U toj čas, kali šerah biełaruskich rok‑muzykaŭ mieli sustreču ŭ administracyi prezydenta, u inšym miescy adbyłosia pasiedžańnie Rady eŭrapiejskaj intehracyi, struktury, stvoranaj pa inicytyvie Alaksandra Milinkieviča sioleta ŭ kastryčniku z metaj vypracoŭki stratehičnaha bačańnia intehracyi Biełarusi ŭ Eŭropu. Na hetym pasiedžańni siarod čatyroch pryjarytetnych nakirunkaŭ byŭ nazvany kulturnicki. U pryvatnaści była ahučana prapanova stvaryć fond padtrymki nonkanfarmisckaj kultury ŭ Biełarusi, pakolki tvorcy pastajanna adčuvajuć na sabie cisk z boku dziaržavy.
«Padtrymka pavinna być jak na ŭzroŭni vyrabu kulturnaha praduktu, tak i na ŭzroŭni jaho reklamy i raskrutki», — zajavili siabry Rady eŭrapiejskaj intehracyi.
Vystupoŭcy adznačyli, što vielmi važna zabiaśpiečyć umovy dla tvorčaści. Prapanoŭvałasia abjadnać namahańni ŭ stvareńni placoŭki dla demanstravańnia alternatyŭnaha kulturnaha praduktu, a taksama dać zrazumieć Eŭropie, što aficyjnaja kultura — antyeŭrapiejskaja pa svajoj pryrodzie.
Eksperty pahadzilisia vypracavać systemny padychod da raźvićcia nacyjanalnaj kultury. Na ich dumku, stvoranaja zaraz systema niefarmatnaj kultury stanie ŭ budučym padmurkam dla kultury novaj, volnaj Biełarusi.
 Aleś Łahviniec |
Pamočnik Alaksandra Milinkieviča Aleś Łahviniec prosić nie ličyć heta adkazam na razmovu biełaruskich muzykaŭ z namieśnikam kiraŭnika prezydenckaj administracyi Aleham Pralaskoŭskim.
— Tak supała, bo my rychtavali hetuju prapanovu jašče da pasiedžańnia rady. A toje, što ŭźnikła takaja hramadzkaja dyskusija — heta pakaźnik nieabchodnaści dziejnaści ŭ dadzienym kirunku.
Sa słovaŭ Alesia Łahvinca padtrymka biełaruskaj kultury i ajčynnaj rok‑muzyki ŭ pryvatnaści budzie palahać u arhanizacyi kancertaŭ, vydańni dyskaŭ dy inšaj dapamozie niezaležnym tvorcam. Palityk kaža, što tak ci inakš niezaležnych tvorcaŭ zaŭždy padtrymlivali. A novy fond, jaki maje być stvorany pry radzie eŭrapiejskaj intehracyi, budzie rabić heta bolš metanakiravana i asensavana. Ale čamu jon nia byŭ stvorany raniej, bo zabarona na dziejnaść niekatorych hurtoŭ była nakładziena jašče try hady tamu?
— Vielmi klasna zadavać takija pytańni, kažučy čamu hetaha nie było raniej, — reahuje Aleś Łahviniec. — Isnavali inšyja inicyjatyvy, nielha kazać, što da hetaha nie było padtrymki niezaležnaj biełaruskaj muzyki. Heta jość i było.
 Lavon Volski |
 Aleh Chamienka |
Sami ž muzyki kažuć, što try hady jany isnavali ŭ niehałosnaj zabaronie, adłučanyja ad tele‑ i radyjo‑eteru i pa‑sutnaści ad lehalnaj kancertnaj dziejnaści i anijakaj padtrymki nie adčuvali. U adkaz na šmatlikija zakidy ŭ tym, što jany pahadzilisia na sustreču z pradstaŭnikami ŭłady, lider N.R.M. Lavon Volski adkazaŭ nastupnaje:
— Heta balučaje pytańnie, ale anijakaj palityčnaj inicyjatyvy za hety čas tak i nie było stvorana. Kab chacia by vyśvietlić pytańnie što da hetych zabaronaŭ. Nie znajšłosia palityka, ni Milinkieviča, ni niekaha inšaha, jaki by ŭznačaliŭ niejki ruch ci inicyjatyvu, nie było pikietaŭ la hastrolnaha adździełu Mienharvykankamu. Usie mirylisia spakojna z hetaj sytuacyjaj: čystyja i śvietłyja niezaležnyja muzyki, sumleńnie nacyi, voś jany zabaronienyja — nu i narmalna…
Ci źmienicca niešta zaraz, kali z boku dziaržavy vusnami jaje hałoŭnaha ideolaha była ahučana prapanova pa spryjańni dziejnaści (ci, prynamsi, nie pieraškadžeńni joj) zabaronienych biełaruskich rok‑hurtoŭ, a z boku niezaležnaha hramadztva taksama źjaŭlajecca narešcie inicyjatyva, jakaja paklikana padtrymlivać niezaležnuju kulturu. Lider «Pałacu» Aleh Chamienka ličyć, što tyja, chto pracuje na biełaruskuju kulturu, zdolejuć zrabić kudy bolej, pry padtrymcy z dvuch bakoŭ. Na mierkavańnie muzyki takija zachady pavinny adbyvaccca štodzionna, a nie ŭ pryviazcy da niejkaj padziei, bo kultura — zdabytak ahulnacyjanalny.
— Hałoŭnaje, što hetaja dapamoha nie pavinna rabić muzykaŭ niejkimi pryhonnymi. Maŭlaŭ, kali dapamahaje adzin bok, to nielha ŭziać hrošy ad inšaha boku. Tut ja nie kažu pra siabie ci maich paplečnikaŭ z «Kramy», N.R.M ci Neuro Dubel, a najpierš pra maładych, a taksama pra tych, chto ad niedachopu ŭvahi z boku dziaržaŭnych strukturaŭ, pieražyvaje nia lepšyja časy.
