Kanadskaja śpiavačka Aŭrył Łavin ŭpieršyniu raspaviała pra svaju chvarobu, z-za jakoj akazałasia na piać miesiacaŭ prykavanaja da łožka.
cardinalpres.com
U intervju dla śviežaha numara časopisa People artystka pryznałasia, što ŭvieś minuły hod byŭ dla jaje žudasny z-za chvaroby Łajma, na jakuju jana pakutavała paśla ŭkusu parazita.
«Ja ledź mahła jeści, u mianie ŭvieś čas kružyłasia hałava, a kali mianie pytalisia, što sa mnoj, ja nie viedała, što skazać», — uspaminaje śpiavačka śviatkavańnie svajho 30-hadovaha jubileju ŭ minułym hodzie ŭ Łas-Viehasie. Aŭrył pryznałasia, što nie zmahła adznačyć jak śled, bo z-za žudasnaha samaadčuvańnia joj daviałosia viarnucca dadomu i prosta lehčy spać.
Nieŭzabavie paśla taho, jak u Łavin była dyjahnastavanaja ciažkaja forma chvaroby Łajma, jana skazała: «Ja i paniaćcia nie mieła, što ŭkus klašča moža pryvieści da takich nastupstvaŭ. Ja była prykavanaja da łožka na praciahu piaci miesiacaŭ».
Padčas chvaroby aŭtarka chitoŭ «Sk8er Boi» i «Girlfriend» znachodziłasia ŭ siabie doma razam ź siamjoj. Jana raspaviała, što ŭ hety pieryjad hladzieła filmy i razmaŭlała z fanatami ŭ sacsietkach. Jaje muž, 40-hadovy muzyka Čed Kruhier, taksama na niejki čas zrabiŭ pierapynak u hastrolach svajoj hrupy Nickelback, kab znachodzicca pobač z kachanaj. Pryjechała kłapacicca ab Aŭrył i jaje maci.
«Heta było žudasna, ja časam navat nie mahła schadzić u duš ceły tydzień, pakolki ledź stajała na nahach. Mnie zdavałasia, što hetaja chvaroba vysmaktała ź mianie ŭsie soki», — uspaminaje śpiavačka.
Łavin uvieś hety čas staranna chavała lubuju infarmacyju pra svajo zdaroŭje ad ŚMI. Adnak u śniežni minułaha hoda jana padzialiłasia z adnym z prychilnikaŭ u Tvitery svaim niaščaściem. Internet chutka zapoŭniŭsia čutkami ab tym, što śpiavačka lečycca ad ałkaholnaj zaležnaści i depresii. Adnak jana nie piarečyła hetamu. Joj byŭ pryjemny kłopat fanataŭ pra jaje zdaroŭje, jakija słali joj šmatlikija paviedamleńni sa słovami padtrymki.
Ciapier Aŭrył Łavin, pa jaje słovach, adčuvaje siabie lepš na 80%, i ciapier jaje hałoŭnaja meta — prosta atrymlivać asałodu ad žyćcia.
