Miescy na sumoŭje pa šenšienskuju vizu ŭ sistemie e-Konsulat polskaha konsulstva ŭ Biełarusi skončvajucca za chviliny — i ŭ tym brali udzieł robaty, raspaviadaje antyvirusnaja kampanija ESET.
Škodnaja prahrama MSIL/Agent.PYO metanakiravana raspaŭsiudžvałasia na kampjutary biełaruskich karystalnikaŭ i zajmała volnyja miescy ŭ čarzie na sumoŭje ŭ śniežni 2014 hoda.
Prahrama dziejničaje padobna raniejšym veb-skryptam, napisanym amatarami, ale karystajecca čužymi kampjutarami. Za šeść dzion kala 200 tysiač karystalnikaŭ byli pieranakiravanyja na škodnaje źmieściva prahramy, usiaho ŭ dziejnaści chakieraŭ było zadziejničana 925 kampjutaraŭ.
20-21 śniežnia boty stali atrymlivać kamandy na zapaŭnieńnie form dla atrymańnia viz. Z 20 pa 29 śniežnia chakiery vypuścili 4 madyfikacyi škodnaj prahramy, ale i polskaje konsulstva ŭviało kontrmieru — dla zapaŭnieńnia formy staŭ patrabavacca ŭvod «kapčy» (naboru litar i ličbaŭ na malunku, jaki kampjutaru ciažka raspaznać).
Infarmacyja pra škodnuju prahramu była pieradadzienaja ŭ nacyjanalnyja centry reahavańnia na kampjutarnyja incydenty Biełarusi i Polščy.
Pavodle padlikaŭ polskaj Gazeta Wyborcza, jašče ŭ 2013 hodzie chakiery zarablali miljony dalaraŭ na dapamozie ŭ atrymańni vizy. Polskaje MZS abviarhała čutki pra ŭzłom servisu E-konsulat i kradziež źviestak.
Čytajcie taksama: Pasoł Polščy paabiacaŭ adčynić u Biełarusi vosiem vizavych centraŭ
