 Mikałaj Čarhiniec |
 Alaksandar Tamkovič |
Staršynia pałaty pradstaŭnikoŭ pa nacyjanalnaj biaśpiecy Mikałaj Čarhiniec budzie sudzicca z žurnalistam Alaksandram Tamkovičam i pryvatnym pradpryjemstvam «Vriemia novostiej», jakoje vydaje niedziaržaŭnuju hazetu «Novy čas».
Jak paviedamiŭ Chartyi'97 šef‑redaktar hazety «Novy čas» Alaksiej Karol, Mikałaj Čarhiniec paličyŭ, što artykuł «Hienerał‑senatar Mikałaj Čarhiniec» nanios škodu jahonamu honaru, hodnaści i dziełavoj reputacyi. Škodu jon acaniŭ u 600 miljonaŭ rubloŭ, jakija praz sud źbirajecca spahnać z žurnalista (100 miljonaŭ) i vydaviectva (600 miljonaŭ).
Pa słovach A. Karala, Čarhinca najbolš abraziła toje, što ŭ artykule ŭzhadvajecca epizod pra jaho datyčnaść da hučnaj «viciebskaj» spravy 80‑ch hadoŭ. Aŭtar natatki śćviardžaje, što Čarhiniec moh panieści adkaznaść za chiby toj spravy, ale nibyta paźbieh jaje, pajechaŭšy ŭ Aŭhanistan, i navat staŭšy tam hierojem. Taksama hnieŭ senatara vyklikała śćvierdžańnie, što dziela napisańnia svaich ramanaŭ jon karystajecca pracaj «litaraturnych niavolnikaŭ».
Sudovaje raźbiralnictva pačniecca 5 śniežnia ŭ Pieršamajskim sudzie.
U razmovie z karespandentam «NN» Alaksandar Tamkovič raspavioŭ, što jaho ŭžo pačali žartam nazyvać samym darahim žurnalistam Biełarusi:
«Nasamreč pahladzicie — Pralaskoŭski zapatrabavaŭ ad «Narodnaj voli» ŭ 25 razoŭ mienš, čym z «Novaha času». «Liču, što Čarhiniec pastupiŭ nie pa‑mužčynsku, kali jon, hienerał, zapatrabavaŭ ad invalida takuju sumu. Kali ž jaho zadavolać zakonnyja 20% ad majoj pensii ŭ 320 tysiačaŭ, to — kali łaska» — zaznačyŭ jon.
Žurnalist kaža, što nie čakaŭ takoha raźvićcia padziejaŭ. Faktyčna hienerał sudzicca z samim saboj, bo ŭsio, što vyklikała jahonaje abureńnie i rašučaść uzbahacicca za moj košt było, ja ŭziaŭ ź jaho bijahrafii na jahonym ža sajcie, dy šmatlikich interviju dziaržaŭnym medyjam, ćvierdzić sp. Tamkovič. Cytata pra «litaraturnych niavolnikaŭ» vyklikaje nia mienš ździŭleńnia, patłumačyŭ aŭtar artykułu, bo ŭ tekście napisana litaralna nastupnaje — «čutki pra «litaraturnych niavolnikaŭ» pakiniem biez uvahi».
5 śniežnia žurnalist padaść sustrečny pazoŭ na adras Čarhinca. Nieŭzabavie paśla vychadu artykułu «Hienerał‑senatar Mikałaj Čarhiniec», adkazvajučy na pytańni «Ježiednievnika» senatar nazvaŭ A. Tamkoviča «nieadekvatnym». U žurnalista jość zapis toj repliki.
Alaksandar Tamkovič kaža, što ŭ lubym razie damožacca spraviadlivaści: «Ułada i jaje pravasudździe niaviečnyja, a takija spravy nia majuć terminu daŭnaści».
Na jaho dumku, vielmi symbalična, što sprava suprać jaho i vydaviectva raspačałasia adnačasova z adkryćciom Ch Mienskaha forumu, na jakim prahučała vykazvańnie, što ŭłada padaje hramadztvu niachaj i cichija syhnały.
