Bolš za 30 biełaruskich žančyn ź Minska, Babrujska (Mahiloŭskaja vobłaść), Barysava, Žodzina, Maładziečna i Salihorska (Minskaja vobłaść), Hrodna i Lidy (Hrodzienskaja vobłaść), Mazyra (Homielskaja vobłaść), Pastaŭ (Viciebskaja vobłaść) i Pružan (Bresckaja vobłaść) prosiać Uładzimira Pucina akazać sadziejničańnie ŭ sustrečy z Alaksandram Łukašenkam. Ab hetym havorycca ŭ siami telehramach, što nakiravany z 12 pa 14 studzienia prezidentu Rasii ad svajačak asudžanych, a taksama ad niazhodnych z rašeńniami sudoŭ pa svaich hramadzianskich spravach.
Jak paviedamiła BiełaPAN adna z padpisantaŭ zvarotu minčanka Ludmiła Kučura, na praciahu niekalkich hadoŭ jana sprabavała sama i sa svaimi kalehami pa niaščaści sustrecca z kiraŭnikom dziaržavy: «Rašeńni, što pryniatyja raniej pa spravach našych blizkich, my ličym niezakonnymi, bo jany nie abhruntavany i pryniaty z parušeńniami zakanadaŭstva». Aprača taho, pavodle jaje słoŭ, na svaje kankretnyja pytańni žančyny "atrymlivajuć adpiski ad słužbovych asob suda i Hienieralnaj prakuratury", a z mnohimi ź ich «čynoŭniki naohuł spynili pierapisku».
«9 studzienia hetaha hoda my znoŭ źviarnulisia ŭ Administracyju prezidenta z prośbaj ab asabistym pryjomie ŭ Alaksandra Łukašenki, adnak 11 studzienia atrymali admovu za podpisam načalnika ŭpraŭleńnia pa pracy sa zvarotami hramadzian Administracyi prezidenta Stanisłava Buko. Tamu my nakiravali telehramy prezidentu Rasii, uličvajučy jaho vialikija mahčymaści i ŭpłyŭ na kiraŭnika biełaruskaj dziaržavy», — skazała Ł.Kučura.
Heta žančyna, čyj muž byŭ pryhavorany da 18 hadoŭ źniavoleńnia za zabojstva jehiera na palavańni, na praciahu mnohich hadoŭ damahajecca pierahladu pryhavoru i ŭ kancy minułaha hoda źviarnułasia sa skarhaj u Kamitet pa pravach čałavieka AAN.
U intervju BiełaPAN juryst Tamara Siarhiej zaznačyła, što zhodna z artykułam 79 Kanstytucyi Respubliki Biełaruś prezident źjaŭlajecca kiraŭnikom dziaržavy, harantam Kanstytucyi, pravoŭ i svabod čałavieka i hramadzianina. «I hramadzianie, ź jakimi vyšejšyja słužbovyja asoby suda i prakuratury spyniajuć pierapisku, mohuć spadziavacca tolki na asabisty ŭdzieł prezidenta Biełarusi. Pakolki žančynam admovili ŭ pryjomie ŭ kiraŭnika dziaržavy, jany trapili ŭ biazvychadnaje stanovišča i musili źviarnucca da Uładzimira Pucina. Škada, što žančyny pajšli na taki krok, pryčynu jaho baču ŭ niemahčymaści realizacyi kanstytucyjnych pravoŭ i svabod biełaruskich hramadzian», — zajaviła T. Siarhiej.
