Toje, što na čale "Biełaj Rusi" siońnia pastavili Radźkova, paćviardžaje majo mierkavańnie: prajekt hety nia ŭdarny, a — tak, pavodle pryncypu "ŭ haspadarcy j heta nie zaškodzić".
Nakolki nie vyklikaje sumnieńniaŭ haračaja addanaść ministra adukacyi tamu, kamu abaviazany karjeraj, nastolki ž vidavočna, što pra palityčnuju charyzmu tut kazać nie vypadaje. Siońnia, darečy, adpała versyja, što "BR" uznačalić Viktar Łukašenka.
Kaniešnie, Radźkova jak pastavili, tak i adsunuć mohuć u lubuju chvilinu. Sam jon miž tym zasłupavaŭ siońnia mahčymaść navastvoranaj struktury pieratvarycca ŭ partyju.
Ale patas mierapryjemstva navodzić na dumku, čto lepiać hetki BRSM dla starejšych. Metaj jość, kažučy movaj savieckich funkcyjaneraŭ, "achop členstvam". Chaj sabie tyja farmalnyja čalcy podźvihaŭ u imia Łukašenki nia ździejśniać, ale buduć jak minimum adčuvać, što paviazanyja dadatkovaj adkaznaściu. Šmat u kaho zastalisia adpaviednyja refleksy časoŭ SSSR, tak što buduć družna chadzić na subotniki dy płacić unioski. Maładziejšych ža mohuć pryvabić peŭnymi pryvilejami: bilet čalca peŭna ž nadaść šancaŭ karjery, plus roznyja tam dyskontnyja kartki, usio takoje…
"Partyja" — ad łacinskaha "častka". Kolki b ni beścili abjadnanuju apazycyju za sproby skryžavać vuža z vožykam, ale ŭsio ž PKB ad BNF za viarstu adroźniš :) Partyja zaŭždy pazycyjanuje siabie jak vyraźnica intaresaŭ peŭnaj častki hramadztva.
Na siońniašnim ža schodzie ćvierdzili pra nieabchodnaść abjadnać pradstaŭnikoŭ roznych słajoŭ, sacyjalna zhurtavać usio hramadztva. A idealohija zvodzicca da savieckaha trafaretu: "Usie jak adzin…" (dalej idzie toj ci inšy varyjant mabilizacyjnaj formuły — "vyjdziem na subotnik", "skažam "nie" planam imperyjalizmu", "prahałasujem za kandydataŭ nieparušnaha bloku...") .
Darečy, "BR" całkam moža ŭdzielničać u vybarčych kampanijach i pry ciapierašnim statucie. Voś vam hatovaja rezerva kadraŭ dla vyłučeńnia ŭ akruhach dy kamplektacyi roznych tam vybarkamaŭ!
Što ž da pieratvareńnia ŭ klasyčnuju partyju ŭłady, to hety varyjant trymajecca ŭ hałavie chiba na ŭsialaki pažarny.
Łukašenka dobra viedaje canu takim "bajavym avanhardam" na prykładzie dehradacyi KPSS.
Zvyš taho, paŭtara dziesiacihodździ nazirańniaŭ za palityčnym stylem hetaha dziejača dajuć padstavu mierkavać: jon nia z tych, chto razahnaŭsia b dzialicca ŭładaj navat z partyjaj ułady.