 |
U niadzielu homielskaha aktyvista apazycyi Źmitra Žaleźničenku ŭ vajskovaj častcy 83469 horadu Žłobinu naviedali namieśnik staršyni Partyi BNF Alaksiej Janukievič i sakratar upravy BNF Uładzimier Łabkovič.
Źmitra zabrali na terminovuju słužbu 25 studzienia, kali jon źjaviŭsia ŭ homielski vajenkamat z daviedkaj ab kiepskim stanie zdaroŭja — byŭ pavyšany kryviany cisk. Jaho adpravili słužyć u čyhunačnyja vojski ŭ Žłobin. Na znak pratestu suprać niezakonnaha adličeńnia z VNU i hvałtoŭnaj adpraŭki ŭ vojska Žaleźničenka abviaściŭ haładoŭku.
«Kali my źjavilisia na KPP, to dziažurny zapytaŭsia, kim my źjaŭlajemsia navabrancu Žaleźničenku. Ja adkazaŭ, što źjaŭlajusia namieśnikam staršyni Partyi BNF, a Źmicier siabra partyi. Praź niejki čas jaho paklikali. Źmitra pastryhli, tamu vyhladaje krychu niazvykła. Vyhladaŭ badziora i ŭpeŭniena, chacia heta byŭ užo treci dzień jahonaj haładoŭki. Ježu nie ŭžyvaje zusim, pje tolki vadu, admoviŭsia navat ad sokaŭ, jakija my jamu pryvieźli. Sprabavali pierakanać chłopca spynić haładoŭku, bo zdaroŭje važniej, ale jon i nadalej źbirajecca praciahvać zmahacca za svaje pravy takim radykalnym sposabam. Kaža, što aficery ź im razmaŭlajuć pa-biełarusku. Ciapier Źmicier šukaje rasiejska-biełaruski słoŭnik vajskovych terminaŭ, kab zahady jamu mahli addavać taksama pa-biełarusku. Kaža, što ŭmovy absalutna narmalnyja, dziedaŭščyny niama. Bačyŭ u stałoŭcy, što ježa taksama niebłahaja. Pa niekalki razoŭ na dzień ź im hutarać aficery, jakija ŭhavorvajuć spynić haładoŭku. Mienavita ŭhavorvajuć, a nie prymušajuć. Uvohule, adnosiny da Źmitra ŭ častcy vielmi aściarožnyja. Pryjaždžała maci, zachodzili žłobinskija aktyvisty. Žaleźničenka nakiravaŭ listy ŭ Ministerstva abarony. Abiacajuć, što bližejšymi dniami musić pryjści adkaz, tady i stanie bolš-mienš zrazumieły dalejšy los Źmitra», – kaža Alaksiej Janukievič.
Pryniaćcie vajskovaj prysiahi pryznačanaje na 9 lutaha.
U paniadziełak Źmicier Žaleźničenka byŭ dastaŭleny ŭ vajenny kliničny centar u Miensku, u adździaleńni kardyjalohii. Pra heta "NN" paviedamili ŭ pryjomnaj centru. Naviedać Źmitra pakul niemahčyma, bo ŭ medycynskaj ustanovie zaraz karantyn z pryčyny epidemii hrypu.
Kryminalnaja adkaznaść za haładoŭku
Žłobinskija vajskoŭcy papiaredzili Źmitra Žaleźničenku pra kryminalnuju adkaznaść za haładoŭku, jakuju chłopiec trymaje try dni.
Kiraŭnik pres‑centru Ministerstva abarony pałkoŭnik Viačasłaŭ Ramienčyk zajaviŭ nastupnaje:
«Žaleźničenka parušaje zakon. U pryvatnaści, u adpaviednaści z artykułam 447 Kryminalnaha kodeksu jon padlahaje kryminalnaj adkaznaści za naŭmysnuju škodu svajmu zdaroŭju ŭ metach uchileńnia ad vajskovaj słužby. Tamu siońnia jamu buduć daviedzienyja hetyja patrabavańni, i dalej kamandziram čaści buduć rabicca adpaviednyja zachady».
