U vypadku istotnych sankcyjaŭ z boku ZŠA Łukašenka paabiacaŭ vyšpurnuć z krainy amerykanskuju ambasadarku. Takich rezkich vypadaŭ na adras Zachadu z vusnaŭ aficyjnaha kiraŭnika nie było daŭno.
Hety pasaž varta pracytavać: "Jak tolki buduć uviedzienyja istotnyja dla našaj ekanomiki sankcyi, my adreahujem najžorstkim čynam pa usich kirunkach: i ŭ palitycy, i ŭ ekanomicy, i pa inšych. Jak tolki heta istotna zakranie našu ekanomiku, to pieršy, chto adsiul budzie vyšpurnuty, — heta ambasadar Złučanych Štataŭ Ameryki. Ja kažu pra heta publična. Tamu chaj amerykanski ambasadar supakoicca dy zajmajecca svaimi prablemami, bo dačasna moža pakinuć svaju pasadu ŭ Biełarusi". Tak adkamentavaŭ prezydent niadaŭniuju zajavu Karen Ściuart pra mahčymaje pašyreńnie sankcyjaŭ suprać našaje krainy.
Adznačym, što sankcyi suprać "Biełnaftachimu" byli ŭviedzienyja paŭtara miesiacy tamu. U vysokaha kiraŭnictva było bahata času, kab adreahavać. Ale hroznaja eskapada prahučała tolki siońnia, padčas idyličnaha mierapryjemstva — naviedvańnia "SOS — dziciačaje vioski" ŭ Baraŭlanach.
Što ž adbyłosia za hety čas?
Adbyŭsia vizyt Pucina, vynikam jakoha stali vialiki kredyt, abiacańnie jašče bolšaj pazyki i łahodnyja ceny na haz u pieršym kvartale 2008 hodu.
"Uvieś hety hod Łukašenka musiŭ hrać niazvykłuju dla siabie rolu, vytrymlivać dyplamatyčny ton u stasunkach z Zachadam, — miarkuje palitolah Valer Karbalevič, ź jakim my tolki što abmianialisia ŭražańniami ad siońniašnich zajaŭ (darečy, tam jašče para admietnych momantaŭ, možacie zazirnuć na sajt BIEŁTA). — Ciapier ža Rasieja pryadčyniła dźviery, i jon viarnuŭsia da zvykłaj rytoryki". Moj surazmoŭca naŭprost źviazvaje hety metalovy ton z padarunkami ad Pucina.
Ale niaŭžo nie zrazumieła, što Maskva prosta trymaje na kručku?
"Ułada žyvie siońniašnim dniom, — kaža Karbalevič. — Mnohaje budzie zaležać ad taho, ci pryhłušyć Kreml svoj antyzachodni trend paśla vybaraŭ. Siońnia, va ŭsiakim razie, Łukašenka vystupaje va ŭnison. U Maskvie takaja rytoryka zapatrabavanaja. Hałoŭnaje ž — Maskva znoŭ dała narkotyk. Tamu da surjoznych ekanamičnych transfarmacyj niama stumułaŭ. Niezdarma ž kažuć: reformy pačynajucca tady, kali skančajucca hrošy. A tut stolki hrošaj, možna skazać, na durnicu!".
Karaciej, hod zaviaršajecca sumnym palityčnym akordam. Rasiejski narkotyk na niejki čas viarnuŭ uładu ŭ zvykłyja psychalahičnyja kaardynaty.
Zrazumieła, što rytoryka jość rytorykaj. Naŭrad ci sprava dojdzie da dyplamatyčnaje vajny. Miensk nia maje mahčymaściaŭ dla "adekvatnaha adkazu" Štatam.
Suvory nastroj kiraŭnictva najpierš moža adbicca na ŭnutranym žyćci. Nadziei na liberalizacyju, dyjaloh ź niezaležnaj supolnaściu i h.d. — u kaho jany byli — badaj, lepiej adsunuć ubok. Nas čakaje ciažki hod.
