Viečaram u piatnicu adbyłosia pasiedžańnie mienskaj haradzkoj arhanizacyi Partyi BNF. Udzieł u pasiedžańni ŭziali ŭsie troje kandydataŭ na pasadu staršyni Partyi – Vincuk Viačorka, Viktar Ivaškievič i Aleś Michalevič. Vioŭ pasiedžańnie kiraŭnik mienskaj haradzkoj arhanizacyi Alaksiej Kavalec.
Kožny z kandydataŭ mieŭ nievialiki dziesiacichvilinny vystup, paśla čaho prysutnyja mahli zadać im svaje pytańni. Sojm pačaŭsia z pryjemnaj naviny, što była narešcie zarehistravanaja viciebskaja abłasnaja arhanizacyja Partyi BNF.
Vincuk Viačorka skazaŭ, što nastupny hod stanie hodam abarony biełaruskaj niezaležnaści.
“Naleta najbolš mahutna i aktualna zahučać niezaležnickaja ideja. Dla Partyi pryjšoŭ čas umacoŭvać svaje pazycyi ŭ krainie i za jaje miežami. Ja nie chacieŭ, kab heta čuli pradstaŭniki ŚMI, ale ładna. U adnym bujnym horadzie Bieraściejščyny mnie skazali, što realnych siabroŭ BNF u horadzie zastałosia try čałavieki. Našy prychilniki pavinny dałučycca i viarnucca ŭ Partyju – heta pieršasnaja zadača na nastupny hod. Naleta da 90-hodździa BNR my planujem pravieści forum “Za niezaležnaść”, jaki budzie mieć mnostva panelaŭ i sekcyj. Pakul ja źjaŭlajusia staršynioj BNF, harantuju, što Partyja zastaniecca sapraŭdy niezaležnaj”, – skazaŭ V.Viačorka.
Viktar Ivaškievič zasiarodziŭsia na prablemie eŭrapiejskaj intehracyi i parlamenckich vybaraŭ.
“Naša pamyłka iści na vybary biez peŭnych patrabavańniaŭ ad ułady. Kali jany chočuć, kab my išli na vybary i stvarali fasad demakratyčnaści, to treba nastojvać na vyzvaleńni palitviaźniaŭ, viartańni ŭ šapiki i padpisku niezaležnych hazet, spynić pieraśled niedziaržaŭnych arhanizacyj. Asabista ja liču amaralnym iści na parlamenckija vybary, kali siadzić Daškievič i Fińkievič. Treba arhanizavać šyroki ruch za dałučeńnie krainy da Eŭrasajuzu. Razam z tym, eŭrapiejskuju tematyku nieabchodna źviazvać i z sacyjalnaj. Eŭrapiejski ściah sioleta abaraniŭ nas ad dubinak AMAPu. Nam treba palavyja kamandziry, jakim my budziem davać kankretnyja i zadačy, i čakać ich vyrašeńnia. U Froncie siońnia mała ludziej, jakija zdolnyja niestandartnyja ŭčynki i rašeńni”, – ličyć V.Ivaškievič.
Aleś Michalevič havaryŭ pra ahulnuju nacyjanalnuju kaalicyju.
“Ja ŭstupiŭ u BNF u 1993 hodzie, kali Partyja mieła jasnuju prahramu. Siońnia jaje niama. Ludzi pomniać brend BNF chutčej pa inercyi, a nie dziakujučy nam. Kali ja stanu staršynioj, to najpierš adnaŭlu vychad partyjnaj hazety. Pačnu masavy vypusk infarmacyjnych materyjałaŭ, kab danieści ludziam alternatyŭnuju dumku. U Biełarusi nie takaja drennaja sytuacyja, kab mianiać Łukašenku na kaho papała. Patrebnaja šyrokaja nacyjanalnaja kaalicyja z udziełam Paŭła Sieviarynca, Viačasłava Siŭčyka, KCHP-BNF, ruchu “Za svabodu”, pradprymalnikaŭ, katalickich i pratestanckich aktyvistaŭ, moładzi, rabočych vialikich pradpryjemstvaŭ. Tolki ŭ takim vypadku my pakažam ludziam alternatyvu”, – miarkuje A.Michalevič.
Vincuk Viačorka, adkazvajučy na pytańni skazaŭ, što nia budzie zastavacca ŭ kiraŭnictvie Partyi, kali pieramoža Aleś Michalevič. “Ja nie mahu stanavicca zakładnikam nieviadomaj mnie palityki”, – skazaŭ jon. Viktar Ivaškievič paabiacaŭ, što ŭ vypadku jahonaj pieramohi pasady namieśnikaŭ buduć prapanavanyja, jak Michaleviču, tak i Viačorku. U svaju čarhu Aleś Michalevič paviedamiŭ, što niezaležna ad vynikaŭ źjezdu z Partyi jon nikudy nie sydzie.
Alaksiej Kavalec taksama paviedamiŭ, što ŭsie mienskija hateli pakul admaŭlajucca pradstavić miescy dla delehataŭ źjezdu. Pakul miarkujecca, što rehijanałaŭ raźmieściać pa damach mienskich aktyvistaŭ Partyi.