Chto tyja ludzi, jakija zrabili hety hod niepadobnym da papiarednich? Kim hety hod byŭ adznačany, chto pierastupiŭ praź siabie, chto trapiŭ u letapisy pad ličbaj 2007? Asoby hodu ŭ versii nn.by.
2007 hod adznačyŭsia biesprecedentnym ciskam na siabraŭ niezarehistravanaha «Maładoha frontu». Jon pačaŭsia aryštam Źmitra Chviedaruka i Aleha Korbana, jakich źmiaścili na niekalki dzion u śledčy izalatar KDB — «amerykanku».
Paśla byŭ «Praces piaci», kali na łavie padsudnych za ŭdzieł u niezarehistravanaj arhanizacyi adnačasova akazalisia Źmicier Chviedaruk, Barys Harecki, Aleh Korban, Alaksiej Janušeŭski i Nasta Pałažanka, apošniaja na toj momant była jašče niepaŭnaletniaj. Sud prypaŭ na peryjad «liberalizacyi» paśla sustrečy Natalli Piatkievič z pamočnikam dziaržsakratara ZŠA Devidam Krameram (za čas paśla toj sustrečy jon paśpieŭ stać samym maładym u najnoŭšaj historyi namieśnikam dziaržsakratara), tamu maładzionaŭ tolki aštrafavali.
Vosieńniu sudy nad aktyvistami pradoŭžylisia ŭ rehijonach: u Salihorsku było vyniesiena papiaredžańnie Ivanu Šyłu, u Baranavičach aštrafavali Jarasłava Hryščeniu, a ŭ Niaśvižy — krochkuju Nastu Azarku, pavodle ŭsio taho ž sumnaviadomaha 193-jaha artykułu Kryminalnaha kodeksu.
Novyja kryminalnyja spravy byli zaviedzienyja suprać Źmitra Daškieviča i Artura Fińkieviča, jakija ŭžo adbyvali źniavoleńnie ŭ turmie i na «chimii». Dać novy termin Daškieviču za ŭchileńnie ad dačy pakazańniaŭ nie navažylisia. Zatoje Artura za parušeńnie ŭnutranaha paradku kamendatury pakarali pa poŭnaj — paŭtara hodu turmy.
Narešcie, Źmitra Chviedaruka, adrazu paśla jahonaha vizytu ŭ Vašynhton i sustrečy tam z Džordžam Bušam, u časie akcyi suprać sajuzu z Rasiejaj źbiŭ amon, da straty prytomnaści.
Na siońnia jašče try kryminalnyja spravy zaviedzienyja na maładafrontaŭcaŭ z Homielskaj vobłaści.
Maładafrontaŭcy zasłužyli pavahu i svaich siabroŭ, i praciŭnikaŭ svajoj hatoŭnaściu achviaravać ułasnaj svabodaj, zdaroŭjem i navat žyćciom u imia svaich ideałaŭ. Jany nadali časam zašmalcavanym paniaćciam “palityčnyja i kulturnyja pravy”, “svaboda” i “kaštoŭnaści” kankretny košt: dva hady, paŭtara hodu, niapeŭnaść. Kožny moža sabie ŭjavić, što pieražyvaje 18-hadovy junak u noč pierad kryminalnym sudom.
Maładafrontaŭcy ŭnieśli i jašče adnu navinu ŭ hramadzkaje žyćcio: metadyčnyja represii suprać ich nie vyklikali žachu i zdranćvieńnia, a naadvarot uźnimali chvalu salidarnaści, što dakatvałasia da Niaśvižaŭ i Mahilovaŭ. Usio heta daje padstavu ličyć asobami hodu ŭ biełaruskaj palitycy mienavita ich.
Viartańnie hodu — Tadevuš Kandrusievič
Paśla 16 hadoŭ pastyrskaj dziejnaści ŭ Rasiei na Radzimu viarnuŭsia arcybiskup Tadevuš Kandrusievič. Katalicki kaścioł uznačaliŭ enerhičny pastyr, jaki vyčuvaje svoj maralny aŭtarytet.
