U čaćvier vybarcy amerykanskaha štabu Ajova dajuć start doŭhamu marafonu. Kamentar.
U čaćvier vybarcy amerykanskaha štabu Ajova dajuć start doŭhamu marafonu amerykanskich pieradvybaraŭ, u časie jakich partyjnyja aktyvisty abirajuć kandydata ad svajoj partyi na prezydenckija vybary, što adbuducca pad kaniec nastupnaha hodu. Amerykanskaja demakratyja takaja, što z peŭnaściu pradkazać, chto stanie pieramožcam, nadzvyčaj ciažka. Sympatyi mianiajucca, farmujucca, hartujucca ŭ časie nieźličonych publičnych debataŭ i sustrečaŭ z vybarcami.
Biełaruskaja emihracyja tradycyjna padtrymlivała respublikancaŭ jak pravych i schilnych da bolš žorstkaj palityki ŭ dačynieńni da Savieckaha Sajuzu.
Siońnia raniejšyja padzieły mianiajucca. Demakraty vabiać novuju chvalu emihracyju bolš liberalnym staŭleńniem da čužyncaŭ i mienšaściaŭ.
Siarod respublikancaŭ asabista znajomy ź biełaruskaj sytuacyjaj senatar Makkiejn. Jon ža dobra padrychtavany da viadzieńnia spravaŭ z Rasiejaj.
U demakrataŭ najlepš abaznanaja ŭ mižnarodnych pytańniach senatarka Klintan.
A voś chto z kandydataŭ — Makkiejn, Chakabi, Romni, Džulijani abo Klintan, Abama — prapanavaŭ najiaśniejšaje bačańnie budučyni Ameryki i śvietu, chto sumieje zaručycca davieram, stanie trochi vidniej paśla hałasavańnia ŭ Ajovie.
Padstavovym ža biełaruskim nacyjanalnym intaresam jość na siońnia pytańnie cenaŭ na naftu i inšyja enerhanośbity. Kiravańnie Buša vypała dla Biełarusi fatalnym, bo ceny na naftu dasiahnuli pry im rekordnych pamieraŭ. Jość ironija losu ŭ tym, što napiaredadni pieradvybaraŭ u Ajovie cana barela nafty pierakročyła symbaličnuju miažu 100 dalaraŭ. Možna spračacca, zaležyć heta ad intaresaŭ Buša i jahonaj kamandy ŭ naftavym biznesie Techasu, ale amal adnaznačna, što biełaruskim intaresam na siońnia najlepš adpaviadaŭ by toj kandydat, jaki zdoleŭ by źnizić ceny na naftu. Heta byŭ by najlepšy ŭniosak u biełaruskuju demakratyju, haspadarčaje praćvitańnie, ale i najbolšy ŭdar pa tyraničnych režymach u śviecie, bolšaść jakich na siońnia hruntujecca na dachodach ad nafty abo subsydyjach ad bahatych naftaju patronaŭ.
Voś tolki chto zdatny? Adhadać niaprosta.
