Prezident adznačyŭ, što ŭ pieršuju čarhu dziaržavie patrebna navukovaje vyrašeńnie prablem enierhietyki, infarmatyki, miedycyny i bijatechnałohij, raspracoŭka novych vidaŭ pradukcyi, radykalnaje pavyšeńnie jakaści i kankurentazdolnaści biełaruskich tavaraŭ na ajčynnym i zamiežnych rynkach, a taksama značnyja daśledavańni ŭ sacyjalnych i humanitarnych navukach. «Hłyboka pierakanany — hetyja zadačy pa siłach biełaruskaj navucy. Aptymizm i ŭpeŭnienaść usialajuć tyja stanoŭčyja tendencyi ŭmacavańnia suviaziej navuki i vytvorčaści, jakija ŭsio bolš aktyŭna prajaŭlajucca apošnim časam», — skazaŭ kiraŭnik dziaržavy.
Alaksandr Łukašenka adznačyŭ, što ŭ hetym hodzie pierad dziaržavaj stajać vielmi napružanyja i adkaznyja zadačy. Nieabchodna pavialičyć unutrany vałavy pradukt na 11 pracentaŭ, značna palepšyć efiektyŭnaść vytvorčaści, bolš aktyŭna ŭkaraniać inavacyi va ŭsich halinach narodnaj haspadarki. Pry hetym prezident pryznaŭ, što va ŭmovach kardynalnaha rostu cen na enierhanośbity i inšyja resursy zabiaśpiečyć vykanańnie hetych płanaŭ budzie vielmi niaprosta. Tamu asablivyja nadziei ŭskładajucca na navuku i ŭ pieršuju čarhu na hałoŭny jaje štab — Nacyjanalnuju akademiju navuk.
«Vučonyja krainy razam z rabotnikami vytvorčaści prosta abaviazany mabilizavacca i dasiahnuć jakasna novaha ŭzroŭniu technałahičnaha ŭkładu va ŭsich halinach ekanomiki z vykarystańniem samych sučasnych dasiahnieńniaŭ», — padkreśliŭ kiraŭnik dziaržavy. Jon nahadaŭ, što ŭ minułym hodzie na Pieršym źjeździe vučonych byŭ sfarmulavany kompleks mier pa raźvićciu pryjarytetnych napramkaŭ navukovych daśledavańniaŭ i raspracovak.
Pavodle słoŭ Alaksandra Łukašenki, Biełarusi ŭ niaprosty čas udałosia nie tolki zachavać navukovy patencyjał krainy, ale i ŭmacavać jaho. Tak, u minułym hodzie rady intelektualnaj elity krainy papoŭnili 53 doktary i 531 kandydat navuk. U hety ž pieryjad prysvojena zvańnie prafiesara 63 suiskalnikam, a 407 vučonych atrymali zvańnie dacenta.‑