Achviara systemy — Ściapan Sucharenka
Aŭtar słavutaha vykazvańnia pra dochłych pacukoŭ Ściapan Sucharenka sioleta pazbyŭsia pasady staršyni KDB. Łukašenka pry zvalnieńni kpiŭ: «Z čekistaŭ vy pieratvarylisia ŭ pastuchoŭ». Chadzili čutki, što Sucharenka moh być navat aryštavany, ale ŭrešcie jon abjaviŭsia ŭ baćkoŭskaj chacie ŭ Śvietłahorskim rajonie. I čakaje novaha pryznačeńnia, cichieńka, choć pieršaje svajo interviju paśla adstaŭki daŭ “Narodnaj voli”. Jakaja systema, takija i achviary.
Rasčaravańnie — Jury Žadobin
Jak vyśvietliłasia, na miesca Sucharenki pryjšła vartaja źmiena. Novy kiraŭnik słužby Jury Žadobin na svoj pieršy dzień čekista nazvaŭ palityčnuju apazycyju «supolnaściu destruktyŭnych elementaŭ», jakich jość 1767 i jakich KDB viedaje pajmienna.
Sałodki hałasok — Dźmitry Kałdun
Śpiavak Dźmitry Kałdun hodna pradstaviŭ Biełaruś na Eŭrabačańni, konkursie, vialikuju ŭvahu jakomu nadajuć tolki na abšarach byłoha Savieckaha Sajuzu.
Zmahar hodu — Siarhiej Siamionaŭ
Svajoj pryncypovaściu homielski chłopiec Siarhiej Siamionaŭ adstajaŭ prava zapaŭniać pa-biełarusku mytnyja deklaracyi pry ŭjeździe i vyjeździe za miažu. Niekalki raz za patrabavańnie biełaruskamoŭnaha blanku na Siamionava składali administracyjnyja pratakoły, ale achvotu adstojvać zakonnaje prava nie adbili. Urešcie Siamionaŭ pieramoh, što pryznaŭ navat staršynia Kanstytucyjnaha sudu Ryhor Vasilevič. Za toje, što daŭno źjaŭlajecca normaj dla inšych narodaŭ, biełarusam usio jašče treba zmahacca.
Spartoviec hodu — Alaksandar Hleb
Paśla sychodu ź londanskaha «Arsenału» francuskaj zorki Tjery Anry biełarus Alaksandar Hleb staŭ lideram kamandy i adnym z najbolš jarkich hulcoŭ anhielskaj premjer-lihi. Anhielcy škadujuć, što Hleb nia moža vystupać za ich zbornuju, a hišpanskaja «Barselona» nia suprać bačyć kapitana biełaruskaj zbornaj u svaich šerahach. Dziakujučy Alaksandru Hlebu pra Biełaruś štodnia daznajucca ŭsio bolej i bolej ludziej u śviecie.
Avans hodu — Ahnieška Ramašeŭskaja
Niezaležnaje biełaruskamoŭnaje telebačańnie sparadziła vializnyja nadziei. Ci apraŭdaje jano ich? Zasłuha stvareńnia «Biełsatu» naležyć pieradusim jahonaj dyrektarcy Ahniešcy Ramašeŭskaj, i ź jaje imiom buduć źviazvacca pośpiechi i niaŭdačy kanału, što nabiraje prafesijanalizmu.
Novyja zorki ŭ palitycy — Julija Cimašenka i Dźmitry Miadźviedzieŭ
Pry kancy hodu Julija Cimašenka druhi raz stała premjer-ministram Ukrainy. Mienavita jana razhladajecca jak adna z najbolš jaŭnych pretendentaŭ na prezydenctva na nastupnych vybarach.
Vyznačylisia ź pierajem¬nikam i ŭ Rasiei. Miesca Pucina zojmie 42-hadovy Dźmitry Miadźviedzieŭ. Na prezydenctva jaho vyłučyli čatyry najbujniejšyja palityčnyja partyi. Miadźviedzieŭ maje reputacyju adnaho z najbolš eŭrapiejskich palitykaŭ Kramla. Ale ŭ toj Rasiei jasna, što ničoha nia jasna. Bo chto budzie sapraŭdnym kiraŭnikom — małady Miadvied ci taki stary Pucin, jakomu stvarajuć vobraz “lubimaha kiraŭnika” i “nacyjanalnaha lidera”? Jahony kult nahadvaje manarchičny…
Praha ŭłady — Uładzimier Pucin
Dźmitry Miadźviedzieŭ adrazu paśla vyłučeńnia na prezydenctva prapanavaŭ Uładzimieru Pucinu pasadu premjer-ministra. Pucin zhadziŭsia. Amerykanski časopis Time pryznaŭ U. Pucina sioleta čałaviekam hodu. Siarod inšaha, zvańnie Pucinu było prysudžanaje za toje, što jon «istotna parušyŭ pryncypy i idei, jakija ceniać svabodnyja nacyi».
