Niečakana abvieščana, što prezydent Rasiei 13–14 śniežnia naviedaje Miensk z aficyjnym vizytam — pieršym za doŭhi čas. Vizyt adbudziecca za 3 dni da daty vyznačeńnia kandydata ad “Adzinaj Rasiei” na pasadu prezydenta i napiaredadni ekstraardynarna rańniaha pasiedžańnia novaabranaj Dziaržaŭnaj Dumy.
Pra dvuchdzionny aficyjny vizyt Uładzimiera Pucina ŭ Biełaruś 13—14 śniežnia paviedamiŭ žurnalistam dziaržaŭny sakratar tak zvanaj «sajuznaj dziaržavy» Pavał Baradzin.
14 śniežnia ŭ Miensku maje adbycca čarhovaje pasiadžeńnie vyšejšaje dziaržaŭnaje rady.
Sa słovaŭ Baradzina, jak pieradajuć infarmacyjnyja ahienctvy, na pasiedžańni buduć abmiarkoŭvacca, siarod inšaha, pytańni padpisańnia kanstytucyjnaha aktu sajuznaj dziaržavy. Hetu dakument daŭno fihuruje ŭ jakaści prajektu, ale dahetul pytańni adkładalisia ŭ doŭhuju skryniu praź niaŭzhodnienaść biełaruskich i rasiejskich intaresaŭ.
Vizyt planujecca jak dvuchdzionny. Heta taksama niezvyčajna, jak i abviaščeńnie vizytu ŭ apošni momant. Apošnija razy, u pryvatnaści, na samit SND, Pucin prylataŭ u Biełaruś usiaho na paru hadzinaŭ, i kantakty z kiraŭnictvam Biełarusi mieli abmiežavany charaktar.
Jakija mety maje Pucin 13—14 śniežnia? Ci heta tolki palityčny pijar napiaredadni rašeńnia ab nastupnym prezydencie? Nichto nie sumniajecca, što rasiejcy pasłuchmiana prahałasujuć za kandydata, vyłučanaha “Adzinaj Rasiejaj”. Ci heta niešta bolšaje — sproba padoŭžyć palityčnaje žyćcio Pucina praz nadździaržaŭnuju nadbudovu sajuzu Biełarusi i Rasiei, praz pasadu prezydenta hetaj pustoj, adnak patencyjna mahutnaj struktury? Umacavańnie takoj nadbudovy niesła b pahrozu dziaržaŭnamu suverenitetu Biełarusi ŭžo ŭ siarednieterminovaj perspektyvie.
Nichto nie razumieŭ patrebu ahulnanacyjanalnaj kampanii prasłaŭleńnia Pucina, što razharnułasia ŭvosień. Takuju kampaniju zvykła pravodzić kandydat na pasadu, a tut — prezydent, jaki nibyta sychodzić, kab nie parušać kanstytucyi.
Vizyt adbudziecca za 3 dni da daty vyznačeńnia kandydata ad “Adzinaj Rasiei” na pasadu prezydenta (17 śniežnia) i napiaredadni ekstraardynarna rańniaha pasiedžańnia novaabranaj Dziaržaŭnaj Dumy.
Nichto, darečy, nie razumieŭ taksama, čamu prezydent Pucin zapatrabavaŭ terminovaha sklikańnia Dziaržaŭnaj Dumy, abranaj 3 śniežnia. Miž tym Duma zdolnaja aperatyŭna ratyfikavać niejkija pahadnieńni, jakija miarkujecca padpisać u Miensku.
Versiju ab tym, što 13—14 śniežnia Biełaruś čakajuć cisk i vykručvańnie ruk z boku Rasiei, varta razhladać usurjoz.
