 |
Chłopiec vučyŭsia na fakultecie dziaržaŭnaha kiravańnia ekanomikaj Akademii kiravańnia pry prezydencie, ale 15 traŭnia jaho adličyli z VNU. Aficyjnaja pryčyna — «systematyčnyja parušeńni vučebnaj dyscypliny i praviłaŭ unutranaha rasparadku». Sam chłopiec ličyć, što heta było źviazana ź jahonaj hramadzkaj pazycyjaj.
Juraś doŭhi čas sprabavaŭ adstajać svaje pravy ŭ sudach, adnak pradstaŭniki Femidy nia stali na bok adličanaha studenta. Urešcie, vosieńniu Alejnik źjechaŭ u Maskvu, kab praciahnuć vučobu ŭ Dziaržaŭnym universytecie "Vyšejšaja škoła ekanomiki".
Niadaŭna chłopcu pryjšła paviestka źjavicca ŭ maładečanski vajenkamat, kab prajści medyčny nadhlad dla pryzyvu ŭ vojska. Kamisiju ŭ Maładečnie Alejnik prajšoŭ, ale jaho nakiravali na dadatkovaje abśledavańnie ŭ Miensk.
U vajenkamat Juraś pryjechaŭ ź listom ad kiraŭnika Savietu zamiežnaj i abaronnaj palityki Rasiejskaj Federacyi Siarhieja Karahanava, jaki adnačasova źjaŭlajecca i dekanam fakultetu ŭsiaśvietnaj ekanomiki i mižnarodnaj palityki Vyšejšaj škoły ekanomiki, dzie navučajecca Juraś Alejnik. Karahanaŭ prosić dać chłopcu adterminoŭku, i pryzvać jaho ŭžo paśla skančeńnia kursu navučańnia.
«U vajenkamacie mnie zajavili, što nijakich padstavaŭ davać mnie adterminoŭku ŭ ich niama, — kaža Ju.Alejnik. — Skazali, što ŭ zimovy pryzyŭ ja ŭžo nie traplaju pa terminach, tamu naciahnuć boty daviadziecca letam».
Alejnik spadziajecca, što spravu ŭsio ž atrymajecca vyrašyć mirna. «Kali nie, to budu patrabavać słužby ŭ biełaruskamoŭnaj častcy, jak heta ŭžo rabiŭ Źmicier Žaleźničenka. Heta ŭžo nia budzie precedent, a budzie tendencyja ź jakoj uładam daviadziecca ličycca», — kaža Ju.Alejnik.
