 Ksienija Avimava |
Na mižnarodnym konkursie błogaŭ The Best of Blogs byli nazvanyja najlepšyja internet‑dziońniki 2007 hodu. Pieramožcam u hałoŭnaj naminacyi «Najlepšy błog» staŭ biełaruski prajekt «Fotahrafamanstva», jaki viadzie karystalnica LiveJournal'a ak-bara — 23‑hadovaja žurnalistka ź Miensku Ksienija Avimava.
«Heta dla mianie prosta placoŭka, dzie ja vykładaju svaje amatarskija fatahrafii», — skazała Ksienija ŭ interviju «Niamieckaj chvali».
Na dumku siabry mižnarodnaha žury Antona Nosika,
«błog 23‑hadovaj biełaruskaj dziaŭčyny, jakaja praz čorna‑biełyja fatahrafii raskazvaje pra žyćcio vakoł jaje, vybrany ŭ tym liku j tymi siabrami žury, chto nie ŭjaŭlaje sabie, dzie znachodzicca Biełaruś — tamu što jon, napeŭna, vielmi ŭciamna pieradaŭ niekatoryja nastroi j śvietaadčuvańni».
Siabra žury z Francyi Žyl Klajn vykazaŭ takoje mierkavańnie:
«Hety błog daje ŭjaŭleńnie pra Biełaruś, krainu, jakaja mała cikavić suśvietnyja ŚMI, bieź niepatrebnaha ŭ dadzienym vypadku tekstu. Ja znachodžu heta asabliva cikavym, bo palityčna nie abciažarany j nahetulki čałaviečny, ciopły pohlad prynosić asablivaje estetyčnaje zadavalnieńnie. Heta prosta praca na dakumentalnym materyjałam. Ja nia dumaju, što za hetymi čorna‑biełymi zdymkami chavajecca niejkaje krytyčnaje pasłańnie. Hladač bačyć prostuju abydzionnaść, ź jejnymi ŭźlotami j padzieńniami, jakaja jość u kožnaj krainie».
U naminacyi, zasnavanaj pravaabarončaj arhanizacyjaj «Reparciory biaź miežaŭ», pieramohu zdabyŭ błog Jotman. Hety błog viadzie daśviedčany aŭtar viadomy jašče pa aśviatleńni padziej 2006 hodu ŭ Tajlandzie. Ciapier błogier zasiarodziŭ svaju ŭvahu na Birmie, dzie ŭ sutyknieńniach z vajennaj chuntaj hinuć mirnyja žychary. Važnaj admietnaściu jość toje, što hety aŭtar zaŭždy viadzie svoj sieciŭny dziońnik naŭprost ź miesca padziei.
Najlepšym ža błogam na rasiejskaj movie byŭ nazvany časapis /dev/karlson/mind.log karystalnika LJ kitya.
Arhanizataram konkursu «The Best of Blogs» vystupiła «Niamieckaja chvala».
I mnie cikava, jak reahujuć inšyja na hety pohlad.
Ksienija Avimava: Ja pracuju žurnalistam u hazecie «Biełarusy i rynak», žyvu ŭ Miensku, mnie 23 hady. Što zaachvociła mianie raspačać błog? Napeŭna, toje, što heta modna. Bahata maich znajomych viaduć błogi, u tym liku j na platformie Livejournal. Mnie stała cikava, i ja vyrašyła zavieści svoj prajekt. Doŭhi čas ja pisała vyklučna dla siabie, a potym mnie zachaciełasia pakazać šmatlikija svaje fatasesii ludziam, kab jany mahli ich acanić i prakamentavać.
— Jakoje miesca zajmaje błog u vašym žyćci?
— Heta dla mianie prosta placoŭka, dzie ja vykładaju svaje amatarskija fatahrafii. Badaj, heta majo chobi. Heta daje mnie stymuł dla taho, kab ja fatahrafavała. Dumaju, tak usio zastaniecca i ŭ budučyni. Ja chaču fatahrafavać lepiej i spadziajusia, što siarod čytačoŭ majho błoga znojdziecca jaki‑kolviek krytyk, jaki zmoža mnie paraić, što treba zrabić dla taho, kab maje fatahrafii byli lepšymi. Heta było b fajna.
Dahetul krytyčnych kamentaroŭ było vielmi mała. Ja nia viedaju, čamu. Aproč taho, mnie cikavaja reakcyja ludziej na maje fatahrafii, heta moj pohlad na śviet. I mnie cikava, jak reahujuć inšyja na hety pohlad.
— Ci źviazany jakim-niebudź čynam hety błog z vašaj prafesijaj?
— Chutčej, heta niejak źviazana z tym, kim ja chaču być. Ja chaču być fotakarespandentam, i błog dla mianie — heta prosta placoŭka dla treniroŭki. Ja tekstavy žurnalist, ale chaču pamianiać svaju specyjalizacyju. To bo heta źviazana z maimi prafesijnymi pamknieńniami.
— Zapisy ŭ vašym błogu supravadžaje vialikaja kolkaść kamentaroŭ. Čym vy heta tłumačycie?
— Ja dumaju, što moj błog uvachodzić u častku takoj nievialikaj sacyjalnaj sietki, jakaja davoli prychilna stavicca da svaich udielnikaŭ. Ja nie sustrakaju ŭ svaim błogu chamskich kamentaroŭ, jak heta byvaje ŭ mnohich inšych. Ludzi, jakija čytajuć moj błog, vidać, prosta cikaviacca tym, što ja rablu, cikaviacca mnoju jak čałaviekam.
— Dzie jašče publikujucca vašyja fatahrafii? I dzie vy ich publikavali raniej, da źjaŭleńnia błogaŭ?
— Siem hadoŭ tamu ja pisała repartaž pra adzin kancert i prapanavała ilustravać jaho svaimi fatahrafijami. Jany byli apublikavanyja, ale heta było vielmi daŭno, i paśla hetaha ja bolš nie drukavałasia jak fotažurnalist.
— Čamu vy vybrali platformu Livejournal?
— U Biełarusi heta samaja papularnaja platforma dla darosłych błogieraŭ, ja maju na ŭvazie ludziej u vieku 18 hadoŭ i starejšych. Bahata jakija maje znajomyja karystajucca hetaj platformaj.
— Ci čytajecie vy sami inšyja błogi? Chto vašyja ŭlubionyja błogiery?
— Tak, u mianie jość frend‑stužka. Mnie vielmi padabajucca raskazy aŭtara błogu «7 karoŭ» — taksama na platformie Livejournal. Mnie padabajucca fatahrafii ŭ błogu «365 dzion u hodzie», jahonaja kancepcyja padobnaja da kancepcyi majho błogu: kožny dzień aŭtar vykładaje pa adnoj fatahrafii, jakuju jon zrabiŭ u hety dzień. Čytaju j inšyja błogi.
— Ci isnujuć jakija‑niebudź admietnaści, ułaścivyja błagasfery ŭ Biełarusi?
—Tak, u nas vielmi mała niezaležnych hazet i internet‑platformaŭ, dzie možna vykazać svojo punkt hledžańnia, i vielmi mnohija błogiery — mienavita darosłyja ludzi, jakim bolš za 20 hadoŭ — viaduć błogi. Vielmi časta hetyja błogi — palityzavanyja. Viaduć błogi na platformie Livejournal i niekatoryja apazycyjnyja palityki, kab vykazać svoj punkt hledžańnia j pryvabić patencyjnych prychilnikaŭ.
