 Vadzim Hihin, zdymak hazety Źviazda |
Piatničny numar hazety «Źviazda» drukuje interviju z novym kiraŭnikom idealahičnaha pražektara, zasnavalnikam jakoha źjaŭlajecca Administracyja prezydenta. Byłoha redaktara Ŭładzimiera Vialičku zamianiŭ Vadzim Hihin.
Jon skončyŭ histaryčny fakultet BDU, kandydat histaryčnych navuk, pracavaŭ u pres‑słužbie hieneralnaj prakuratury (pad kryłom prysłavutaha Jurja Azaronka), byŭ pieršym sakratarom Mienskaj haradzkoj arhanizacyi BRSM.
Na hetaj pasadzie Vadzim Hihin zdabyŭ sabie viadomaść zajavami pra Muraŭjova‑viešalnika. U vieraśni letaś u interviju hazecie «Znamia junosti» jon zajaviŭ: «Moža, trochi niestandartny vybar, ale mnie zaŭsiody impanavaŭ vilenski hienerał‑hubernatar Michaił Mikałajevič Muraŭjoŭ, jaki zdušyŭ paŭstańnie 1863 h. Ale ja dobra vyvučyŭ jaho bijahrafiju. Heta byŭ nadzvyčajny čałaviek, administratar, kiraŭnik, jaki moža słužyć prykładam dla luboha dziaržaŭnaha dziejača».
Moža Hihin vykryć i čarhovuju amerykanskuju zmovu suprać Biełarusi na BT. Hetym letam u pieradačy «Panarama tydnia» jon skazaŭ nastupnaje: «Na siońniašni dzień niama takich technalohijaŭ, jakija byli apracavanyja amerykancami ŭ inšych krainach śvietu, jakija b nie byli prymienienyja ŭ Biełarusi. Adzinaje, što nie było, dziakuj bohu, adkrytaha vajskovaha kanfliktu».
Na pytańnie žurnalista «Źviazdy», jakija prablemy vas siońnia chvalujuć, Vadzim Hihin adkazvaje: «Naprykład, niekatoryja tendencyi idealizacyi peryjadu isnavańnia Vialikaha Kniastva Litoŭskaha. Ja liču, što idealizacyja i navat mitalahizacyja dadzienaha histaryčnaha peryjadu moža pryvieści da peŭnaha pierakosu našaj idealahičnaj kancepcyi. VKŁ nie było biełaruskaj dziaržavaj sa svajoj idealohijaj. Nia ŭsio tam było prosta, nie ŭ takim dobrym stanoviščy znachodziŭsia tady biełaruski narod. Biełarusy na praciahu stahodździaŭ viali baraćbu suprać Kniastva Litoŭskaha. Majo staŭleńnie da tahačasnych padziej vielmi krytyčnaje, i ja nie mahu skazać, što heta adzin z najlepšych peryjadaŭ u historyi Biełarusi. Svoj pohlad nikomu nie naviazvaju, tamu prapanuju na staronkach časopisu dyskusiju pa temie».
Ad studzienia, pad prychod amatara Muraŭjova časopisu «Biełaruskaja dumka» dali dadatkovaje finansavańnie: časopis staŭ kalarovym. Paśla letašniaj rearhanizacyi časopis «Biełaruskaja dumka» uvajšoŭ u skład RUP «Biełaruskaje telehrafnaje ahienctva».
U pieršym sioletnim numary «Biełaruskaj dumki», vydańnidla «pradstaŭnikoŭ orhanaŭ dziaržkiravańnia, deputackaha korpusu, usich, chto maje dačynieńnie da idealahičnaj, infarmacyjna‑prapahandysckaj raboty, a taksama vynachodnikaŭ‑racyjanalizataraŭ», jak acharaktaryzavaŭ jaho Vadzim Hihin, drukujecca interviju z namieśnicaj kiraŭnika Administracyi prezydenta Natallaj Piatkievič. Sp.Piatkievič adkazvaje na pytańni adnosna admieny lhot. Na jaje dumku, u hetym pytańni «niama rezkich źmien».
U kruhłym stale pa pytańni «Ułada i mastak: razam ci paasobku» ŭdzlničajuć dyrektar «Mastackaj litaratury» Alaksandar Karlukievič, namieśnik ministra kultury Viktar Kuraš, narodny artyst Biełarusi Mikałaj Kiryčenka, žurnalist Hienadź Anufryjeŭ i muzyka Pit Paŭłaŭ.
Taksama ŭ numary interviju z staršynioj CVK Lidzijaj Jarmošynaj, jakaja śćviardžaje, što vybarščyki Biełarusi zaŭsiody prymajuć vyniki vybaraŭ jak dadzienaść.
U histaryčnaj padborcy numara historyk Mikałaj Staškievič razvažaje pra toje, ci była alternatyva dziaržaŭnych utvareńniaŭ u BSSR, a Emanuił Iofie ŭzhadvaje zabytyja imiony kiraŭnikoŭ BSSR.
Sakavicki numar Vadzim Hihin abiacaje pryśviacić mižnarodnaj palitycy. Prynamsi, budzie ŭźniataje pytańnie Kosava.
