Amal dva tydni idzie likvidacyja nastupstvaŭ vycieku dyzpaliva na naftapravodzie «Unieča-Roŭna» ŭ Homielskaj vobłaści, paviedamlaje ANT. Pryčynaj avaryi staŭ praryŭ staroj truby, jakuju 44 hady nie mianiali i nie ramantavali. Pa terytoryi Biełarusi prachodzić 13 tysiač kilametraŭ nafta- i hazapravodaŭ, bolšaść ź jakich byli pabudavanyja ŭ 60-ja hady minułaha stahodździa. Termin ekspluatacyi takich trubaŭ składaje 33 hady. Ramont trubapravodu darahoha kaštuje – pradpryjemstva «Homieltransnafta «Družba», naprykład, štohod vydatkuje na hetyja mety bolš za 60 młrd rubloŭ.
U apošni čas pahroza ekalahičnych katastrofaŭ u asnoŭnym sychodzić ad rasiejskich trubapravodaŭ. Nahadajem, što na trubapravodach rasiejskaj kampanii «Zachadtransnaftapradukt» tolki ciaham hodu adbyłasia try avaryi. Pieršaja adbyłasia 23 sakavika 2007 hodu na naftapravodzie «Unieča-Vienstpiłs» u Biešankovickim rajonie Viciebskaj vobłaści. Adbyŭsia vyciek kala 120 tonaŭ dyzpaliva. Jano patrapiła ŭ raku Ułu — prytok Dźviny, a adtul u Dźvinu. Mazuta dasiahnuła terytoryi Łatvii, jakaja paźniej vykazała ŭ adras Biełarusi finansavyja pretenzii. Druhaja avaryja zdaryłasia 5 traŭnia taho ž hodu taksama ŭ Biešankovickim rajonie kala vioski Babajedava. Abjom vycieku skłaŭ kala 5 tonaŭ mazutu. U jakaści kampensacyi za naniesienuju škodu Biełaruś atrymała ad «Zachad-Transnaftapraduktu» $7 młn. Biełaruski bok i hetym razam raźličvaje na kampensacyju. Adnak i ad ekspluatacyi niebiaśpiečnych trubaŭ nie admaŭlajecca. Padlik ekalahičnaj škody budzie skončany nie raniej za 3 sakavika.
Pavodle staršaha vice-prezydenta kampanii «Aka-Tranśniefť» Siarhieja Makarava, defektaŭ pradpryjemstva likviduje šmat: «Tolki ŭ lutym na trubie, jakaja idzie ŭ nakirunku Navapołacku my vydalili 21 bujny defekt. To bok, heta defekty, jakija ciaham 1,5 — 2 hadoŭ mahli pryvieści da niepryjemnaściaŭ».
