Biełaruś, a nie Rasieja budzie pradavać u Iran systemy procipavietranaj abarony S-300. Heta ćvierdzić brytanskaja pryvatnaja vyviedčaja kampanija «Jane's».
Raniej u druk traplali paviedamleńni pra padpisańnie čarhovaha rasiejska-iranskaha kantraktu ab pastaŭkach Tehieranu hetych zenitnych rakietnych system. Eksperty ličyli, što tym samym Rasieja procidzieje namieram ZŠA pravieści siłavuju akcyju na Blizkim Uschodzie.
Jak paviedamlaje «Jane's», na hety čas Tehieran znachodzicca na stadyi zaklučnych pieramovaŭ ź Mienskam. Systemy S-300 byli da niadaŭniaha času razhornutyja la Miensku jak častka aperatyŭnaj kanfihuracyi procirakietnaj abarony Biełarusi.
Krynica ŭ systemie biełaruskaj vajskovaj pramysłovaści paviedamiła brytanskaj kampanii, što kančatkovaja cana ŭhody pakul što nie nazvanaja, adnak biełaruski bok nibyta prosić ad Iranu 140 miljonaŭ dalaraŭ za dźvie systemy S-300 – uklučna z techničnym absłuhoŭvańniem i padrychtoŭkaju kadraŭ.
Pavodle krynicy, takaja cana źjaŭlajecca davoli vysokaj dla dastatkova starych rakiet. Z hetaha robicca vysnova, što ceny adlustroŭvajuć najaŭnaść nieadkładnaj patreby Iranu ŭ takich systemach.
