Suvoryja prysudy ŭdzielnikam akcyi pradprymalnikaŭ 10 studzienia śviedčać pra spałoch uładaŭ. Hetak ža sama, z metadyčnaj pomślivaściu, raźbiralisia pastfaktum z aktyvistami Płoščy-2006.
Zaŭčorašniaja manifestacyja pavodle kolkaści udzielnikaŭ — ad troch da piaci tysiačaŭ — paraŭnalnaja z vosieńskimi maršami apazycyi. Ale tyja skončylisia, možna skazać, idylična. Chacia pry žadańni taksama možna było zakinuć parušeńni: nia tam sabralisia, hazon pataptali, vyjšli na prajeznuju častku…
Hetym razam nia tolki dali aryšty, ale j kryminalnuju spravu zaviali pavodle artykułu ab dziejańniach, što hruba parušajuć hramadzki paradak. Tak što jašče nia viečar.
I reč nia tolki ŭ tym, što čarhovy tur hulniaŭ z Eŭropaj skončany. Vidavočna, što pratest pradprymalnikaŭ napružyŭ uładu značna bolej, čym standartnyja, pradkazalnyja akcyi tytulnaj apazycyi. Na tych mierapryjemstvach — pieravažna znajomyja tvary (pamiatajecie pra 1 767 destruktyŭnych elementaŭ? :) A tut vyjšaŭ inšy kantynhient. Pieravažna apalityčnaja publika, jakoj nastupili na mazol ekanamičnaha intaresu. A materyjalnaje jość pieršasnym… Ułada ŭbačyła šychty ŭpartych vajaroŭ nie za abstraktnyja pryhožyja lozunhi, a za svajo kreŭnaje.
Faktyčna heta akurat tyja śviežyja pratestavyja siły, pra jakija daŭno maryli lidery palityčnaj apazycyi. Apošnija adčuvajuć spryjalnuju kanjunkturu i starajucca apynucca na hrebieni chvali. 10 studzienia na płoščy byli Milinkievič, Statkievič, Kalakin, Labiedźka… Lideru AHP heta ŭžo kaštavała 15 sutak.
Zaraz z vusnaŭ apazycyjnych dziejačaŭ hučać kamplimenty na adras śmiełych "indyviduałaŭ" i prahnozy, što tyja ŭvaljucca ŭ šerahi ŭdzielnikaŭ "haračaje viasny".
Voś tut jość peŭnyja sumnievy.
Pa-pieršaje, ułada moža ŭžyć kambinavanuju metodu — kropkavyja represyi plus drobnyja sastupki, kab źbić chvalu, raskałoć šerahi IP dy ichnich najmanych pracaŭnikoŭ. Takija "adkrutki" byli ŭžo, kali handlary aburalisia padatkam na dadadzieny košt, ukaranieńniem kasavych aparataŭ. Pamiatajecie, kolki hadoŭ tamu navat prezydent asabista na rynak pryjazdžaŭ, kab sucišyć žarści…
Pa-druhoje, niezaležna ad linii ŭładaŭ, hety kantynhient pryzvyčaiŭsia dumać i dziejničać prahmatyčna, adaptavacca da vyžyvańnia ŭ ekstremalnym dziełavym klimacie. Naiŭna spadziavacca, što hetyja ludzi pahodziacca na rolu "indziejcaŭ", hatovych zredźčas vychodzić na ściažynu virtualnaj palityčnaj vajny pavodle syhnału apazycyjnych pravadyroŭ.
U pradprymalnikaŭ inšaje — vyklučna prahmatyčnaje, materyjalnaje myśleńnie. Užo nie adnojčy adznačałasia, što biznesoviec-strajkoviec — heta aksiumaran (Jury Drakachrust trapna kaža pra "klasavyja bai biznes-praletaryjatu":)
Zaraz ich rozum aburany trochi pakipić, a potym pačnie pracavać u tym kirunku, jak prystasavacca da novych umovaŭ (bo dziaržava moža maneŭravać, ale stratehična nie adstupić), jak skiravać svoj biznes u niejkaje inšaje rečyšča. Chtości ściaŭšy serca pierarehistrujecca ŭ PUP, chtości znojdzie novyja "šeryja" varyjanty… I najmanyja pracaŭniki naŭrad ci stanuć doŭha bić łyndy: hety ćviarozy, ruplivy kantynhient budzie karystacca popytam na kadravym rynku.
Karaciej, mary pra haračuju viasnu na hruncie pradprymalnickich pratestaŭ mohuć i nia spraŭdzicca.
Inšaja reč, što narod usio mataje na vus. U hramadztvie nazapašvajecca krytyčny zarad niezadavolenaści: tut vam i raskrutka inflacyi, i skasavańnie lhotaŭ, i nastupstvy ŭkazu №760... Niekali heta moža dasiahnuć stanu hrymučaj sumiesi.
