27 śniežnia na pasiedžańni Śviatoha Synodu Rasiejskaj pravasłaŭnaj carkvy było pryniataje rašeńnie ab stvareńni ŭ Homielskaj japarchii novaha vikaryjactva i pryznačeńnia vikaryja z tytułam «Japiskap Rečycki». Dahetul nikoli takoje pasady nie isnavała.
Novym biełaruskim japiskapam staŭ archimandryt Leanid (u śvieckim žyćci — Fieadosij Fil), jaki ciapier zajmaje pasadu rektara Mienskich duchoŭnych akademii i seminaryi. U raparcie mitrapalita Fiłareta adznačałasia:
«Hetaja prapanova hruntujecca na nieabchodnaści aktyvizacyi misijanerska‑aśvietnickaj dziejnaści na Homielščynie. Jość upeŭnienaść, što archimandryt Leanid, majučy vialiki žyćciovy dośvied, budzie nadziejnym pamočnikam archijapiskapu Homielskamu i Žłobinskamu Arystarchu».
Archimandryt Leanid naradziŭsia ŭ 1960 hodzie ŭ vioscy Nieścieraŭcy Chmialnickaj vobłaści (Ukraina). Skončyŭ Maskoŭskuju duchoŭnuju seminaryju (1985), a taksama Maskoŭskuju duchoŭnuju akademiju (1989). Kandydat bahasłoŭja, dacent. Vykładčyk Śviatoha Piśma Novaha Zapavietu.
San japiskapa archimandryt Leanid atrymaje ŭ Miensku.