Na sajcie Niezaležnaha instytutu sacyjalna-ekanamičnych i palityčnych daśledavańniaŭ (Vilnia) źjaviłasia nizka novych materyjałaŭ. Jany hruntujucca na vynikach śniežańskaha apytańnia.
Sacyjolahi adznačajuć "inflacyjny spałoch" biełarusaŭ. Kali ŭ červieni 2006-ha (apošni hod tannych enerhanośbitaŭ!) rost cenaŭ chvalavaŭ 60,1% žycharoŭ, to ŭ minułym miesiacy — užo 84,2%. Za hety ža peryjad ad 19,5% da 34,7% vyrasła dola tych, kaho chvaluje prablema zhaleńnia nasielnictva. 19,9% zajavili, što źviedvajuć ad rostu cenaŭ "sapraŭdny šok".
Aŭtary daśledavańnia pryznajucca, što takaja vostraja reakcyja hramadztva na adnosna pamiarkoŭnuju inflacyju stała niečakanaj.
Z adnaho boku, kazać pra ekanamičny abvał pakul što sapraŭdy nie vypadaje. Ale suajčyńniki, musić, bolej aryjentujucca na chutkaść spustašeńnia svaich kašalkoŭ, čym na aficyjnyja ličby inflacyi. Jany bačać, što "praces pajšoŭ" i moža pajści jašče šparčej. Źnikła słavutaje pačućcio "stabilnaści". Prychodzić asensavańnie chistkaści "biełaruskaj madeli": jana źviedała vialikija prablemy, varta było Rasiei tolki trochi prykrucić kranik…
Biełaruskaja stabilnaść, adznačajuć sacyjolahi, hruntujecca na dziaržaŭnym paternaliźmie (darečy, pakazalna, što 74,2% našych suajčyńnikaŭ — suprać skaračeńnia lhotaŭ). Tamu "najmienšaja pahroza rostu materyjalnaha dabrabytu, jaki staŭ apošnimi hadami zvykłym, i vyklikała nastolki chvaravituju reakcyju biełaruskaha hramadztva".
Na hetym tle padaje davier da palityki ŭłady. Kali ŭ vieraśni letaś 50,2% biełarusaŭ ličyli, što stanovišča spraŭ u krainie raźvivajecca ŭ pravilnym kirunku, to ŭ śniežni — tolki 41,2%.
Nu i narešcie što da persanalijaŭ.
Ź vieraśnia pa śniežań 2007 hodu elektaralny rejtynh Alaksandra Łukašenki źmienšyŭsia z 44,9% da 39,9% (dla paraŭnańnia: u krasaviku 2006-ha, adrazu paśla prezydenckich vybaraŭ, hety pakazčyk składaŭ 60,3%). Rejtynh davieru da prezydenta ciaham traŭnia — śniežnia 2007 hodu taksama źniziŭsia: ad 56,9% da 50,9% (čamu nazirajucca takija "nažnicy" miž rejtynhami — cikaŭnyja mohuć pračytać niepasredna na sajcie NISEPD).
Zrešty, nahadvajuć sacyjolahi, rejtynh aficyjnaha kiraŭnika źviedvaŭ i horšyja časy. "Paśla druhich prezydenckich vybaraŭ na miažy 2002 — 2003 hh. jon dasiahnuŭ svajho absalutnaha minimumu — 27%. Adnak da čakanaha mnohimi apazycyjnymi palitykami rostu pratestavaj aktyŭnaści heta nie pryviało. Aŭtarytarny režym u Biełarusi abapirajecca ŭ značnaj stupieni nie na padtrymku nasielnictva, a na jahonuju pasyŭnaść", — reziumujuć aŭtary daśledavańnia.
Sapraŭdy, voś tut vy znojdziecie tablicu, dzie apazycyjnyja partyi pavodle rejtynhu davieru — u samym chvaście. Nie rastuć, pavodle sacyjolahaŭ, i rejtynhi apazycyjnych palitykaŭ. A voś niezaležnyja medyi ŭ sensie davieru — napieradzie dziaržaŭnych.
