyju i chutkuju, i nieŭzabavie kala kafe stajała vosiem mašyn milicyi i adna — chutkaj dapamohi. Šeść začynščykaŭ paboišča zatrymany, astatnija ŭciakli", — raskazaŭ adzin sa śviedkaŭ zdareńnia.
U departamiencie achovy i adździaleńni milicyi Čyhunačnaha rajona Homiela paćvierdzili fakt masavaj bojki i paviedamili, što ciažkich cialesnych paškodžańniaŭ ni chulihany, ni supracoŭniki milicyi ŭ chodzie bojki nie atrymali: miedyki zafiksavali tolki hiematomy i raźbityja nasy. Razam z tym kamientavać zdareńnie ŭ milicyi admovilisia, spasłaŭšysia na toje, što pravavuju acenku masavaj bojcy daść prakuratura.
Žychary susiedniaha z kafe doma paviedamili BiełaPAN, što bojki ŭ "Krynicy" — zvyčajnaja źjava, ale takuju ahresiŭnaść i masavaść klijenty ŭstanovy prajavili ŭpieršyniu.
"Naohuł naš mikrarajon — Sielmaš — ličycca samym kryminahiennym u horadzie, i heta lohka patłumačyć. U savieckija časy na terytoryi mikrarajona raźmiaščalisia try śpieckamiendatury — źniavolenyja budavali hihant pramysłovaści — zavod "Homsielmaš", a paśla jany tut asieli", — prakamientavaŭ adzin z žycharoŭ doma.
