Maskoŭskija medyi ŭžo trubiać: abvieščanyja pastaŭki ŭ Biełaruś rakiet "Iskander" — naš adkaz Amerycy i NATO. Mienavita tak razhladajuć pytańnie rasiejskija hienerały. Praŭda, Miensk pakul što maŭčyć.
Tut treba padkresllić niuans: paśla prodažu hetyja rakiety buduć užo nie rasiejskimi, a našymi. Ich atrymaje na ŭzbrajeńnie vojska suverennaj dziaržavy. Maskva nia moža kamandavać našymi dyvizijonami. I pytańnie ŭ tym, ci skarystaje Kreml inšyja vahary ŭpłyvu, kab uciahnuć Biełaruś u svaje vajskovyja hulni. A taksama — ci zachoča padhulvać Miensk.
Rasieja miakka ściele: zhadała navat pra damovu ab ilhotnych cenach na ŭsio hetaje hrymučaje žaleźzie ŭ miežach ADKB. Karaciej, skidaje nam "Iskandery", ličy, pa sabiekošcie :)
Razam z tym, dla biełaruskaha vojska heta planavaje pieraŭzbrajeńnie. "Iskanderami" zamiest sastarełych "Kropak" miarkujecca pieraŭzbroić (pryčym nia zaŭtra, a ciaham niekalkich hadoŭ) bryhadu pad Asipovičami. Adtul rakieta z radyjusam dziejańnia 280 km ni da Polščy, ni tym bolej da Čechii, dzie pastaviać elementy supraćrakietnaj abarony ZŠA, zrazumieła ž, nie dalacić. Inšaja reč, što heta zbroja na kołach (mienskich ciahačach, darečy). Za adnu noč možna dapiłavać da Bieraścia, kali što...
Voś u hetym "kali što" i zahvazdka. Rasiejski hienerał Zarycki siońnia musiŭ patłumačyć žurnalistam, što vykarystać hetyja rakiety dziela "asymetryčnaha adkazu" amerykancam možna tolki "pry adpaviednych umovach i adpaviednaj pazycyi Biełarusi".
Karaciej, hetyja "Iskandery" — jak ružžo na ścianie. Dalejšaje vyrašajuć nie hienerały, a palityki. I kankretnych palityčnych zajaŭ ad našaha dziaržaŭnaha kiraŭnictva my pakul što nia čujem. Chacia raniej stolki razoŭ rabilisia prazrystyja namioki, što my tut, kaniešnie ž, padstavim plačo, jak ža biaz nas, i ŭsio takoje... Moža, pytańnie "asymetryčnaha adkazu" stanie adnoj z pazycyj vialikaha handlu na mierkavanaj sustrečy Pucina z Łukašenkam u śniežni?
Biełaruskaje kiraŭnictva ŭ abcuhach. Padhulać Rasiei? Tady mohuć, kaniešnie, być niejkija ekanamičnyja źnižki (užo, bač, jak da "Iskanderaŭ" dajšło, dyk i pra siabroŭskija ceny Maskva zhadała!). Ale ž uciahvańnie ŭ "asymetryčny adkaz" aznačaje adnačasna dalejšaje paharšeńnie stasunkaŭ z Zachadam.
A tut Štaty i tak užo zrabili surjozny zvanočak sankcyjami suprać "Biełnaftachimu".
Oj, jość ad čaho baleć hałavie ŭ biełaruskaha kiraŭnictva!
