Kremer: «Kaznačejstva ŭ supracoŭnictvie ź Dziarždepartamentam zamaroziła majomaść «Biełnaftachimu» i jahonaha pradstaŭnictva ŭ ZŠA . Heta zroblena ŭ adpaviednaści z zahadam prezydenta ZŠA №13405, vydadzienym 19 červienia 2006 hodu. Hety zahad praduhledžvaje miery adnosna asobaŭ, jakija padryvajuć demakratyčnyja pracesy ŭ Biełarusi i jakija majuć dačynieńnie da palityčnych represij i karupcyi.
Ja chaču, kab było jasna: hety krok byŭ zrobleny sa škadavańniem. Ale, na našu dumku, režym Łukašenki nia daŭ nam inšaha vybaru. My vielmi jasna kazali, što my zacikaŭlenyja ŭ palapšeńni adnosinaŭ ź Biełaruśsiu i ź biełaruskim uradam, ale my hetak ža niedvuchsensoŭna davali zrazumieć, jakija minimalnyja kroki pavinien zrabić biełaruski bok, kab palepšyć adnosiny z Zachadam.
Ale my hetych krokaŭ biełaruskaha boku nie ŭbačyli. Kali ja byŭ tam u krasaviku, ja vielmi jasna im skazaŭ, što cana, jakuju jany buduć vymušanyja zapłacić, kali jany nia vypuściać usich palityčnych viaźniaŭ, budzie vysokaj.
Heta nievialikaja hrupa ludziej, ale kožny ź ich važny. I pakul jany nia vyzvalenyja, ja sa škadavańniem kažu, što my budziem vymušanyja rabić takija kroki».
Karespandent: «U paviedamleńni pra ŭviadzieńnie sankcyj utrymlivajecca spasyłka na letašniaje rašeńnie prezydenta ZŠA ab zamarožvańni finansavych srodkaŭ kiraŭnikoŭ biełaruskaj ułady, Vy zaraz padćvierdzili heta. Adnak «Biełnaftachim» — dziaržaŭnaje pradpryjemstva, heta nie pryvatnaja ŭłasnaść spadara Łukašenki. U čym palahaje jurydyčnaje abhruntavańnie hetaha rašeńnia?»
Kremer: «Jurydyčnaj asnovaj dla hetaha rašeńnia źjaŭlajecca kantrol, jaki Łukašenka maje nad «Biełnaftachimam». Jahonyja ŭłasnyja kamentary na hety kont dapamahli nam pryniać takoje rašeńnie».
Karespandent: «Biełaruski MZS zajaviŭ, što ŭviadzieńniem sankcyj adnosna «Biełnaftachimu» ZŠA parušyli memarandum ab harantyjach biaśpieki ŭ suviazi z dałučeńniem Biełarusi da Damovy ab nieraspaŭsiudžvańni jadziernaj zbroi ad 5 śniežnia 1994 hodu. U im Złučanyja Štaty ŭ adkaz na admovu krainy ad vałodańnia jadziernaj zbrojaj abaviazalisia nie ŭžyvać da Biełarusi miery ekanamičnaha prymusu ŭ metach padparadkavańnia Biełarusi intaresam ZŠA. Što Vy možacie skazać nakont hetaj arhumentacyi biełaruskaha boku?»
Kremer: «My dobra viedajem hetaje pahadnieńnie i ličym, što my prytrymlivajemsia jaho pałažeńniaŭ. Mova idzie nia tolki pra intaresy Złučanych Štataŭ, a pra intaresy mižnarodnaj supolnaści. Ja padkreślu ŭ adkaz, što Biełaruś parušaje Chelsynskija pahadnieńni, parušaje svaje abaviazki siabra ABSE. Nastaŭ čas, kab Biełaruś pačała dziejničać, jak hodny siabra ABSE».
Karespandent: «Ci jość u Złučanych Štataŭ varyjant dziejańniaŭ, kali Biełaruś u adkaz na rašeńnie ZŠA aryštuje ŭ Biełarusi rachunki amerykanskich pradpryjemstvaŭ, jakija pracujuć u hetaj krainie?»
Kremier: «Davajcie pryhadajem, jak heta było — krok za krokam. My abnarodavali hety krok. Niekalki miesiacaŭ tamu my značna pašyryli śpis asobaŭ, jakim zabaronieny ŭjezd u ZŠA. Pakul davajcie spynimsia na hetym. Kali biełaruski bok vyrašyć zrabić niejkija kroki ŭ adkaz, my budziem reahavać na ich».