Jana kinuła vyklik
Chiłary ci nia Chiłary? Kali demakraty taki vybieruć sabie ŭ kandydatki žonku Biła Klintana… stop… heta niepalitkarektna… senatara ad štatu Ńju-Jork Ms. Slinton, to amerykanskija prezydenckija vybary napeŭna pieratvoracca ŭ hałasavańnie za Klintanichu ci suprać Klintanichi. Jana kinuła vyklik mužčynskaj palitycy, i jana antahanizuje Ameryku. Užo pieršyja pieradvybary ŭ Ajovie i Ńju-Hempšyry nieŭzabavie pakažuć, ci hatovaje davoli tradycyjnaja amerykanskaja hłybinka zrabić staŭku na babu… stop… žančynu ci nehra… aj… afraamerykanca… A što ad taho nam, kabanam, jak kazaŭ persanaž adnaho anekdota? A nam napraŭdzie ad vyniku amerykanskich vybaraŭ vielmi zaležyć, bo Ameryka zastajecca biezumoŭnym ruchavikom zachodniaha śvietu, i kali nastupnym prezydentam akažacca taki samy staŭlenik… stop-stop… čałaviek, źviazany z naftavym łobi, jak Buš, i ceny na enerhanośbity zastanucca na ciapierašnim uzroŭni, Biełarusi budzie ciažka vytrymlivać nacisk Rasiei.
Vaładar chaosu
Pervez Mušaraf, dyktatar Pakistanu, 3 listapada prypyniŭ dziejańnie kanstytucyi i abvieściŭ nadzvyčajnaje stanovišča ŭ svajoj 160-miljonnaj, h.zn. u 16 razoŭ bolš nasielenaj, čym Biełaruś, krainie. Jahonaja kraina maje atamnuju zbroju i pry hetym znachodzicca ŭ kanflikcie z atamnaj Indyjaj, miažuje z Aŭhanistanam. Jaje raździrajuć palityčnyja i relihijnyja sprečki. Hledziačy na pachmury tvar hetaha byłoha desantnika, mižvoli ŭspaminaješ, jak mała adździalaje čałaviectva ad atamnaj katastrofy i kolki advahi treba mieć, kab kiravać takim piekłam jak Pakistan.
Nobeleŭski naminant ź biełarusaŭ — Stanisłaŭ Šuškievič
Kali toje było, što “biełarusy ničoha nia mieli”? TV majem, suśvietnych zorak majem, voś tolki b movu svaju… Daroha da viartańnia roŭnych pravoŭ nacyjanalnaj kultury prachodzić praz palityčnuju baraćbu, i hetym zmahańniem za svabodu, za čałaviečuju hodnaść, biełarusy zasłužyli ŭvahu i pavahu miljonaŭ ludziej u Volnym śviecie. Druhi hod zapar biełarusa vyłučajuć na atrymańnie Nobeleŭskaj premii miru. Letaś siarod pretendentaŭ byŭ staršynia likvidavanaj (što kiepskaje b…) pravaabarončaj arhanizacyi «Viasna» Aleś Bialacki, sioleta — Stanisłaŭ Šuškievič, jakoha prapanavaŭ były prezydent Polščy Lech Vałensa.
Čałaviek abaviazku — Lavon Barščeŭski
Pedahoh i pierakładčyk Lavon Barščeŭski viarnuŭsia ŭ palityku. Kala vaśmi hadoŭ jon admiažoŭvaŭsia ad palityčnaj dziejnaści, ale na śniežańskim źjeździe Partyi BNF Barščeŭski byŭ vymušany viarnucca. Pierad druhim dniom pracy źjezdu Partyja apynułasia ŭ patavaj sytuacyi, kali nivodzin z pretendentaŭ nie nabraŭ patrebnaj kolkaści hałasoŭ. Jak u 1999 hodzie, Front byŭ na miažy raskołu. Vyratavaŭ stanovišča Lavon Barščeŭski, jaki prapanavaŭ svaju kandydaturu, jak kampramisnuju. Barščeŭskaha padtrymali amal adzinahałosna.
