Biełaruskija lasy ŭ pryvatnuju ŭłasnaść pradavać nie buduć, zajaviŭ na pres-kanfierencyi 5 sakavika ŭ Minsku ministr lasnoj haspadarki Michaił Amieljanovič. Pres-kanfierencyja była pryśviečanaja ŭkaranieńniu ŭ krainie finskaha vopytu viadzieńnia lasnoj haspadarki.
«Lasy ŭ Biełarusi naležać dziaržavie. I artykuła pra mahčymaść ich pieradačy ŭ pryvatnuju ŭłasnaść u novaj redakcyi Lasnoha kodeksa nie budzie», — skazaŭ ministr.
Jon paviedamiŭ, što ŭ Finlandyi 60% lasoŭ znachodziacca ŭ pryvatnaj ułasnaści, 26% — dziaržaŭnaj, 9% — va ŭłasnaści pramysłovych kampanij, 5% — inšych arhanizacyj.
«Kali ŭ Finlandyi pryjarytet addajecca kamiercyjnym pryncypam viadzieńnia lasnoj haspadarki, jany starajucca atrymać maksimalny dachod ad lasoŭ, uličvajučy ekałahičnyja i sacyjalnyja aśpiekty, to ŭ nas pryjarytetam viadzieńnia lasnoj haspadarki źjaŭlajecca ekałahičny składnik, jaki daminuje nad kamiercyjnym. Tamu ŭsie vysiečki dohladu — płanavyja. My tut nie vymajem prybytki, a stavim metu — vyraścić našy lasy, atrymać praduktyŭnyja lasy, lasy budučyni», — adznačyŭ kiraŭnik viedamstva.
Pa finskim prykładzie płanujecca pašyrać akazańnie pasłuh na kamiercyjnaj asnovie. «My sioleta budziem pierahladać šerah narmatyŭnych dakumientaŭ, kab pierajści na vopyt Finlandyi pa advodzie i taksacyi lesasiek. Heta daść vialiki ekanamičny efiekt, bo siońnia šmat finansavych i ludskich zatrat nakiroŭvajecca na hetyja raboty», — adznačyŭ Amieljanovič. Pavodle jaho słoŭ, u Finlandyi admiežavańnie, zdymka i materyjalna-hrašovaja acenka lasoŭ nie pravodzicca. Tam učastak, na jakim treba pravieści vysiečku dreŭ, vyznačaje apieratar lasnych mašyn ci valščyk, jaki prajšoŭ vučobu pa asnovach lesavodstva.
Akramia hetaha, adznačyŭ ministr, u Finlandyi 100% lesahaspadarčych i lesanarychtoŭčych vysiečak pravodziać lesavodčyja asacyjacyi. U Biełarusi hetym zajmajucca sami lashasy. «U apošnija hady my ŭziali kurs na pieradaču pasłuh pry lesanarychtoŭcy i inšych rabotach u lesie. U 2014 hodzie abjom takich pasłuh vyras amal u dva razy da 2,5 młn kubamietraŭ, ź ich 1,5 młn kubamietraŭ było ŭbrana miechanizavanym sposabam. I dalej my budziem da hetaj pracy pryciahvać inšyja arhanizacyi i spryjać raźvićciu hetaha biźniesu nie tolki na lesanarychtoŭkach, ale i na lesahaspadarčych pracach — pasadcy i dohladzie za lasnymi kulturami, praviadzieńni vysiečak dohlad», — skazaŭ Amieljanovič.
«U liście na imia kiraŭnika dziaržavy apisali ŭsie padychody, jakija my budziem ažyćciaŭlać u płanie pierachodu na finskuju madel. Raśpisali ŭ płanie mierapryjemstvaŭ da 2020 hoda, pa jakich kirunkach budziem nabližacca da finskaha vopytu viadzieńnia lasnoj haspadarki. Ale heta nie mamientalnaje dziejańnie, za hod my nie zmožam pierajści na ŭsie hetyja technałohii i madeli. Heta praciahły praces, i kiraŭnik dziaržavy z takim padychodam pahadziŭsia», — paviedamiŭ ministr.
Na jaho dumku, «samaje hałoŭnaje ŭ novaj madeli — heta pierapracoŭka draŭniny». «Kali ŭsia draŭnina budzie pierapracoŭvacca ŭ našaj krainie, to my budziem mieć vialiki ekanamičny efiekt. U Finlandyi takoj pradukcyi vypuskajecca na 19 młrd dołaraŭ. Tut u nas vialikaje adstavańnie. Naš štohadovy resurs u 19 młn kubamietraŭ naša pramysłovaść pakul nie moža pierapracavać», — adznačyŭ Amieljanovč. Jon nahadaŭ, što z 1 studzienia 2016 hoda płanavałasia zabaranić ekspart kruhłych lesamateryjałaŭ, adnak inicyjujecca pytańnie pra dazvoł i paśla hetaj daty pastaŭlać ich na ekspart.
