 |
Ministerstva ŭnutranych spraŭ nie admaŭlaje najaŭnaści ŭ Biełarusi radykalnych maładziožnych nieanacysckich hrupovak — skinchiedaŭ i im padobnych. Pra heta zajaviŭ, adkazvajučy na pytańnie BiełaPAN, namieśnik načalnika ŭpraŭleńnia prafiłaktyki — načalnik adździeła arhanizacyi prafiłaktyki pravaparušeńniaŭ niepaŭnaletnich MUS Biełarusi Andrej Saładoŭnikaŭ 19 lutaha na pres‑kanfierencyi ŭ Minsku.
«Na ščaście, situacyja z padobnymi hrupoŭkami ŭ Biełarusi kantralujemaja. Takija hrupoŭki jość, ale jany małakolkasnyja, kiepska arhanizavanyja i nie karystajucca papularnaściu ŭ padrastajučaha pakaleńnia», — skazaŭ jon.
A.Saładoŭnikaŭ paviedamiŭ, što kala hoda tamu ŭ Biełarusi byli zafiksavanyja fakty źbivańnia kitajskich studentaŭ.
«Pry hetym byli padstavy mierkavać, što złačyncy majuć dačynieńnie da skinchiedaŭ: pa ich źniešnim vyhladzie, łozunhach, što jany vykrykvali, i h.p. Adnak dakazać ich dačynieńnie da skinchiedaŭ davoli składana, i ich dziejańni byli rascenieny jak chulihanstva», — zaznačyŭ pradstaŭnik MUS.
Razam z tym, zapeŭniŭ A.Saładoŭnikaŭ, «usie miarkujemyja ŭdzielniki padobnych hrupovak znachodziacca pad kantrolem jak orhanaŭ MUS, tak i KDB». Pavodle jaho słoŭ, supracoŭniki pravaachoŭnych orhanaŭ taksama pracujuć z futbolnymi fanatami — «dastatkova surjoznaj destruktyŭnaj siłaj».
«Vopyt inšych krain pakazvaje, što mienavita ź liku futbolnych fanataŭ vychodzić bolšaść skinchiedaŭ», — skazaŭ A.Saładoŭnikaŭ.
