 Vincuk Viačorka |
Kiraŭnictva Partyi BNF nakiravała adkryty list da ministra abarony Leanida Malcava adnosna sytuacyi z navabrancam Źmitrom Žaleźničenkam, jakoha vyklučyli z Homielskaha dziaržaŭnaha ŭniversytetu, a paśla pryzvali słužyć u vojska. Źmicier ad 25 studzienia trymaje haładoŭku pratestu. U paniadziełak 28 studzienia jaho pieraviali ŭ vajskovy kliničny centar u Miensku. Chłopiec ciapier znachodzicca ŭ adździaleńni kardyjalohii. Žaleźničenka źjaŭlajecca siabram Partyi BNF.
«Jak nia dziŭna, ale na hety raz sud akazaŭsia bolš spraviadlivy, čym orhany adukacyi. Sud adnaviŭ Žaleźničenku ŭ jakaści studenta. Heta aznačaje, što chłopiec byŭ studentam uvieś hety čas i papiaredni zahad rektara nia mieŭ nijakaj jurydyčnaj siły. Adpaviedna, lubyja zachady ŭ dačynieńni da Žaleźničenki, jak nie studenta, taksama nia majuć nijakaj pravavoj siły. U tym liku, rasparadžeńnie ab pryzyvie na terminovuju słužbu. Što da spadara rektara Homielskaha dziaržaŭnaha ŭniversytetu, to ja chaču nahadać, što jahonaje VNU maje partnerskija suviazi z francuskim universytetam Klermon-Feran. Hetyja partnerskija suviazi prajaŭlajucca sumiesnych stažyroŭkach, vyjezdach vykładčykaŭ adzin da adnaho. Jak vyśvietliŭ niadaŭna ŭ Bruseli Alaksiej Janukievič, usie hetyja prahramy finansujucca Eŭrasajuzam, prahramaj “Erazmus”. My ciapier rychtujem list da kiraŭnictva “Erazmusu” pra mahčymy pierahlad stasunkaŭ z Homielskim dziaržaŭnym universytetam. Nielha havaryć pra prynaležnaść da eŭrapiejskaj universyteckaj supolnaści ludziej, jakija dušać valnadumstva. Ministar abarony sp.Malcaŭ, jak u cełym biełaruskaja armija, karystajecca našaj pašanaj. My ličym vojska adnym z padmurkaŭ biełaruskaha dziaržaŭnaha ŭtvareńnia. U cełym, biełaruskaje vojska nie zaplamiła siabie ŭ represiŭnych zachadach, u pieraśledzie inšadumcaŭ, u adroźnieńni ad inšych siłavych struktur. My b vielmi nie chacieli, kab u vypadku sa Źmitrom Žaleźničenkam biełaruskaje vojska stała saŭdzielnikam hetaj represiŭnaj mašyny. My budziem prasić Źmitra spynić haładoŭku, jon užo zaśviedčyŭ svaju mužnaść, tamu stavić pad pahrozu svaju zdaroŭje nia varta», – kaža namieśnik staršyni Partyi BNF Vincuk Viačorka.
