 |
Pucin pačaŭ vystup pierad pradstaŭnikami ŚMI ź nievialikaj spravazdačaj ab vynikach 2007 hodu, jaki prezydent Rasiei nazvaŭ udałym. Letaś Rasieja pa abjomie ekanomiki pierahnała Italiju i Francyju, a zarobki pavysilisia na 16%.
«Što datyčyć majho asabistaha ŭspryniaćcia, mnie nia soramna pierad hramadzianami, jakija hałasavali za mianie dvojčy. Usie hetyja vosiem hadoŭ ja pachaŭ, jak rab na halerach, z ranicy da nočy i rabiŭ hetaj poŭnaj addačaj siłaŭ», – skazaŭ U.Pucin.
Prezydent Rasiei skazaŭ, što ŭ jaho nie było spakusy zastacca na treci termin, bo “nikoli nie było zaležnaści ad ułady”.
«Miadźviedzieŭ česny, prystojny čałaviek, małady čałaviek, prahresiŭny, sučasny, bliskuča padrychtavany tearetyčna, jon maje dobryja navyki arhanizacyjnaj pracy tut, u stalicy. Upeŭnieny, što heta budzie dobry prezydent i efektyŭny kiraŭnik. Ale isnuje, aproč usiaho inšaha, jašče takaja asabistaja chimija. Ja jamu daviaraju. Prosta ja jamu».
Pucin užo prymiarajecca da kresła premjer-ministra, jakoje paśla vybaraŭ pavinien pradstavić jamu Dźmitry Miadźviedzieŭ. Ale partret novaha prezydenta Pucin u svaim kabinecie viešać nie źbirajecca.
«Prezydent – harant Kanstytucyi, jon vyznačaje asnoŭnyja nakirunki unutranaj i źniešniaj palityki. A vyšejšaja vykanaŭčaja ŭłada ŭ krainie – heta ŭrad RF na čale sa staršyniom uradu. Paŭnamoctvaŭ dastatkova», – kaža U.Pucin.
Kiraŭnik Rasiei kaža, što nikoli nie dazvolić niekamu naviazvać svaje ŭmovy praviadzieńnie vybaraŭ. «Tym bolš BDIPČ ABSE. Niachaj žonku svaju vučać kapustu varyć». Toje, što prezydenckaja kampanija prachodzić spakojna i biez debataŭ, na dumku Pucina, śviedčyć nie pra adsutnaść demakratyi, a ab padtrymcy siońniašniaha kursu bolšaściu hramadzian.
Nie zabyŭsia kiraŭnik Rasiei i na biełaruskaje pytańnie. Na jahonuju dumku, budaŭnictva «sajuznaj dziaržavy» ź Biełaruśsiu źjaŭlajecca parytetam u mižnarodnaj palitycy. Jon taksama nahadaŭ, što ŭ jakaści zadač stavicca pierachod na adzinuju valutu.
«Siońnia, kali rasiejskaja finansavaja systema stabilnaja jak nikoli, upeŭnieny, dla biełaruskaj ekanomiki, dla hramadzianaŭ Biełarusi ničoha, akramia plusaŭ, tut niama. Ale, paŭtaraju, heta mahčyma zrabić tolki ŭ tym vypadku, kali našy biełaruskija partnery hetaha chočuć. My tut naviazvać ničoha nie źbirajemsia. My hatovyja pajści tak daloka , jak hetaha chočuć našy biełaruskija partnery. I najpierš, na maju dumku, havorka pavinna iści pra intehracyju ŭ sfery ekanomiki», – kaža U.Pucin.
Voś što Pucin skazaŭ adnosna Polščy: «Tak, my vyrašyli budavać hazapravod pa dnu Bałtyjskaha mora. Ale jak my Polšču hetym pakryŭdzili, ja nie razumieju». Što da ŭkrainskaha pytańnia, to Pucin paviedamiŭ, što pytańnie ŭ adnosinach staić nastupnym čynam: «My chočam vyrašać prablemy, ci chočam ich abvastrać?» Kiraŭnik Rasiei vysoka acaniŭ niadaŭniuju sustreču ź Viktaram Juščankam: «Nam atrymałasia damovicca na niekalki hadoŭ napierad».
Pucin pierakanany, što adnosiny z ZŠA i Rasiei nia źmieniacca, niezaležna ad taho, chto pieramoža ŭ zaakijanskich prezydenckich vybarach, bo ŭ krain šmat supolnych intaresaŭ.
Hetaja pres‑kanferencyja Ŭładzimier Pucina była samaj doŭhaj za časy jahonaha kiraŭnictva. Jana doŭžyłasia amal piać hadzin.
