U subotu a 20.30 viečara adyšła žonka źniavolenaha palityka Alaksandra Kazulina Iryna. Z kanca 1990-ch jana chvareła na rak małočnaj załozy. Navat chvoraja, jana addana i samaachviarna zmahałałsia za vyzvaleńnie muža i ratavała inšych represavanych.
Jana była čałaviekam vialikaje advahi. Kali ŭ vyniku stresu paśla źniavoleńnia muža jaje stan rezka pahoršaŭ, jana zabaraniła svajakam i siabram publična pra heta paviedamlać, kab Alaksandar nia viedaŭ.
Apaviadańnie Maryi Vajciašonak «Zahad karalevy, abo Piać chvilin u parozie», što drukavałasia ŭ № 6 «NN» za 2007 hod, było pra Irynu Kazulinu, było, kab padtrymać jaje. Tolki jana nie chacieła, kab sprava dajšła da muža, kab turemščyki vykarystali heta, kab prymusić muža adračysia ad jahonych pryncypaŭ. Mahičny źbieh abstavinaŭ: apaviadańnie pabačyła śviet roŭnieńka hod tamu, 23 lutaha 2007 hodu...
...Jana była 1959 hodu naradžeńnia i pamierła ŭ 48 hadoŭ.
Andrej Dyńko
* * *
«Heta adbyłosia paśla 20-j hadziny. Mamie zrabiłasia drenna, i my sabrali jaje, kab vieźci ŭ špital. Pa darozie jana straciła prytomnaść. Kali pryvieźli, daktary skazali, što jana ŭžo pamierła», — paviedamiła dla radyjo «Svaboda» staršaja dačka Iryny Kazulinaj Volha.
* * *
Kazulin abvieściŭ suchuju haładoŭku da śmierci, bo jaho vymušaciu padpisać nieprymalnyja abaviazacielstvy
Jak paviedamiŭ brat Alaksandra Kazulina, Uładzimier Kazulin, jon mieŭ telefonnuju hutarku z palitviaźniem. Alaksandar Kazulin paviedamiŭ, što jamu prapanavali, u abmien za karotkaterminovaje vychvaleńnie, padpisać abaviazacielstvy, jakija jon ličyć nieprymalnymi. Kali jaho nie vypuściać, z aŭtorka A.Kazulin hatovy abvieścić biesterminovuju suchuju haładoŭku.
Na sajcie Alaksandra Kazulina źjaviłasia jaho zajava. «Ja abviaščaju suchuju haładoŭku. U vypadku, kali mianie ciaham dvuch dzion nia vypuściać, z 26 lutaha ja abviaščaju suchuju haładoŭku, i tady praz 6-7 dzion nas z majoj žonkaj pachavajuć razam. Łukašenka zabiŭ maju žonku, jon zabojca. Śmierć majoj žonki na jaho sumleńni. Ja zajaŭlaju, što pachavańnia žonki nia budzie da toj pary, pakul mianie nia vypuściać.
Ja źviartajusia da pasłoŭ Eŭropy i ZŠA z patrabavańniami terminova abviaścić žorstkija sankcyi asabista suprać Łukašenki i asnoŭnych pradpryjemstvaŭ Biełarusi.
Alaksandar Kazulin,
VK-3 Viciebskaj vobł.»
* * *
Raźvitańnie i adpiavańnie adbuducca ŭ Čyrvonym kaściole. Adnak dočki admaŭlajucca chavać maci, pakul nia budzie vyzvaleny baćka.
«Pra heta my faktyčna ŭžo damovilisia. Mamu pryviazuć ŭ Čyrvony kaścioł ŭviečary ŭ paniadziełak. Ludzi zmohuć ź joj raźvitacca da aŭtorka, da hadziny dnia. Tam budzie adpiavańnie i tady paviazuć na mohiłki. Jakija mohiłki, my pakul nie vyznačylisia», — skazała Volha Kazulina.
Paźniej, kali dočki Kazulina daviedalisia pra niežadańnie ŭładaŭ vyzvalić ich baćku i pra rašeńnie baćki abvieścić suchuju haładoŭku «da śmierci», jany zrabili nastupnuju zajavu: «My zajaŭlajem, što nia budziem chavać mamu, pakul tata nia z nami. Dla jaho takoje pachavańnie budzie aznačać, što jaho «pachavajuć žyvoha», — skazała Volha Kazulina.
Pavodle V. Kazulinaj, jaje zajava ŭ respublikanskuju prakuraturu nibyta «pieradadzienaja ministru ŭnutranych spravaŭ Uładzimieru Navumavu i ŭ Departament vykanańnia pakarańniaŭ». Hetak Volzie Kazulinaj paviedamiŭ dziažurny prakuror Mikałaj Lavonaŭ.
* * *
Pieršaje. Začapiła za žyvoje hreblivaje staŭleńnie da našaj siamji. Choć časam zdajecca, što ničoha padobnaha ŭžo nie moža vyvieści ź siabie, cynizm dzivić. U svaich listach moj muž piša, što samy vialiki jaho bol i kłopat — heta ja. Kožnuju ranicu jon pačynaje z malitvy za majo zdaroŭje.
Druhoje. Chaciełasia b pačuć umovy, na jakich Łukašenka prapanoŭvaŭ Alaksandru vyzvaleńnie. Tyja prapanovy, jakija byli ahučanyja jaho pasłancom nam, byli nieprymalnymi. Heta było b haniebnymi ŭciokami z krainy.
Treciaje. Dzieci jeździli na spatkańnie nie ŭmolvać baćku vyratavać mamu, a abhavaryć biahučuju situacyju.
Čaćviortaje. My ź dziećmi i ŭsie našy blizkija razumiejem Alaksandra, padtrymlivajem jaho, lubim i čakajem jaho biezumoŭnaha vyzvaleńnia.
 |