Karespandent: «U interviju našamu radyjo na minułym tydni Vy skazali, što amerykanski ŭrad dziejničaje pa dvuch linijach — ciśnie na biełaruski ŭrad i padtrymlivaje demakratyčnyja siły. Ale ci nia mohuć sankcyi adnosna «Biełnaftachimu» paškodzić hetaj druhoj zadačy — dyskredytavać demakratyčnyja siły Biełarusi ŭ vačach naroda, u pryvatnaści, u vačach tych 120 tysiač čałaviek, jakija pracujuć na pradpryjemstvach «Biełnaftachimu»?»
Kremier: «Krok, zrobleny na hetym tydni, byŭ krokam uradu ZŠA. Heta nie było zroblena u vyniku kansultacyj ź biełaruskaj apazycyjaj, my nie pytalisia ŭ ich parady ci zhody, jany nia mieli z hetym krokam ničoha supolnaha. My zrabili heta, kab prademanstravać biełaruskim uładam surjoznaść našych namieraŭ, pakazać im, što jany musiać zapłacić vysokuju canu za svaje dziejańni.
Mnie bolš chaciełasia b havaryć z vami pra sposaby, jakimi my mahli b palepšyć adnosiny, i heta absalutna mahčyma, kali buduć vyzvalenyja ŭsie palityčnyja viaźni. Na žal, urad vyrašyŭ, što jon nia budzie heta rabić. I ŭ vyniku my zrabili hety krok i raniejšyja kroki.
Naša meta — nie stvarać ciažkaści dla biełaruskaha nasielnictva, naadvarot, Złučanyja Štaty — vialiki siabra biełaruskaha narodu. Naša prablema — z režymam, jaki admaŭlajecca prytrymlivacca normaŭ i standartaŭ ABSE i inšych demakratyčnych krainaŭ».
Karespandent: «Amerykanskaje pasolstva ŭ Biełarusi patłumačyła, što sankcyi nie źjaŭlajucca preventyŭnaj mieraj suprać biełaruskaha prajektu zdabyčy nafty ŭ Venesuele. Adnak, u suviazi z zamarožvańniem rachunkaŭ «Biełnaftachimu» ŭ ZŠA, ci robicca niemahčymym prodaž zdabytaj Biełaruśsiu ŭ Venesuele nafty ŭ Złučanyja Štaty?»
Kremer: «Biezumoŭna hety krok nie źviazany ź dziejańniami albo adnosinami, jakija Biełaruś maje z Venesuełaj. Ale jaki budzie upłyŭ , nastupstvy hetaha rašeńnia, my jašče pabačym. Pakul zaŭčasna spekulavać, ci paškodzić heta planam i dziejańniam biełaruskich uładaŭ što da venesuelskaha prajektu».
Karespandent: «U kastryčniku i listapadzie ŭ Biełarusi prajšli dźvie masavyja akcyi apazycyi — Eŭrapiejski marš i Sacyjalny marš. Ułady dali na ich dazvoł, padčas hetych akcyj, u adroźnieńni ad papiarednich, nie było zatrymańniaŭ ich udzielnikaŭ. Ci zaŭvažyli Złučanyja Štaty hetaje peŭnaje źmiakčeńnie pavodzinaŭ biełaruskich uładaŭ, ci paŭpłyvała heta na pazycyju ZŠA?»
Kremer: «Zatrymańni adbyvalisia napiaredadni maršaŭ, ułady dziejničali preventyŭna, a nia tak, jak raniej. My heta zaŭvažyli. Adnak nielha stavić dobryja acenki krainam za toje, što jany tolki nia robiać drennych rečaŭ. Padčas hetych dvuch maršaŭ režym pavodziŭ siabie tak, jak i pavinna pavodzić siabie dziaržava. I toje, što jany nie rabili kiepskaha, nia jość padstava, kab ich uznaharodžvać.
Skasavać drennyja rečy, zroblenyja ŭ minułym — vyzvalić palitviaźniaŭ, voś heta byŭ by krok, jaki my zaŭvažyli b i na jaki b vielmi pazytyŭna adreahavali.
U śpisie palitviaźniaŭ zastałosia 6‑7 asobaŭ, bo termin pakarańnia niekatorych skončyŭsia i jany byli vyzvalenyja. Śpis karotki, i my chočam, kab usie jany byli vyzvalenyja, i my zasiarodžvajem uvahu na hetym. My zaŭvažyli, što byli dadzienyja dazvoły na hetyja maršy, heta pazytyŭny krok , ale heta nia toj krok, jaki režym pavinien zrabić, kab ubačyć palapšeńnie ŭ adnosinach»
