Ciaham siońniašniaha dnia stała viadoma pra paŭtornyja adličeńni z VNU adrazu dvuch rehijanalnych moładzievych aktyvistaŭ: Kaciaryny Sałaŭjovaj z Połacku i Źmitra Žaleźničenki z Homielu.
Kaciaryna Sałaŭjova
 |
Kaciaryna Sałaŭjova vučyłasia na 2-m kursie historyka‑filalahičnaha fakultetu Połackaha dziaržaŭnaha ŭniversytetu. Dziaŭčynu nie dapuścili da zimovaj sesii, bo jana nie zdała zalik pa krainaznaŭstvu. Data zaliku supała z administracyjnym sudom, kali Sałaŭjovaj prysudzili štraf u pamiery 1 młn. 50 tys. rubloŭ za palityčnyja hrafici naniesienyja na budynak połackaha harvykankamu.
U pačatku śniežnia Sałaŭjovu ŭžo adličali z universytetu za «akademičnuju niepaśpiachovaść». Adnak pad ciskam hramadzkaści jaje adnavili ŭ VNU ŭžo praz paru dzion paśla vyklučeńnia, praŭda, z umovaj — da pieršaha parušeńnia ci zatrymańnia.
Dziaŭčyna kaža, što budzie pastupać kudy‑niebudź za miažu. «Ci ŭ Smalensk pajedu vučycca, ci jašče kudy, ale abaviazkova na zavočnaje adździaleńnie», — kaža jana.
Varta nahadać, što Kaciaryna Sałaŭjova prachodzić jak padazravanaja ŭ kryminalnaj spravie pavodle art. 193 č.1 «Udzieł u niezarehistravanaj arhanizacyi». Druhaja kryminalnaja sprava suprać Sałaŭjovaj pa «źniavazie dziaržaŭnych symbalaŭ» prypynienaja.
Źmicier Žaleźničenka
22 studzienia rektar Homielskaha dziaržaŭnaha ŭniversytetu Alaksandar Rahačoŭ padpisaŭ zahad ab adličeńni z VNU studenta 3‑ha kursu matematyčnaha fakultetu Źmitra Žaleźničenki.
 |
Chłopiec byŭ adličany z universytetu jašče 7 vieraśnia 2007 hodu za administracyjnaje pravaparušeńnie — raspaŭsiudžvańnie biletaŭ na kancert biełaruskich bardaŭ biez rehistracyi. Ale Źmicier tady nia skłaŭ ruk i nia źjechaŭ vučycca za miažu, a praciahvaŭ adstojvać svaje pravy u sudach.
16 studzienia sud Centralnaha rajonu Homiela pryznaŭ niezakonnym adličeńnie z treciaha kursu matematyčnaha fakultetu studenta‑vydatnika Źmitra Žaleźničenki. Chłopiec adnaviŭsia na vučobu, ale, jak vyśvietliłasia, nienadoŭha.
Aficyjnaja pryčynaj novaha adličeńnia źjaŭlajecca — parušeńnie praviłaŭ unutranaha rasparadku, nievykanańnie prykazu rektara i parušeńnie damovy miž administracyjaj VNU i prafsajuznym kamitetam. Pierad hetym prezydyjum studenckaha prafkamu paličyŭ dalejšaje znachodžańnie chłopca ŭ VNU «niemetazhodnym». Za adličeńnie prahałasavali siamiora studentaŭ, suprać — piać.
Možna z dakładnaściu havaryć, što Źmicier Žaleźničenka budzie praciahvać adstojvać svaje pravy ŭ sudach i nadalej.
