 |
Try hady palitviaźniu zamianili na try miesiacy, užo adsiedžanyja.
Siońnia ŭ 9.30 Viarchoŭny Sud pačaŭ razhlad kasacyjnaj skarhi pa spravie žurnalista hazety "Zhoda" Alaksandra Źdźvižkova, asudžanaha, na try hady turmy za publikacyju karykaturaŭ na praroka Muchameda. Pasiedžańnie było zakrytym: žurnalisty musili čakać abviaščeńnia vynikaŭ la hanku sudu. Nie było ni samoha Źdźvižkova, jaki ciapier znachodzicca ŭ SIZA na Vaładarskaha, a taksama nikoha ź jaho svajakoŭ.
Pierahledzieć prysud Źdźvižkovu ŭčora zaklikaŭ Eŭraparlament. Raniej heta samaje patrabavańnie ahučvała «Amnesty International», šerah inšych mižnarodnych pravaabarončych arhanizacyjaŭ.
U 10.30 kalehija sudździaŭ Viarchoŭnaha sudu pastanaviła, što Źdźvižkoŭ sapraŭdy vinavaty, adnak uličyła abstaviny -- staraja maci, u jakoj Alaksandar adzin, stan zdaroŭja asudžanaha. Try hady turmy byli zamienienyja tryma miesiacami aryštu, jakija A.Źdźvižkoŭ užo adsiedzieŭ u SIZA, pakul išło śledztva.
***
Pavodle apošniaj infarmacyi, Alaksandar Źdźvižkoŭ zaraz znachodzicca ŭ siastry ŭ Miensku. Jaho advieźli na mienski vakzał, kab jechaŭ u Barysaŭ, ale žurnalist pajechaŭ da siastry.
***
Alaksandar Źdźvižkoŭ: Źbirajusia pamianiać hramadzianstva i pisać ramany
Namieśnika redaktara hazety «Zhoda» Alaksandra Źdźvižkova žurnalisty čakali pad śledčym izalataram na Vaładarskaha bolš za dźvie hadziny. Prykładna a 15:00 načalnik SIZA paviedamiŭ, što były palitviazień užo jedzie ciahnikom dadomu. Znajści jaho atrymałasia pa telefonie ŭ siastry, jakaja žyvie ŭ Miensku.
«Naša Niva»: Sp.Alaksandar, dyk kali Vas vyzvalili?
Alaksandar Źdźvižkoŭ: Mianie vyzvalili a 13 hadzinie. Pasadzili ŭ mašynu i advieźli na čyhunku, kab ja jechaŭ dadomu ŭ Barysaŭ. Paśla ja pajechaŭ da siastry.
«NN»: Ci čakali siońniašniaha vyzvaleńnia?
AZ: Nu jak vam skazać, rychtujsia da horšaha, spadziavajsia na lepšaje. Kali a 12-j hadzinie mianie vyvieli z kamery, to ja čakaŭ usiaho čaho zaŭhodna: i ekstrannaha adpraŭleńnia ŭ zonu, i viartańnie ŭ Respublikanski turemny špital, i pieravodu ŭ inšuju kameru, dzie mnie b, skažam prama, pryjšłosia b nie sałodka, i vyzvaleńnia. Tym nia mienš atrymaŭ vyzvaleńnie.
«NN»: Vy viedali, što na voli akazalisia inšyja palitviaźni?
AZ: Tak, čuŭ pra vyzvaleńnie Klimava i inšych palitviaźniaŭ.
«NN»: Z čym Vy źviazvajecie vyzvaleńnie?
AZ: Z nehatyŭnaj reakcyjaj na aryšt mižnarodnaj supolnaści, a taksama z aktyŭnaj padtrymkaj kaleh‑žurnalistaŭ.
«NN»: A što było na sudzie?
AZ: Sud byŭ całkam u zakrytym režymie. Prakuratura dakazała svaju poŭnuju niekampetentnaść. Ja abvinavačvańniach hučała, što ja moh mieć namier dla raspalvańnia nacyjanalnaj varažniečy. Tearetyčna. Ale ni sud, ni prakuratura hetaha nie dakazali. Vyrašyli tak, raz jon moh mieć namier, značyć, im i kiravaŭsia. Pry hetym navat nia ŭličvałasia, što nijakich nastupstvaŭ publikacyja nia mieła. Mianie asudzili za niejkija tearetyčnyja dziejańni na try hady turmy.
«NN»: A što Vy kazali ŭ svaim apošnim słovie?
AZ: I sudździ, i prakuroru ja vykłaŭ siužet svajho budučaha ramanu.
«NN»: A Vy źbirajeciesia pisać raman?
AZ: Tak. Dumaju, što heta buduć dźvie knihi. Adna — dakumentalnaja, druhaja — u formie bajevika. Knihi buduć zasnavanyja na turemnym dośviedzie. U pryncypie, ja liču, što try miesiacy turmy — heta tvorčaja kamandziroŭka.
«NN»: A jakija ŭmovy byli ŭ turmach?
AZ: Mahu paŭtaryć słovy Sałžanicyna i Šałamava: «Lepš paźbiehnuć turemnaha dośviedu». Lepš abychodzicca bieź jaho. Ale kali ŭžo daviałosia, to treba vyžyvać. Kali ŭ «amerykancy» było choładna i syra, to na Vaładarcy ja siadzieŭ u pierapoŭnienaj kamery z kryminalnikami. Nas było paŭtara kamplekta — na dvaccać naraŭ tryccać asudžanych.
«NN»: Doŭhi čas Vy chavalisia ŭ Rasiei i Ŭkrainie.
AZ: Ja byŭ hościem u niekalkich manastyroŭ. Nia byŭ tam ni pasłužnikam, ni trudnikam, prosta haściŭ.
«NN»: Nichto nia viedaje, jak Vas zatrymlivali?
AZ: Skažam tak, kali ja znachodziŭsia ŭ vyšuku, to parušyŭ niekatoryja praviły biaśpieki, tamu dazvoliŭ siabie zatrymać. Mianie ŭziali prosta ź ciahnika ŭ Barysavie.
«NN»: Na sudzie Vy kazali, što źbirajeciesia mianiać hramadzianstva. Nie admovilisia ad hetaj zadumy?
AZ: Pakul ja nia vyrašyŭ, jakoje hramadzianstva prymu, ci Rasiei, ci Ŭkrainy. Hramadzianstva źbirajusia mianiać z dumkaj, što znachodzicca na terytoryi Biełarusi mnie niebiaśpiečna. Ja chaču vyjechać tudy, dzie zmahu spakojna pracavać, nie kłapociačysia pra svaju biaśpieku.
U paniadziełak Alaksandar Źdźvižkoŭ źbirajecca dać pres‑kanferencyju na ofisie BAŽu.
