300 žycharoŭ centru stalicy pratestavali suprać prymusovaha adsialeńnia.
Ideja staličnych uładaŭ adsialić vulicu Marksa ŭ samym centry horadu vyklikała pradkazalny pratest jaje zamožnych žycharoŭ. U subotu kala kaviarni «Hrunvald» sabraŭsia pieršy pikiet. Kala 300 raźjušanych žycharoŭ, jakija stajać pierad perspektyvaj straty dziasiatkaŭ tysiač dalaraŭ na pierajeździe ŭ spalnyja rajony, vyjšli na vulicu z transparantami «Aleksandr Hrihoŕjevič, zaŝititie piensionierov».
Pavodle zadumy harvykankamu, vulica Marksa maje stać piešachodnaj. Čynoŭniki zadumali pad šumok asvoić kaštoŭnyja kavałki ziamli. Farmalnaje prava pierasialić žycharoŭ jany majuć -- ułasnaść u Biełarusi nia jość niedatykalnaj. Kab vyzvalić miesca pad hatel z kazino – vypadak analahičny z bernardynami -- jany majuć vysielić žycharoŭ z vaśmi dziasiatkaŭ kvateraŭ. Adnak kali na abaronu staražytnaha klaštara ŭstała tolki žmieńka katalikoŭ i moładzi, na Marksa ŭładam pryjdziecca mieć spravu z sotniami aburanych žycharoŭ.
U jakaści novaje ajčyny im prapanoŭvajecca mikrarajon Łošyca na ŭskrajku Miensku. Ale cana kvadratnaha metra žytła na Marksa składaje $3700 dalaraŭ, a ŭ Łošycy -- tolki $2000. Dyj rušyć ź miesca, dzie žyćcio pražyli, niama achvotnych.
Pratest byŭ arhanizavany: “marksisty” zahadzia narychtavali plakaty.
Ludzi ŭ natoŭpie prysiahali, što «lahuć kaśćmi, ale nie vyjeduć». Niekatoryja ź ich nabyli tut žytło niadaŭna, narabiŭšy pazyk.
Aktyŭny ŭdzieł u prateście braŭ piśmieńnik Uładzimier Arłoŭ, što žyvie tutsama. Jon trymaŭ plakaty «Tolki ŭ rodnaj kvatery napišu bestseler». Inšy čałaviek pryjšoŭ z cytataj z «Raskidanaha hniazda»: «Nichto nas adsiul nia zhonić i nia vystrašyć». Hieroi Kupały, jak viadoma, svajho kotlišča nie ŭścierahli. Žychary vulicy Marksa spadziajucca na lepšaje.
Da pratestoŭcaŭ prybyli namieśnik kiraŭnika administracyi Leninskaha rajonu Alaksandar Krasucki, dyrektar UKB Leninskaha rajonu Leanid Kazakoŭski i pradstaŭnik «Mienskprajektu» sp.Rybnikaŭ. Čynoŭniki pierakonvali, što prajekt pa vysialeńni pakul nie zaćvierdžany. U adkaz mitynhoŭcy pakazali čynoŭnikam kopiju dakumentu, u jakim značycca: «žychary damoŭ suprać rekanstrukcyi vulicy... tamu planujecca ich vysialeńnie». Dakument byŭ padpisany tymi ž čynoŭnikami, jakija pryjšli na sustreču.
Paśla karotkaj paŭzy čynoŭniki prapanavali sustrecca jašče raz «u spakojnaj abstanoŭcy».
 |
 |
 |
 |
 |
 |
 |
 |
Fota Andreja Lankieviča
